សមាជច្របាច់បញ្ចូលគ្នារវាងគណបក្សហ៊្វុនស៊ិនប៉ិច និងគណបក្សខ្មែររួបរួមជាតិ នឹងធ្វើឡើងចុងខែនេះ
- 2019-11-04 03:23:43
- ចំនួនមតិ 0 | ចំនួនចែករំលែក 0
សមាជច្របាច់បញ្ចូលគ្នារវាងគណបក្សហ៊្វុនស៊ិនប៉ិច និងគណបក្សខ្មែររួបរួមជាតិ នឹងធ្វើឡើងចុងខែនេះ
ចន្លោះមិនឃើញ
គណបក្សហ៊្វុនស៊ិនប៉ិច និងគណបក្សខ្មែររួបរួមជាតិ នឹងធ្វើសមាជច្របាច់បញ្ចូលគ្នាទៅជាគណបក្សតែមួយនៅចុងខែវិច្ឆិកា ឆ្នាំ២០១៩ ខាងមុខនេះ។ ការច្របាច់បញ្ចូលគ្នារវាងគណបក្សរាជានិយមទាំងពីរនេះ គឺស្ថិតនៅក្រោមដំបូលគណបក្សហ៊្វុនស៊ិនប៉ិច។
តាមគម្រោងអង្គសមាជនឹងផ្តល់សេចក្តីទុកចិត្តលើសម្តេចក្រុមព្រះ នរោត្តម រណឫទ្ធិ ឲ្យធ្វើជាប្រធានគណបក្សហ៊្វុនស៊ិនប៉ិច។
លោក ញឹក ប៊ុនឆៃ ប្រធានគណបក្សខ្មែររួបរួមជាតិ ឱ្យដឹងថា បន្ទាប់ពីក្រុមការងារ នៃគណបក្សទាំងពីរជជែកពិភាក្សាគ្នារួចពីការបង្រួបបង្រួមគ្នា គឺសមាជផ្លូវការនៃការច្របាច់បញ្ចូលគ្នានឹងធ្វើនៅចុងខែវិច្ឆិកា ឆ្នាំ២០១៩ ខាងមុខនេះ។ ហើយទុកពេលឲ្យក្រុមការងារជជែកពិភាក្សាគ្នាសម្រេចពីរឿងរចនាសម្ព័ន្ធ គោលនយោបាយ រួចរាល់អស់ហើយ ទើបបានឈានដល់សមាជ។
លោកបានបញ្ជាក់ថា៖ «ការធ្វើសមាជច្របាច់បញ្ចូលគ្នានេះ គឺយើងធ្វើខុសពីបីដង។ លើកមុនយើងចែកកូតាគ្នា លើកនេះយើងបានដាក់គោលការណ៍ប្រាំយ៉ាង ហើយយើងមានក្រុមប្រឹក្សាវិន័យ យើងជាការសង្ឃឹមមួយជឿជាក់ថា វាមិនអាចបែកបាក់គ្នាទៀតទេ ព្រោះយើងមានលក្ខន្តិកៈ បទបញ្ជាផ្ទៃក្នុង»។
លោក ញឹក ប៊ុនឆៃ បានអះអាងថា នៅក្នុងការធ្វើសមាជនាពេលខាងមុខនេះ គឺនឹងថ្វាយតួនាទីប្រធានគណបក្សហ៊្វុនស៊ិនប៉ិច ដល់សម្តេចក្រុម ព្រះនរោត្តម រណរឫទ្ធិ ដើម្បីដឹកនាំ។ ចំពោះក្បាលម៉ាស៊ីនផ្សេងទៀត មិនទាន់សម្រេចនៅឡើយទេ ដោយទុកឲ្យក្រុមការងារជជែកគ្នា ប៉ុន្តែជាគោលការណ៍អនុប្រធានគណបក្សមានតែពីររូបទេ។
នៅមុនការធ្វើសមាជច្របាច់បញ្ចូលគ្នារវាងគណបក្សហ៊្វុនស៊ិនប៉ិច និងគណបក្សខ្មែររួបរួមជាតិ មេដឹកនាំនៃគណបក្សទាំងពីរ គឺសម្តេចក្រុមព្រះ នរោត្តម រណឫទ្ធិ និងលោកញឹក ប៊ុនឆៃ បានជួបគ្នា ដើម្បីជជែកពិភាក្សាអំពីការបង្រួបង្រួមរវាងគណបក្សរាជានិយមទាំងពីរឲ្យទៅជាគណបក្សតែមួយ ស្ថិតនៅក្រោមដំបូលគណបក្សហ៊្វុនស៊ិនប៉ិច កាលពីថ្ងៃទី៣០ ខែតុលា ឆ្នាំ២០១៩ នៅក្នុងភោជនីយ៍ដ្ឋានមួយក្នុងរាជធានីភ្នំពេញ។
នៅក្នុងជំនួបនេះ ភាគីទាំងពីរបានផ្តោតសំខាន់ទៅលើការបង្រួបបង្រួមគ្នាឡើងវិញរវាងអ្នករាជានិយម និងអ្នកសីហនុនិយមនៅក្នុងពេលឆាប់ៗខាងមុខនេះ។ ហើយបានសម្រេចបង្កើតគណៈកម្មការដោយម្ខាងមានសមាសភាពចំនួនបីរូប ដើម្បីពិនិត្យលក្ខន្តិកៈ និងបទបញ្ជាផ្ទៃក្នុង រួមទាំងគោលការណ៍មួយចំនួនទៀត ដើម្បីជៀសវាងកុំឲ្យបញ្ហាដូចលើកមុនៗ៕