ស្ទឹងត្រែងជាខេត្តសម្បូរត្រី តែពេលនេះកំពុងជួបបញ្ហាខ្សត់ត្រី ដោយសារ...
- 2017-07-21 02:01:58
- ចំនួនមតិ 0 | ចំនួនចែករំលែក 0
ស្ទឹងត្រែងជាខេត្តសម្បូរត្រី តែពេលនេះកំពុងជួបបញ្ហាខ្សត់ត្រី ដោយសារ...
ចន្លោះមិនឃើញ
ខេត្តស្ទឹងត្រែងជាខេត្តដ៏សំបូរត្រី ប៉ុន្តែចាប់ពីពាក់កណ្តាលខែកក្កដានេះ ត្រីចាប់ផ្តើមខ្សត់ទៅៗ អ្នកនេសាទរកនេសាទលែងបាន ធ្វើឲ្យតម្លៃក៏ចេះតែឡើងថ្លៃ រហូតធ្វើឱ្យអ្នកទិញប្តូរចិត្តទិញសាច់ជំនួសវិញ។
អ្នកស្រី ស្រៀង មានមុខរបរលក់ត្រី បានឱ្យដឹងថា ពេលអ្នកនេសាទរកត្រីលែងបាន អ្នកខ្លះគេយកផ្អកប្រហុក និងត្រីប្រៃ មកលក់គ្រាន់ដោះដូរម្ហូបទិញស្ករអំបិលប៊ីចេង។ រាល់ថ្ងៃឃើញមានតែប្រភេទត្រីព្រួល និងត្រីកែប៉ុណ្ណោះ។ ត្រីព្រួលមួយក្បាលដែលសម្បូរចុងរដូវនេះ មានតម្លៃចាប់ពី ១ម៉ឺនរៀលទៅ ២ម៉ឺនរៀលក្នុង១គីឡូក្រាម។ ថ្ងៃណាត្រីសម្បូរ ក៏ធ្លាក់ថ្លៃបន្តិច តែបើចំថ្ងៃខ្សត់ត្រី នឹងឡើងថ្លៃចាប់ពី២ទៅ ៣ម៉ឺនរៀលក្នុង១គីឡូក្រាម។
លោក ទុំ នីរ៉ូ ប្រធានរដ្ឋបាលជលផលខេត្តស្ទឹងត្រែងបានឲ្យដឹងថា ចាប់ពីពាក់កណ្ដាលខែកក្កដា ដល់ខែតុលា ត្រីនឹងលែងសម្បូរទៀតហើយ ដោយសារទឹកទន្លេបានជន់ឡើងនារដូវវស្សានេះ។ ត្រីក៏បានផ្លាស់ទី រកកន្លែងបន្តពូជនៅតាមព្រៃលិចទឹក ប្រឡាយអូរ ថ្លុក ត្រពាំងជាដើម។
លោកប្រធានរដ្ឋបាលជលផលខេត្តរូបនេះ បានបន្ថែមថា ម្យ៉ាងទៀត រដូវខ្សត់ត្រីនេះ ក៏ចំពេលវាពងកូនបន្តពូជនៅតាមតំបន់ព្រៃលិចទឹកផងដែរ។ លុះដល់រដូវទឹកសម្រកចាប់ពីខែធ្នូ និងមករាតទៅ អ្នកនេសាទនឹងចាប់ផ្ដើមរកត្រីបានម្ដងទៀត៕