រដ្ឋមន្ត្រីកសិកម្ម នឹងចាត់ការក្រុមឈ្មួញឈូសឆាយដីព្រៃសហគមន៍ជាង១ពាន់ហិកតានៅខេត្តកំពង់ឆ្នាំង
- 2019-07-09 02:07:47
- ចំនួនមតិ 0 | ចំនួនចែករំលែក 0
រដ្ឋមន្ត្រីកសិកម្ម នឹងចាត់ការក្រុមឈ្មួញឈូសឆាយដីព្រៃសហគមន៍ជាង១ពាន់ហិកតានៅខេត្តកំពង់ឆ្នាំង
ចន្លោះមិនឃើញ
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានព្រមានចាត់វិធានការផ្លូវច្បាប់ចំពោះក្រុមជនខិលខូចមួយចំនួន ដែលបានឈូសឆាយរំលោភយកដីព្រៃសហគមន៍បម្រុងទុករបស់រដ្ឋ ស្ថិតនៅក្នុងភូមិត្រពាំងអំពិល ភូមិប្រស្និប ភូមិស្អំ ស្រុករលាប្អៀរ ខេត្តកំពង់ឆ្នាំង។ ការព្រមាននេះ ធ្វើឡើងបន្ទាប់ពីមានក្រុមឈ្មួញ បានយកគ្រឿងចក្រទៅឈូសឆាយដីព្រៃសហគមន៍កាលពីថ្ងៃទី០៧ ខែកក្កដា ឆ្នាំ២០១៩។
ដីព្រៃសហគមន៍ដែលក្រុមឈ្មួញឈូសឆាយធ្វើជាកម្មសិទ្ធិ គឺមានប្រមាណជាង ១ពាន់ហិកតា។
ប្រភពបានបង្ហើបថា ករណីនេះ គឺមានការពាក់ព័ន្ធជាមួយមន្ត្រីយោធា និងមនុស្សមួយចំនួនដែលបានឃុបឃិតគ្នា ក្នុងការយកគ្រឿងចក្រឈូសឆាយដីព្រៃសហគមន៍ ដើម្បីយកទៅពុះឡូត៍លក់។
លោក វេង សាខុន បានថ្លែងប្រាប់ [ខ្លីៗ] ថា ចំពោះករណីនេះ លោកបានឲ្យមន្ត្រីជំនាញចុះមើលត្រួតពិនិត្យមើលទីតាំងដីព្រៃសហគមន៍នៅស្រុករលាប្អៀរ ខេត្តកំពង់ឆ្នាំង។ «ខ្ញុំបានជូនដំណឹងនេះ ទៅឯកឧត្តម អ៊ុង សំអាត ថានឹងអាចចុះមើលទីតាំង ព្រោះគាត់ទទួលបន្ទុកលេខាធិការដ្ឋាន អ្នកដែលកាប់ឈូសឆាយយកដីធ្លីហ្នឹង គឺយើងនឹងអាចទៅត្រួតពិនិត្យមើល ហើយនិងអាចកសាងសំណុំរឿងទាក់ទងបញ្ហានេះ»។
រីឯលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំងបានបញ្ជាក់ថា ករណីជនខិលខូច ដែលទៅរំលោភបំពានលើដីព្រៃសហគមន៍នៅចំណុចនោះ លោកនឹងមិនលើកលែងឡើយ ហើយលោកនឹងរៀបចំឯកសារកសាងសំណុំរឿងបញ្ជូនទៅកាន់តុលាការចំពោះអ្នកដែលពាក់ព័ន្ធទាំងអស់៕