ជនជាតិដើមភាគតិច ស្នើឲ្យពន្យាពេលសាកល្បងទំនប់វារីអគ្គិសនីសេសានក្រោម២

2017-07-14 09:14:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កញ្ញាជឿន ស្រីមុំ ជនជាតិដើមពូនង និងជាតំណាងសហគមន៍ភូមិក្បាលរមាស បានស្នើសុំរដ្ឋាភិបាល និងក្រុមហ៊ុនម្ចាស់ទំនប់សេសានក្រោម២ ពន្យារពេលប្រតិបត្តិការសាកល្បងទួរបីនទី១ ដែលគ្រោងនឹងធ្វើឡើងនៅថ្ងៃទី១៥ ខែកក្កដាស្អែកនេះ។ សំណើនេះ ធ្វើឡើងក្នុងសន្និសីទព័ត៌មានកាលពីថ្ងៃព្រហស្បតិ៍ម្សិលមិញ ស្តីពីគម្រោងសាកល្បងទំនប់នេះ។

កញ្ញា ជឿន ស្រីមុំ បានស្នើសុំទុកពេល១ខែឱ្យពលរដ្ឋម្ចាស់ស្រុកធ្វើការរុះរើសម្ភារៈ និងស្នើឲ្យមានការស្រង់ទិន្នន័យនៃទ្រព្យសម្បត្តិរបស់គ្រួសារនីមួយៗជាលក្ខណៈសហគមន៍ប្រកបដោយតម្លាភាព។

កញ្ញា ជឿន ស្រីមុំ (ស្តាំ) តំណាងពលរដ្ឋសហគមន៍ក្បាលរមាស

តំណាងសហគមន៍រូបនេះ ក៏បានអំពាវនាវឲ្យមានជំនួយសប្បុរសធម៌ពីកាកបាទក្រហមកម្ពុជា ដោយផ្តល់សម្ភារៈផ្សេងៗ ដូចជាធុងទឹក និងថ្នាំពេទ្យ ដើម្បីជួយដល់ការរុះរើសម្ភារៈទៅកាន់ទីទួលសុវត្ថិភាពផងដែរ។

តាមទិន្នន័យផ្តល់ដោយវេទិកានៃអង្គការមិនមែនរដ្ឋាភិបាលស្តីពីកម្ពុជាហៅកាត់អង្គការ NGO Forum មានសហគមន៍ចំនួនពីរគឺសហគមន៍ភូមិស្រែគរ និងសហគមន៍ភូមិក្បាលរមាស មិនព្រមចាកចេញទីភូមិដ្ឋានដើមរបស់ខ្លួនទៅកាន់ទីតាំងថ្មីទេ។ ប្រជាពលរដ្ឋដែលរងផលប៉ះពាល់ពីទំនប់សេសានក្រោម២ក្នុងភូមិចំនួនពីរនោះគឺមានចំនួន៧០០នាក់ ដែលស្មើនិង១៨០គ្រួសាររស់នៅក្នុងផ្ទះចំនួន១៤០ខ្នង។

លោក ដួង ពៅ អភិបាលរងខេត្តស្ទឹងត្រែង ថ្លែងប្រាប់ VOA ថា អាជ្ញាធរមិនបានតៀមជួយសម្រួលប្រជាពលរដ្ឋដែលមិនព្រមចាកចេញពីលំនៅឋានចាស់ឲ្យទៅជ្រកលើទីទួលសុវត្ថិភាពណានោះទេ ដោយសារតែរដ្ឋាភិបាល និងក្រុមហ៊ុនបានរៀបចំលំនៅឋានថ្មី ដែលមានដីស្រែ និងដីដែលត្រូវប្រើទៅតាមទំនៀមទម្លាប់ចាស់របស់ពលរដ្ឋ។ លោកបញ្ជាក់បន្ថែមថា គ្មានការពន្យារពេលនៃការសាកល្បងបិទទ្វារទឹកទី១នៃទំនប់សេសាននេះទេ៕

ប្រភព៖ VOA News ប្រែសម្រួល៖ សំភី