រដ្ឋមន្រ្តីទេសចរណ៍ ជំរុញឱ្យផ្សព្វផ្សាយពីការមើលកញ្ចុំផ្កាយលើភ្នំបូកគោ និងរៀបចំវាលស្រែអំបិល សម្រាប់ភ្ញៀវទស្សនាស្វែងយល់

2019-05-07 08:29:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ថោង ខុន រដ្ឋមន្រ្តីក្រសួងទេសចរណ៍ បានជំរុញឱ្យមន្ទីរទេសចរណ៍ខេត្តកំពត សហការជាមួយនាយកដ្ឋានជំនាញ ត្រូវផ្សព្វផ្សាយពីសក្ដានុពលវិស័យទេសចរណ៍ក្នុងខេត្ត ឱ្យបានទូលំទូលាយចាប់ពីពេលនេះទៅ ដូចជារមណីយដ្ឋានកសិទេសចរណ៍ ចម្ការម្រេចដ៏ល្បីល្បាញ រមណីយដ្ឋានភ្នំបូកគោ ពិសេសព័ត៌មានដែលភ្ញៀវទេសចរ អាចមើលឃើញកញ្ចុំផ្កាយរាប់លានដួង ឬហៅថា «កាឡាក់ស៊ីមីគីវ៉េ» នៅលើភ្នំបូកគោ។

ការថ្លែងខាងលើនេះ ធ្វើឡើងក្នុងកិច្ចប្រជុំត្រៀមរៀបចំពិធីបុណ្យសមុទ្រលើកទី៨ (ជុំទី២) កាលពីថ្ងៃទី៦ ខែឧសភា ឆ្នាំ២០១៩ នៅសាលាខេត្តកំពត ដោយមានការចូលរួមពីលោក ជាវ តាយ អភិបាលខេត្តកំពត។

រូបថត៖ ក្រសួងទេសចរណ៍

លោកបន្តថា គួររៀបចំវាលស្រែអំបិលឲ្យបានល្អ ទុកសម្រាប់ទេសចរ ស្វែងយល់ និងទស្សនាផងដែរ។

ក្នុងកិច្ចប្រជុំនេះ លោករដ្ឋមន្រ្តីបានលើកឡើងថា ខេត្តកំពត មានសក្ដានុពលខ្ពស់សម្រាប់អភិវឌ្ឍន៍វិស័យទេសចរណ៍ ក្នុងនោះមានទីក្រុងបេតិកភណ្ឌ រមណីយដ្ឋានទេសចរណ៍ធម្មជាតិយ៉ាងច្រើនសម្បូរបែប និងតំបន់កសិទេសចរណ៍ជាដើម។

បើតាមក្រសួងទេសចរណ៍ដែលបានដកស្រង់ការលើកឡើងរបស់លោក ស្រ៊ុន សុភា មគ្គុទ្ទេសក៍ទេសចរណ៍មួយរូប ឱ្យដឹងថា ការមើលឃើញកញ្ចុំផ្កាយកាឡាក់ស៊ី រាប់ពាន់លានដួងដែលរះនៅអវកាស គេអាចមើលឃើញតែ ២កន្លែងប៉ុណ្ណោះ គឺលើកំពូលភ្នំបូកគោ ម្តុំវាលស្រែមួយរយ និងលើកំពូលភ្នំឱរ៉ាល់។

លោក ស្រ៊ុន សុភា បានឱ្យដឹងថា ភ្ញៀវបានប្រាប់លោកថា កាឡាក់ស៊ីនោះវាជាផ្កាយបញ្ចេញពណ៌ចម្រុះនាពេលរាត្រី ស្ថិតនៅផ្តុំគ្នារហូតដល់រាប់ពាន់លានផ្កាយ។ ជាទូទៅមានតែតំបន់ប៉ូលទេ ទើបគេអាចមើលផ្កាយចម្លែកនេះ ដោយកាមេរ៉ាពិសេស។ ប៉ុន្តែបែរជានៅកម្ពុជាមានវាសនាអាចមើលឃើញ និងអាចថតរូបបានដូចនៅតំបន់ប៉ូលដែរ។

រដ្ឋមន្ត្រីក្រសួងទេសចរណ៍ បានបញ្ជាក់ថា ចំណុចនេះគឺជារឿងដ៏អស្ចារ្យ និងអច្ឆរិយដ៏ល្អមួយសម្រាប់កម្ពុជា ដែលនេះគឺជាផលិតផលទេសចរណ៍ថ្មី១ដ៏ទាក់ទាញ។ លោកបានបន្តថា ហ្វូងផ្កាយមីលគីវេ( Milky Way) នេះ មានរូបរាងល្អចម្លែកខុសពីផ្កាយធម្មតា ដែលមនុស្សមិនអាចមើលឃើញញឹកញាប់ ក្នុងពេលរាត្រីឡើយ មានតែទីទួលខ្ពស់ដូចជាភ្នំបូកគោជាដើម ទើបអាចមានឱកាសបានមើលឃើញ៕

អត្ថបទ៖ សំភី