បឹងស្នោរ ជិតមានអគារពាណិជ្ជកម្មកម្ពស់ ៣៨ជាន់ ដែលមានតម្លៃ ២០០លានដុល្លារ

2019-05-07 02:00:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគារមជ្ឈមណ្ឌលពាណិជ្ជកម្មចម្រុះ និងលំនៅឋានដ៏ទំនើប ទាន់សម័យ ដែលមានតម្លៃរហូត ២០០លានដុល្លារនឹងផុសឡើងនៅតំបន់ បឹងស្នោរក្បែរផ្លូវជាតិលេខ១ ក្នុងពេលដ៏ខ្លីឆាប់ៗខាងមុខនេះ។

យោងតាមការចុះផ្សាយរបស់ AKP ឱ្យដឹងថា អគារពាណិជ្ជកម្មចម្រុះ One Central Tower នេះ មានកម្ពស់៣៨ជាន់ នៅលើផ្ទៃដី ២៤ ០០០ម៉ែត្រការ៉េ ត្រូវបានចាប់ផ្តើមសម្ពោធបុកគ្រឹះធ្វើការសាងសង់ហើយ កាលពីព្រឹកថ្ងៃទី០៦ ខែឧសភា ឆ្នាំ២០១៩។

ប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃក្រុមហ៊ុន B.I.C Group លោក យឹម ល័ក្ខណ៍ បានមានប្រសាសន៍ថា ការរៀបចំពិធីបញ្ចុះបឋមសិលានេះ គឺជាការចាប់ផ្តើមសាងសង់នូវគម្រោងអចលនទ្រព្យដំបូងបង្អស់របស់ B.I.C Group នៅក្នុងរាជធានីភ្នំពេញ។

លោកបានបន្ដថា សម្រាប់ការសាងសង់ One Central ដែលមានរយៈពេល ២ឆ្នាំកន្លះ ក្នុងទឹកប្រាក់វិនិយោគដំបូងរហូតដល់ទៅ ២០០លានដុល្លារ។ នេះគឺជាជំហានដំបូងនៃការអភិវឌ្ឍជាច្រើន ដើម្បីអភិវឌ្ឍតំបន់បឹងស្នោ ឱ្យទៅជាតំបន់សេដ្ឋកិច្ចលូតលាស់ថ្មីមួយទៀតដែលផ្តល់នូវការរស់នៅ ការងារ និងការកម្សាន្ត ដ៏ទំនើបសម្បូរបែបលំដាប់ពិភពលោក។

លោកបន្ថែមថា One Central គឺជាការរួមបញ្ចូលគ្នានូវការិយាល័យពាណិជ្ជកម្ម មជ្ឈមណ្ឌលផ្សារទំនើប មន្ទីរពេទ្យ អគារស្នាក់នៅ និងជាតំបន់ធម្មជាតិបៃតង។ ជាមួយគ្នានេះ One Central Tower មានចំនួន៥អគារ ដែលក្នុងនោះ អគារចំនួន៤ នឹងដើរតួជាមជ្ឈមណ្ឌលពាណិជ្ជកម្មចម្រុះ រួមមានអគារការិយាល័យ ផ្សារទំនើប មន្ទីរពេទ្យទំនើប ភោជនីយដ្ឋានជាដើម ហើយអគារចំនួ១ ជាប្រភេទលំនៅឋានសហកម្មសិទ្ធិដ៏ទាន់សម័យ។

ចាប់តាំងពីដំណាក់កាលដំបូងនៃការរៀបចំផែនការ ក្រុមហ៊ុនបានផ្តោតការយកចិត្ត ទុកដាក់យ៉ាងខ្លាំង នូវការធានាមួយដែលត្រូវតែអភិវឌ្ឍតំបន់នេះឱ្យក្លាយជាតំបន់សេដ្ឋកិច្ច ដ៏មានសក្តានុពលខ្លាំងក្លារួមជាមួយការផ្តល់នូវបរិស្ថានរស់នៅល្អបំផុតដល់ប្រជាពលរដ្ឋ។ នេះបើតាមការលើកឡើងបន្ថែមរបស់អគ្គនាយក B.I.C Group៕

ប្រភព៖ AKP