លោក ហ៊ុន ម៉ាណែត បានថ្លែងទៅកាន់និស្សិតថា «យើងកុំមើលងាយជាតិឯង គឺ​ត្រូវ មាន​មោទ​នភាព​ចំពោះ​ជាតិសាសន៍ ចំពោះប្រព័ន្ធអប់រំរបស់យើង និងធនធានមនុស្សរបស់យើង។ អ្នក​ចេះ​ពិត​ប្រាកដ គេ​មិន​ដែលមើលងាយអ្នកផ្សេងទេ កាន់តែខ្ពស់កាន់តែដាក់ខ្លួន បើកចំហរចិត្ត គោរព​អ្នក​ដទៃ»។ ការថ្លែងនេះ នៅក្នុងពិធីប្រគល់សញ្ញាបត្រ​ជូន​ដល់​និស្សិត​ជ័យលាភី​នៃ​សាកល​វិទ្យាល័យ​គ្រប់គ្រង និងសេដ្ឋកិច្ច ខេត្តបាត់ដំបង កាល​ថ្ងៃទី០២ ខែតុលា ឆ្នាំ២០១៩។

លោក ហ៊ុន ម៉ាណែត បានបន្តថា នៅពេលដែលខ្លួនពុំមានគុណធម៌ សីលធម៌ កុំ​តាំង​ខ្លួន​អ្នក​ឯង​បណ្ឌិត​ប៉ុណ្ណា ក៏​គេមិនគោរពដែរ ព្រោះខ្វះគុណធម៌ អ្នកចេះដឹង ជា​ពិសេស​ការ​ឲ្យ​តម្លៃ​អ្នក​ដទៃ​ជា​ពិសេស​ឲ្យ​តម្លៃជាតិខ្មែរ តម្លៃកូនសិស្សខ្មែរឲ្យតម្លៃប្រជាពលរដ្ឋខ្មែរ។ យើង​ត្រូវ​មានមោទនភាព​ចំពោះ​ជាតិ​ឯង​ដែលក្នុងរយៈពេល ២០ឆ្នាំនេះ និងតទៅមុខទៀតយើងមានសក្តានុពលរបស់យើង។

លោក​បាន​បន្ត​ថា អ្នករៀននៅខាងក្រៅ និងអ្នករៀននៅខាងក្នុងគឺមានតម្លៃដូចគ្នា មិន​សំខាន់​តែ​សញ្ញាប័ត្រ​នោះទេ តែសញ្ញាប័ត្រ​ក៏ជាកត្តាសំខាន់ដែរ។ ដូច្នេះ​យើង​ត្រូវ​ឱ្យ​តម្លៃ​នៃ​ការ​សិក្សា​រៀន​សូត្រ និងប្រព័ន្ធអប់រំគឺជារឿងសំខាន់ដែលជាវិស័យអតិភាពរបស់រាជរដ្ឋាភិបាល។ លោក​ក៏​បាន​បញ្ជាក់​ដែរ​ថា ធនធានមនុស្ស គឺជា​គោលការណ៍សំខាន់ក្នុងនោះ មានពីរ គឺសុខភាព និងចំណេះដឹង គឺ​វិស័យអប់រំនិងសុខាភិបាល។ មនុស្សមានចំណេះដឹងតែមិនមានសុខភាពល្អក៏ធ្វើមិនកើត ហើយ​មនុស្ស​មាន​សុខភាព​មិន​មានចំណេះដឹងក៏យើងមិនអាចអភិវឌ្ឍបាន។

ដូច្នេះហើយថវិកាជាតិមានកំណើនខ្ពស់នៅលើវិស័យទាំងពីរនេះដើម្បីលើកតម្កើងជីវភាព និង​បង្កើន​គុណភាព​អប់រំ ដើម្បីឲ្យនិស្សិតខ្មែរយើងកាន់តែខ្លាំង ពី​ព្រោះ​យើង​រស់​នៅ​ក្នុង​ដំណាក់​កាល​ប្រកួត​ប្រ​ជែង បើកចំហរ។ ហើយ​ការអប់រំគឺមិនសំខាន់តែត្រឹមតែនៅលើក្រដាសនោះទេ គឺ​សំខាន់​នៅ​លើ​ភាព​ជាក់​ស្ដែង​ផងដែរ។ ការអប់រំនៅកម្ពុជាចេញដំណើរនៅក្រោយគេបន្តិចដោយសារសង្គ្រាម ប៉ុន្តែ​មក​ដល់​ម៉ោងនេះ ប្រទេសយើងបានដើរលឿនជាងប្រទេសមួយចំនួន។

«នេះគឺជាមោទនភាពរបស់យើង ហើយកត្តាធំមួយទៀតនោះ គឺ​កត្តា​សុខ​សន្តិភាព និង​កត្តា​មនុស្ស​ដែលប្រព័ន្ធអប់រំរបស់យើងបានប្រមូលផ្ដុំធនធានមនុស្សដែលនៅសេសសល់ពីសង្គ្រាមមកជួយប​ណ្ដុះបណ្ដាល និងបានបញ្ជូនសិក្សានៅក្រៅប្រទេសមកដល់ពេលបច្ចុប្បន្ន»។ មក​ដល់​ម៉ោង​នេះ​ទាំង​ក្នុង​រាជ​រដ្ឋាភិបាល វិស័យឯកជន និងនៅវិស័យផ្សេងទៀត គឺខ្មែរយើងបានម្ចាស់ការដោយខ្លួនឯង៕