ខួប ២៥ឆ្នាំអាជ្ញាធរជាតិអប្សរា កម្ពុជា នឹងរៀបចំមហោស្រពអូពេរ៉ាលើកដំបូង

2019-08-20 06:28:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា នឹងរៀបចំមហោស្រពអូពេរ៉ាអន្តរជាតិលើកដំបូង ក្នុងតំបន់អង្គរ ដើម្បីអបអរសាទរខួប ២៥ឆ្នាំ នៃការបង្កើត អាជ្ញាធរជាតិអប្សរា ក្រោមការសហការរៀបចំរវាងក្រសួងវប្បធម៌ និងវិចិត្រសិល្បៈ ក្រសួងទេសចរណ៍ អាជ្ញាធរជាតិអប្សរា ជាមួយមហោស្រពអូពេរ៉ា Mozard at Angkor។ ព្រឹត្តិការណ៍មហោស្រពអន្តរជាតិនេះ នឹងធ្វើឡើងនៅថ្ងៃទី១៩ ដល់ ២៣ ខែកុម្ភៈ ឆ្នាំ២០២០ ខាងមុខនេះ។

រូបតំណាង៖ ការសម្ដែង ល្ខោនអូពេរ៉ា នៅកម្ពុជាកន្លងមក

ព្រឹត្តិការណ៍នេះដែរ ក៏មានការបើកជាផ្លូវការក្រោមព្រះរាជាធិបតីដ៏ខ្ពង់ខ្ពស់របស់ ព្រះករុណា ព្រះបាទ សម្តេច ព្រះបរមនាថ នរោត្ដម សីហមុនី ព្រះមហាក្សត្រនៃកម្ពុជា ក្នុងនោះក៏គ្រោងនឹងមានការចូលរួមដោយសិល្បករ និងសិល្បការិនីមកពីជុំវិញពិភពលោក ដោយមានការចូលរួមរបស់ក្រុមសិល្បៈកម្ពុជាសរុបប្រមាណជាង ៧០នាក់ ដែលរៀបចំនៅក្នុងទម្រង់ជាការសម្ដែងទស្សនីយភាព Mozart។

លោក Aaron Carpene ប្រធានដឹកនាំរៀបចំការសម្ដែងមហោស្រពអូពេរ៉ា Mozard at Angkor នេះក៏បានចូលជួបជាមួយ លោក ថោង ខុន រដ្ឋមន្ត្រីក្រសួងទេសចរណ៍ នៅទីស្ដីការក្រសួងទេសចរណ៍ នាព្រឹកថ្ងៃទី១៩ ខែសីហា ដើម្បីរាយការណ៍នូវគម្រោងរៀបចំព្រឹត្តិការណ៍សម្តែងទស្សនីយភាព មហោស្រពអូពេរ៉ាអន្តរជាតិនេះ។

លោក ថោង ខុន ក៏បានបង្ហាញការគាំទ្រយ៉ាងពេញទំហឹងចំពោះការរៀបចំព្រឹត្តិការណ៍នេះ ដោយស្របពេលដែលក្រសួងទេសចរណ៍កំពុងជំរុញការផ្សព្វផ្សាយ គោលដៅទេសចរណ៍តំបន់ខេត្តសៀមរាបអង្គរ ទៅកាន់ពិភពលោកបន្ថែមទៀត។

លោក ក៏ជឿជាក់ថា ព្រឹត្តិការណ៍នេះនឹងក្លាយជាផលិតផលទេសចរណ៍វប្បធម៌ ជួយផ្សព្វផ្សាយដល់សម្បត្តិវប្បធម៌ អរិយធម៌ និងសិល្បៈដ៏សម្បូរបែប អច្ឆរិយភាពនៃអង្គរ និងគោលដៅ ទេសចរណ៍សៀមរាបអង្គរដល់ទេសចរអន្តរជាតិ បន្ទាប់ពីព្រឹត្តិការណ៍ទេសចរណ៍កីឡា រួមមាន៖ Angkor Full Marathon, International Half Marathon, Raid Amazon ជាដើម៕

ចុចអាន៖

អត្ថបទ៖ ម៉េងងី