ស្ថិត​ក្នុង​កម្មវិធី​ទូរទស្សន៍ "Idol Drama Operation Team" កាល​ពី​ពេល​ថ្មីៗ ក្រុម​តារា​ស្រី​កូរ៉េ បាន​ជជែក​គ្នា​អំពី រឿងរ៉ាវ​មុន​នឹង​ខ្លួន​អាច​ក្លាយ​ជា​តារា K-Pop បាន។ ក្នុង​នោះ តារា​ចម្រៀង D.ana សមាជិក​ក្រុម SONAMOO រៀបរាប់​ថា មុន​នឹង​អាច​ឈរ​ជើង​ជា​តារា​បាន នាង​ត្រូវ​ចូលរួម​ហ្វឹកហាត់​ជា​សិក្ខាកាម​ឲ្យ​ផលិតកម្ម​ជា​មុន​សិន។

D.ana បន្ត​ថា គ្រប់​សិក្ខាកាម​ទាំង​អស់​មិន​អាច​ត្រឡប់​ទៅ​ផ្ទះ និង​មិន​អាច​សម្រាក​បាន​ទេ ទាល់​តែ​ផែនការ​បញ្ចុះ​ទម្ងន់​របស់​ពួកគេ​ទទួល​បាន​ជោគជ័យ។ ៥​ក្នុង​ចំណោម​១០​នាក់ ត្រូវ​បាន​ដេញ​ចេញ​ពី​ក្រុមហ៊ុន ព្រោះ​មិន​អាច​បំពេញ​តម្រូវ​ការ​របស់​ផលិតកម្ម​បាន ក្នុង​ការ​សម្រក​ទម្ងន់។ តារា K-Pop រូប​នេះ បញ្ជាក់​ទៀត​ថា ការ​បណ្ដេញ​ចេញ​នេះ មិន​ផ្ដោត​សំខាន់​លើ​ទេពកោសល្យ ឬ​ក៏​សម្រស់​ស្អាត​ឡើយ ពោល​គឺ​ឲ្យ​តែ​មិន​អាច​ស្រក​ទម្ងន់​ដល់​គោលដៅ គឺ​ផលិតកម្ម​ចាត់​ទុក​ថា​ជា​ចំណុច​ខ្សោយ​ហើយ៕