លោក ខៀវ កាញារីទ្ធ ប្រាប់ពីវិធីមួយដើម្បីបន្សាបព័ត៌មានក្លែងក្លាយ

2019-05-03 06:23:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានណែនាំឱ្យអ្នកសារព័ត៌មានជាតិ និងអន្តរជាតិ បន្តការខិតខំប្រឹងប្រែងថែមទៀត ក្នុងការប្រយុទ្ធប្រឆាំងទប់ស្កាត់ព័ត៌មានក្លែងបន្លំ ពោលគឺការបញ្ចេញព័ត៌មានពិត ដើម្បីបន្សាបព័ត៌មានក្លែងបន្លំ។ ការថ្លែងនេះ ធ្វើឡើងនៅក្នុងទិវាសេរីភាពសារព័ត៌មានសកលលោក នាព្រឹកថ្ងៃទី០៣ ខែឧសភា ឆ្នាំ២០១៩។

លោកថា ព័ត៌មានក្លែងក្លាយ បានធ្វើឱ្យបាត់បង់តម្លៃសារព័ត៌មានអាជីព និងបាត់បង់នូវការគាំទ្រពីសាធារណជន ព្រមទាំងធ្វើឱ្យសង្គមមានភាពវឹកវរ។

ជាមួយគ្នានេះ រដ្ឋមន្ត្រីក្រសួងព័ត៌មាន បានឲ្យអ្នកសារព័ត៌មានខិតខំប្រឹងប្រែងបំពេញការងារដោយគោរពក្រមសីលធម៌ វិជ្ជាជីវៈ រក្សានូវភាពថ្លៃថ្នូ និងខិតខំអភិវឌ្ឍសមត្ថភាពរបស់ខ្លួន ដើម្បីដើរទាន់ការរីកចម្រើននូវបច្ចេកវិទ្យាឌីជីថលនាពេលបច្ចុប្បន្ន និងជៀសវាងការប្រព្រឹត្តអំពើខុសច្បាប់ ដែលធ្វើឱ្យប៉ះពាល់ដល់តម្លៃសារព័ត៌មាន ដូចជាការយកតួនាទីសារព័ត៌មានដើរដាក់កុងត្រូលជជុះ ដើម្បីទារលុយពីអ្នករកស៊ីខុសច្បាប់ និងបញ្ហាទំនាស់ដីធ្លីដែលប្រាសចាកអំពីក្រមសីលធម៌វិជ្ជាជីវៈ ធ្វើឲ្យប៉ះពាល់ដល់អ្នកសារព័ត៌មានអាជីព និងបាត់បង់តម្លៃស្ថាប័នសារព័ត៌មានទាំងមូល។

លោករដ្ឋមន្រ្តី បានបន្តថា ទាក់ទងទិវាសេរីភាពសារព័ត៌មានសកលឆ្នាំ២០១៩ បានជ្រើសរើសប្រធានបទសំខាន់ពាក់ព័ន្ធទៅនិង «ប្រព័ន្ធផ្សព្វផ្សាយសម្រាប់លទ្ធិប្រជាធិបតេយ្យ៖ វិជ្ជាជីវៈសារព័ត៌មាន និងការផ្សព្វផ្សាយព័ត៌មានមិនពិតក្នុងការបោះឆ្នោត»។ ប្រធានបទនេះ មានលក្ខណៈសមស្រប និងឆ្លើយតបទៅនឹងបញ្ហាជាសកលដែលពិភពលោកទាំងមូល កំពុងប្រឈមទៅនឹងការផ្សាយព័ត៌មានក្លែងបន្លំ ការលាបពណ៌ ការញុះញង់ អុជអាល ជេរប្រមាថដោយការសម្អប់គ្នា ការរើសអើងជាដើម ដែលបង្កឲ្យមានការបែកបាក់សាមគ្គីផ្ទៃក្នុង ដែលធ្វើឲ្យពិភពលោកមានភាពចលាចល ហើយការបោះឆ្នោតនៅប្រទេសមួយចំនួន មានភាពច្របូកច្របល់ បាត់បង់ទំនុកចិត្ត មិនទទួលស្គាល់លទ្ធផលនៃការបោះឆ្នោត បង្កឲ្យកើតមានអំពើហិង្សា និងជម្លោះប្រដាប់អាវុធ។

ដោយឡែកនៅកម្ពុជាបានជ្រើសរើសយកប្រធានបទស្តីពី «តួនាទីប្រកបដោយសក្តានុពលរបស់សារព័ត៌មានគាំទ្រសន្តិភាព និងប្រជាធិបតេយ្យ» ដែលមានលក្ខណៈសមស្របទៅនឹងស្ថានភាពជាក់ស្តែងរបស់កម្ពុជា នាពេលបច្ចុប្បន្ន ដែលទើបតែបញ្ចប់ព្រឹត្តិការណ៍ប្រវត្តិសាស្ត្រ នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ប្រកបដោយជោគជ័យ និងជាទីមោទន ដោយស្ថាប័នសារព័ត៌មានមួយចំនួនធំនៅកម្ពុជា បានប្រកាន់ភ្ជាប់នូវក្រមសីលធម៌ វិជ្ជាជីវៈក្នុងការផ្សព្វផ្សាយព័ត៌មានពិតពីដំណើរការបោះឆ្នោត ជូនប្រជាពលរដ្ឋ ធ្វើការសម្រេចចិត្តដោយខ្លួនឯង ដែលធ្វើឲ្យការបោះឆ្នោតបានប្រព្រឹត្តទៅដោយសេរី ត្រឹមត្រូវ យុត្តិធម៌ ឆ្លុះបញ្ចាំងពីឆន្ទៈពិតប្រាកដរបស់ប្រជាពលរដ្ឋក្នុងការជ្រើសតាំងតំណាងរាស្ត្រស្របច្បាប់របស់ខ្លួន។ នេះបើតាមការបញ្ជាក់របស់លោក ខៀវ កាញារីទ្ធ៕

អត្ថបទ៖ សោភា