ទឹកជំនន់សម្លាប់មនុស្សជាង ១៨០នាក់ហើយនៅស្រីលង្កា

2017-05-29 23:41:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពីម្សិលមិញ កងទ័ពរបស់ស្រីលង្កាជិត ៣ពាន់នាក់ បានចេញប្រតិបត្តិការជួយសង្គ្រោះ ដើម្បីបញ្ជូនសម្ភារៈ និងស្បៀងអាហារដើម្បីផ្គត់ផ្គង់មនុស្សជាងកន្លះលាននាក់ ដែលបានជម្លៀសចេញពីផ្ទះរបស់ពួកគេ ក្រោយពីទឹកជំនន់ដែលបានសម្លាប់ប្រជាពលរដ្ឋស្រីលង្កាយ៉ាងហោចណាស់ ១៨០នាក់។

ប្រជាពលរដ្ឋស្រីលង្កាលើសពី ៥៥ម៉ឺននាក់ បានបោះបង់ផ្ទះសំបែងរបស់ពួកគេ ដោយសារជំនន់ទឹកភ្លៀង ដែលបានបង្កជាការរអិលបាក់ដី នៅផ្នែកមួយចំនួនស្ថិតនៅភាគនិរតីប្រទេសនេះ។ មជ្ឈមណ្ឌលគ្រប់គ្រងគ្រោះមហន្តរាយ បានអះអាងថា មនុស្ស ១១០នាក់ បានបាត់ខ្លួន។ ចំណែកផ្ទះ ៥៥០០ខ្នង បានទទួលរងការខូចខាត ឬ ត្រូវបានបំផ្លាញទាំងស្រុង។

ប្រទេសឥណ្ឌា បានបញ្ជូននាវារបស់ខ្លួនចំនួន ២គ្រឿង ដោយដឹកគ្រឿងសម្រាប់ផ្គត់ផ្គង់ផ្សេងៗជូនដល់ពលរដ្ឋរងគ្រោះដោយទឹកជំនន់នៅស្រីលង្កា កាលពីថ្ងៃចុងសប្ដាហ៍កន្លងទៅ ខណៈ UN បានប្រកាសបរិច្ចាគធុងដាក់ទឹក ឧបករណ៍ចម្រោះទឹកស្អាត និងតង់។ ចំណែក អង្គការសុខភាពពិភពលោក នឹងបញ្ជូនក្រុមគ្រូពេទ្យទៅតំបន់ដែលប៉ះពាល់។ រីឯជប៉ុន បានសន្យាថា នឹងផ្ដល់ម៉ាស៊ីនភ្លើងចល័តផងដែរ។

នេះជាជំនន់ដ៏អាក្រក់មួយនៅស្រីលង្កា ដែលមិនធ្លាប់មានក្នុងរយៈពេល ១៤ឆ្នាំកន្លងទៅ។ កាលពីឆ្នាំ២០០៣ មនុស្ស ២៥០នាក់បានស្លាប់ ហើយផ្ទះជាង ១ម៉ឺនខ្នងត្រូវបំផ្លាញដោយសារទឹកជំនន់ស្រដៀងគ្នានេះ៕

ប្រភព៖ Channelnewsasia ប្រែសម្រួល៖ លាភ.