លោក ជា សុផារ៉ា ប្រាប់អ្នករាយការណ៍ពិសេស UN ថា ការចុះបញ្ជីដីធ្លីនៅកម្ពុជា នឹងបញ្ចប់ទាំងស្រុងនៅឆ្នាំ២០២១

2019-05-08 01:48:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងជំនួបគ្នាមួយកាលពីថ្ងៃទី៧ ខែឧសភា ឆ្នាំ២០១៩ លោក ជា សុផារ៉ា ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានជម្រាបជូនលោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា អំពីវឌ្ឍនភាព លើវិស័យដីធ្លី និងលំនៅឋាន ក្នុងនោះបានចុះបញ្ជីដីធ្លី ៥,២ លានក្បាលដី ស្មើនឹង ៧៤ភាគរយ នៃក្បាលដីសរុបប្រមាណ ៧លានក្បាលដី ដោយគ្រោងបញ្ចប់ ១០០% នៅឆ្នាំ២០២១។

លោកស្រី រ៉ូណា ស្មីត បានលើកឡើងអំពីការកែសម្រួលនីតិវិធី នៃការចុះបញ្ជីដីសហគមន៍ជនជាតិដើមភាគតិច កាន់តែងាយស្រួល និងលឿនជាងមុន ពិសេសការចុះបញ្ជីដីសហគមន៍ជនជាតិដើមភាគតិចនៅស្រុកសំឡូត ដោយទីតាំងនេះមិនទាន់មានសុវត្ថិភាព ដោយនៅមានគ្រាប់មីន និងយុទ្ធភណ្ឌមិនទាន់ផ្ទុះ និងការចុះបញ្ជីដីរបស់សហគមន៍ជនជាតិដើមភាគតិចចំនួន ៣សហគមន៍ ស្ថិតនៅស្រុកត្បែងមានជ័យខេត្តព្រះវិហារ។

ត្រង់ចំណុចនេះ លោក ជា សុផារ៉ា បញ្ជាក់ថា ការចុះបញ្ជីដីធ្លីសហគមន៍ជនជាតិដើមភាគតិច បាន ២៤សហគមន៍ និងបានដោះស្រាយបញ្ចប់វិវាទដីធ្លី ៨០៦២ករណី នៅបន្តការដោះស្រាយប្រមាណ ២ពាន់ករណី និងបានឆ្លើយបំភ្លឺនៅចំណុចដែលបានលើកឡើងខាងលើ។ លោកក៏បានអះអាងអំពីការជំរុញពន្លឿនការចុះបញ្ជីដីសហគមន៍ជនជាតិដើមភាគតិចដែលនៅសល់។

អ្នករាយការណ៍ពិសេសក៏បានលើកឡើងផងដែរ អំពីការតាំងទីលំនៅថ្មីរបស់ប្រជាជនរស់នៅលើទឹកនៅឆ្នុកទ្រូ ខេត្តកំពង់ឆ្នាំង ដែលបម្លាស់ទីមកលើគោក និងការរៀបចំមានគោលការណ៍ណែនាំចូលរួមក្នុងការងារដោះស្រាយវិវាទដីធ្លី រួមទាំងការចូលរួមអនុវត្តគោលដៅអភិវឌ្ឍន៍ប្រកបដោយចីរភាពរបស់កម្ពុជា និងការសហការកែលម្អក្របខណ្ឌនគរូបនីយកម្មនៅកម្ពុជា នឹងរៀបចំវេទិកាថ្នាក់ជាតិស្ដីពីនគរូបនីយកម្ម។

លោកឧបនាយករដ្ឋមន្រ្តី លើកឡើងថា ក្រសួងបានគាំទ្រដល់រដ្ឋបាលខេត្តកំពង់ឆ្នាំង ក្នុងការរៀបចំការតាំងទីលំនៅថ្មីរបស់ប្រជាពលរដ្ឋរស់នៅលើទឹក និងការបន្តកិច្ចសហការរៀបចំកែសម្រួលក្របខណ្ឌនគរូបនីយកម្មនៅកម្ពុជា ព្រមទាំងការរៀបចំវេទិកាថ្នាក់ជាតិស្ដីពីនគររមណីយកម្មឲ្យបានជោគជ័យផងដែរ៕