Foxsport Asia សរសើរអ្នកគាំទ្រក្រុមគោព្រៃកម្ពុជា

2017-06-14 06:40:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សារព័ត៌មានល្បីលើពិភពលោក Foxsport Asia បានចុះផ្សាយនៅថ្ងៃទី១៤ ខែមិថុនានេះ ដោយកោតសរសើរពីទឹកចិត្តអ្នកគាំទ្រកម្ពុជា ដែលមិនចេះសាបរលាប ទោះបីជាក្រុមគោព្រៃកម្ពុជា ធ្វើពុំសូវបានល្អ ប្រហែល ១០ប្រកួតចុងក្រោយកន្លងទៅក៏ដោយ។ ប្រភពដដែលបានប្រើប្រាស់ពាក្យ ៣ ដើម្បីពិពណ៌នាពីអ្នកគាំទ្រក្រុមគោព្រៃ គឺ "ការអត់ធ្មត់, ចំណង់ចំណូលចិត្ត និង ការស្នេហាជាតិ"។

បន្ទាប់ពីបរាជ័យចំនួន ៨ប្រកួតជាប់ៗគ្នា ពោលគឺចាញ់ ម៉ាឡេស៊ី សិង្ហបុរី មីយ៉ាន់ម៉ា ឥណ្ឌា ឥណ្ឌូណេស៊ី និងក្រុមមួយចំនួនទៀត ក្រុមជម្រើសជាតិកម្ពុជា បានបញ្ចប់សុបិនដ៏អាក្រក់របស់ខ្លួន ដោយយកឈ្នះក្រុមអាហ្វហ្គានីស្ថាន ក្នុងវគ្គជម្រុះ AFC Asian Cup ។ សម្រាប់អ្នកគាំទ្រវិញ ថ្វីបើក្រុមជម្រើសជាតិធ្វើពុំសូវបានល្អក្នុងប៉ុន្មានប្រកួតចុងក្រោយ ក៏នៅតែបន្តទៅគាំទ្រពេញពហុកីឡដ្ឋានជាតិ សម្រាប់ជំនួបកាលពីម្សិលមិញ។

អ្នកគាំទ្រជាង ៥ម៉ឺននាក់ បានចូលរួមទស្សនារៀងរាល់ការប្រកួតរបស់ក្រុមគោព្រៃកម្ពុជា។ Foxsport បានប្រៀបធៀបទឹកចិត្តនេះ ទៅនឹងទឹកចិត្តអ្នកគាំទ្រក្រុមជប៉ុន ចិន និងឥណ្ឌូណេស៊ី ជាដើម ដែលតែងតែបន្លឺជាសំឡេងច្រៀង ឲ្យឮខ្ទរខ្ទារក្នុងកីឡដ្ឋានរបស់ពួកគេ រៀងរាល់ការប្រកួត។

កម្ពុជា ត្រូវមានភារកិច្ចធំមួយក្នុងការរក្សាចំណាត់ថ្នាក់ទី២ ប្រចាំពូល C វគ្គជម្រុះ AFC Asian Cup 2019 ដោយក្រុមគោព្រៃជាក្រុមក្មេងខ្ចី ពិបាកក្នុងការប្រជែងជាមួយវៀតណាម ដែលជាក្រុមខ្លាំងមួយក្នុងពូលផងដែរ។ យ៉ាងណាមិញ ២ប្រកួតកន្លងទៅ វៀតណាមមិនទាន់ស្គាល់ពាក្យថាឈ្នះនោះទេ ពោលគឺស្មើទាំងពីរប្រកួត។ ដូច្នេះការប្រកួតជាមួយវៀតណាម ក្នុងនិងក្រៅដី អាចជាការសម្រេចជោគវាសនារបស់ក្រុមកម្ពុជា ដើម្បីក្ដីសង្ឃឹមឈានទៅព្រឹត្តិការណ៍ AFC Asian Cup នាឆ្នាំ២០១៩ ដែលអារ៉ាប់រួម ជាម្ចាស់ផ្ទះ។

កម្ពុជា នឹងទទួលក្រុមភ្ញៀវវៀតណាម នៅក្នុងជំនួបទី៣របស់ខ្លួន នាខែកញ្ញា ហើយធ្វើដំណើរទៅលេងក្នុងទឹកដីវៀតណាមវិញ នៅក្នុងខែតុលា ឆ្នាំ២០១៧៕

អត្ថបទទាក់ទង

គ្រូបង្វឹកក្រុមគោព្រៃ៖ គ្មានអ្វីអាចទិញក្រុមនេះបានឡើយ

ប្រភព៖ Fox Sports Asia ប្រែសម្រួល៖ លាភ.