មនុស្សកន្លះលាននាក់នៅស្រីលង្កា រងគ្រោះដោយទឹកជំនន់

2017-05-28 08:08:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមសង្គ្រោះបន្ទាន់ បានរូតរះទៅចែកចាយជំនួយនាថ្ងៃទី២៨ឧសភានេះ ដល់ប្រជាជនស្រីលង្កាជាង កន្លះលាននាក់ ដែលគ្មានទីជម្រក ដោយសារគ្រោះទឹកជំនន់ដ៏អាក្រក់បំផុត ក្នុងរយៈពេល ១៤ឆ្នាំមកនេះ។

ភ្លៀងធ្លាក់ខ្លាំង កាលពីថ្ងៃទី២៦ឧសភា បានបង្កជាទឹកជំនន់ និងការបាក់ដី ដ៏ធ្ងន់ធ្ងរបំផុត នៅភាគខាងត្បូង និងភាគខាងលិចស្រីលង្កា បណ្តាលឱ្យមនុស្សយ៉ាងហោច ១២៦នាក់ បានស្លាប់ និងអ្នកបាត់ខ្លួន មានការកើនឡើង។ មកដល់ថ្ងៃអាទិត្យនេះ ទឹកជំនន់ បានស្រកហើយនៅតាមតំបន់មួយចំនួន ដែលបង្កការងាយស្រួលដល់អាជ្ញាធរ ក្នុងការចែកជំនួយដល់ជនរងគ្រោះ។

រដ្ឋមន្រ្តីសុខាភិបាលស្រីលង្កា លោក Rajitha Senaratne បានឱ្យដឹងថា ក្រុមគ្រូពេទ្យ ត្រូវបានបញ្ជូនទៅកាន់តំបន់ដែលរងគ្រោះធ្ងន់ធ្ងរបំផុត ដើម្បីទប់ស្កាត់ ការកើតឡើងនូវជំងឺនានា។

លោកនិយាយថា ជនរងគ្រោះភាគច្រើន ត្រូវបានស្លាប់ នៅពេលមានភ្នំបាក់សង្កត់មកលើផ្ទះប្រជាជន។ ជិត ៥០ម៉ឺននាក់ ត្រូវបង្ខំចិត្តជម្លៀសចេញពីផ្ទះពួកគេ ដោយរើទៅនៅក្នុងជម្រកបណ្តោះអាសន្ន៕

សូមអានអត្តបទពាក់ព័ន្ធ៖ ទឹកជំនន់នៅស្រីលង្កា ស្លាប់ ៩១នាក់ និងបាត់ខ្លួនជាង ១០០នាក់

ប្រភព៖ Channelnewsasia ប្រែសម្រួល៖ សំភី