អភិបាលរាជធានី កំពុងសុំដីកាពីតុលាការ តាមចាប់ខ្លួនម្ចាស់ក្លិបកម្សាន្តលុច្សសារី

2019-06-10 00:33:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឃួង ស្រេង អភិបាលរាជធានីភ្នំពេញ បានបញ្ជាក់ប្រាប់ក្រុមអ្នកសារព័ត៌មាន នៅថ្ងៃទី៩ ខែមិថុនា ឆ្នាំ២០១៩ នេះថា នៅពេលនេះ លោកកំពុងសុំដីកាពីតុលាការ ដើម្បីតាមចាប់ខ្លួនម្ចាស់ក្លិបកម្សាន្ដ «លុច្សសារី» ទីដែលកម្លាំងសមត្ថកិច្ចចុះបង្ក្រាប កាលពីយប់ថ្ងៃទី៨ ខែមិថុនា ពាក់ព័ន្ធករណីគ្រឿងញៀន ដោយឃាត់ខ្លួនបានមនុស្សជាង ៤០០នាក់។

លោក ឃួង ស្រេង ថ្លែងប្រាប់អ្នកកាសែត ក្នុងកម្មវិធីហូបនំបញ្ចុកសាមគ្គីជាតិ នៅវត្តជម្ពូវ័ន្ត កាលពីថ្ងៃទី៩ មិថុនា

លោកអភិបាលរាជធានីភ្នំពេញ ថ្លែងបែបនេះក្នុងឱកាសអញ្ជើញដឹកនាំកម្មករកម្មការិនីហូបនំបញ្ចុកសាមគ្គីជាតិ នៅវត្តជម្ពូវ័ន្ត សង្កាត់ចោមចៅទី២ ខណ្ឌពោធិ៍សែនជ័យ ជិត២ពាន់នាក់។ លោក ឃួង ស្រេង បានបញ្ជាក់ទៀតថា កន្លងទៅអាជ្ញាធរធ្លាប់បានណែនាំជាច្រើនលើកច្រើនសារហើយដល់ម្ចាស់ទីតាំងក្លិបកម្សាន្ដខាងលើនេះ ប៉ុន្ដែហាក់គ្មានប្រសិទ្ធភាពនោះទេ គឺម្ចាស់ទីតាំងនៅបន្ដបើកដដែលមិនថាយប់ថ្ងៃនោះឡើយ ដោយបង្កការរំខានយ៉ាងខ្លាំងដល់ប្រជាពលរដ្ឋសិស្សនិស្សិត រហូតប៉ុន្មានថ្ងៃមុននេះមានករណីបាញ់បោះផងដែរ។

យ៉ាងណាក្ដី សមត្ថកិច្ចពាក់ព័ន្ធ មិនទាន់បានបង្ហាញអំពីអត្ដសញ្ញាណម្ចាស់ទីតាំងក្លិប «លុច្សសារី» ថាឈ្មោះអ្វី ហើយមានតួនាទីអ្វីនោះទេ។

គួរជម្រាបថាកម្លាំងនគរបាលរាជធានីភ្នំពេញ ក្រោមការបញ្ជាផ្ទាល់ពីនាយឧត្តមសេនីយ៍សន្ដិបណ្ឌិតនេត សាវឿន អគ្គស្នងការនគរបាលជាតិ និងដឹកនាំកម្លាំងប្រតិបត្តិការដោយលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការរាជធានីភ្នំពេញ បានបើកប្រតិបត្តិការទាំងកណ្តាលអាធ្រាត្រ ថ្ងៃទី៨ ខែមិថុនា ចុះឆែកឆេរក្លិបកម្សាន្ត «លុច្សសារី» នៅសង្កាត់បឹងរាំង ខណ្ឌដូនពេញ ដោយរកឃើញថ្នាំញៀនមួយចំនួន និងឃាត់ខ្លួនអ្នកចូលលេងកម្សាន្តក្នុងក្លឹបជាង ៤០០នាក់។

ក្រោយការឆែកឆេរកម្លាំងសមត្ថកិច្ចបានបិទក្លិបជាបណ្តោះអាសន្ន និងបាននាំអ្នកលេងកម្សាន្តប្រមាណ ៤០០នាក់ទៅស្នងការដ្ឋាននគរបាលរាជធានីភ្នំពេញ។ បើតាមប្រភពពីសមត្ថកិច្ចអ្នកលេងកម្សាន្តក្នុងក្លិបនេះភាគច្រើនជនជាតិចិននិងវៀតណាម៕

ចុចអាន៖ ប៉ូលិសឆ្មក់ចូលបង្រ្កាបក្លឹបកម្សាន្តមួយ ទាំងកណ្ដាលអាធ្រាត្រ ឃាត់ខ្លួនបានជាង ៤០០នាក់

ប្រភព៖ រស្មីកម្ពុជា