មុនបាត់ខ្លួន! នារីអង់គ្លេស បានប្រាប់ប្អូនស្រីខ្លួនអំពីអារម្មណ៍ពិត ពេលចូលរួមជប់លៀងនៅកោះរ៉ុង

2019-10-28 01:46:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នារីជនជាតិអង់គ្លេសមួយរូប ឈ្មោះ Amelia Bambridge វ័យ២១ឆ្នាំ បានបាត់ខ្លួន ក្រោយពេលចូលរួមពិធីជប់លៀងមួយនៅឆ្នេរកោះរ៉ុង (Police Beach) កាលពីព្រឹកទាបភ្លឺថ្ងៃទី២៤ ខែតុលា ឆ្នាំ២០១៩កន្លងទៅ។

ក្រោយការបាត់ខ្លួន ប្អូនស្រីបង្កើតរបស់ Amelia Bambridge ដែលមានឈ្មោះថា Georgie Bambridge (នៅអង់គ្លេស) វ័យ១៩ឆ្នាំ បានប្រាប់សារព័ត៌មាន The Guardian ថា នាងបាននិយាយទៅកាន់បងស្រី (អ្នកបាត់ខ្លួន) មុន Amelia ទៅចូលរួមពិធីជប់លៀងនេះ។

Georgie បានប្រាប់ឱ្យដឹងយ៉ាងដូច្នេះថា៖ «គាត់ (Amerlia) បានប្រាប់ខ្ញុំអំពីការធ្វើដំណើរ ដោយគាត់មានអារម្មណ៍ថាទុកចិត្ត និងសប្បាយខ្លាំង។ គាត់រំភើបក្រៃលែងដែលចូលរួមក្នុងពិធីជប់លៀងនេះ។ ឥឡូវបាត់ខ្លួនហើយ។ ប៉ូលិសចាប់ផ្តើមស្រាវជ្រាវលើអ្នកពាក់ព័ន្ធក្នុងពិធីជប់លៀងនេះ»។

Georgie បន្តទៀតថា បងស្រីខ្លួនមានគម្រោងធ្វើជាគ្រូបង្រៀនភាសាអង់គ្លេស នៅប្រទេសវៀតណាម ដែលឪពុកខ្លួន កំពុងធ្វើការនៅទីនោះផងដែរ។

សូមជម្រាបថា អាជ្ញាធរខេត្តព្រះសីហនុ ក្រោមការដឹកនាំបញ្ជាផ្ទាល់លោក គួច ចំរើន អភិបាលខេត្ត បានបើកប្រតិបត្តិការតាមស្វែងរកនារីជនជាតិអង់គ្លេសដែលបានបាត់ខ្លួនខាងលើនេះ កាលពីថ្ងៃទី២៧ ខែតុលា ឆ្នាំ២០១៩។

នៅចំពោះមុខនេះ លោកអភិបាលខេត្តបានដាក់បទបញ្ជាយ៉ាងម៉ឺងម៉ាត់ ឱ្យកម្លាំងគ្រប់ផ្នែកតាមរកនៅតាមទីតាំងផ្សេងៗ តាមដងព្រៃភ្នំ ដងព្រែក តាមឆ្នេរខ្សាច់ ឆ្នេរថ្ម នៅតាមកន្លែងស្នាក់នៅនានានៅលើកោះរ៉ុង និងកន្លែងដែលនារីនោះបានទៅលេងរួមទាំងក្រុមមុជទឹក(diving)ផង ធ្វើយ៉ាងណារកឱ្យអស់លទ្ធភាព។

បើតាមការបង្ហោះនៅលើផេកហ្វេសប៊ុករដ្ឋបាលខេត្តព្រះសីហនុ ឱ្យដឹងថា នារីដែលបាត់ខ្លួន មានឈ្មោះ BAMBRIDGE AMELIA LOUISE (ឬ Amelia Bambridge) កើតថ្ងៃទី១៤ ខែកក្កដា ឆ្នាំ១៩៩៨ សញ្ជាតិអង់គ្លេស កាន់លិខិតឆ្លងដែនលេខ ៥៣១៨៩០៨៣៣ បានចេញពីក្រុងព្រះសីហនុ ឆ្ពោះទៅគោលដៅក្រុងកោះរ៉ុង នៅម៉ោង៥:០០ល្ងាច ថ្ងៃទី១៩ ខែតុលា ឆ្នាំ២០១៩ មកដល់កោះរ៉ុងនៅម៉ោង៦:០០ល្ងាច។ នាងបានចូលស្នាក់នៅផ្ទះសំណាក់ Ness Beach នៅម៉ោង៨:១៥នាទីយប់ ថ្ងៃខែឆ្នាំដដែលក្នុងគោលបំណងទេសចរណ៍។

មុនបាត់ខ្លួនគេបានប្រទះឃើញនារីនោះលើកចុងក្រោយនៅម៉ោង៣:៣០នាទីទៀបភ្លឺ ឈានចូលថ្ងៃទី២៤ ខែតុលា ឆ្នាំ២០១៩ ក្នុងពិធីជប់លៀងមួយនៅឆ្នេរកោះរ៉ុង (Police Beach) ក្រោយមកក៏បាត់ដំណឹងតែម្តង។ សមត្ថកិច្ចមូលដ្ឋានបានរកឃើញកាបូប និងសម្ភារៈមួយចំនួនរបស់នាងនៅលើផ្ទាំងថ្មជាប់ឆ្នេរក្បែរកន្លែងធ្វើពិធីជប់លៀងនោះផងដែរ។ ករណីនេះ អាជ្ញាធរក្រុងកោះរ៉ុង បានព្យាយាមស្វែងរកនារីរងគ្រោះក្រោយទទួលដំណឹងភ្លាមៗពីការបាត់ខ្លួននេះ៕

ប្រភព៖ theguardian ប្រែសម្រួល៖ សំភី