បង្ក្រាបគ្រឿងញៀន ៦ខែ ចាប់បានជិត ១ម៉ឺននាក់ហើយ

2017-07-25 03:49:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

របាយការណ៍បូកសរុបសភាពការណ៍សន្តិសុខរបស់ប៉ូលិស រយៈពេល ៦ខែ ក្នុងឆ្នាំ២០១៧ បង្ហាញថា ក្នុងឆមាសទី១នេះ រាជរដ្ឋាភិបាល បានដាក់ចេញនូវផែនការប្រយុទ្ធប្រឆាំងគ្រឿងញៀនខុសច្បាប់ លើកទី១ ដែលជាលទ្ធផលបង្ក្រាបបាន ៤១៥៥ លើក ចាប់ខ្លួន ៩២៩៨ នាក់ (ស្ត្រី ៩២៧ នាក់ )។

របាយការណ៍ ដែលបានប្រជុំផ្សព្វផ្សាយកាលពីព្រឹកថ្ងៃទី២៤ ខែកក្កដា ឆ្នាំ២០១៧ បង្ហាញថា ក្នុងចំណោមបទល្មើសគ្រឿងញៀន ៤១៥៥ លើកនោះ គឺនគរបាលបង្ក្រាបបានចំនួន ២៩៤៩ លើក ឃាត់ខ្លួន ៦៥៣៨ នាក់ (ស្រី ៦៨៩ នាក់ ) និងអនុវត្តដីកា ១១៩ ដីកា ឃាត់ខ្លួន ១១៤ នាក់ (ស្រី ៨នាក់) ក្នុងនោះ មានជនបរទេស ១៣៦ នាក់ (ស្រី ៤៤នាក់)។

របាយការណ៍ដដែល ក៏បានបង្ហាញថា យុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី១ រយៈពេល ៦ខែនេះ ប៉ូលិសបានចាប់យកវត្ថុតាង រួមមាន សារធាតុញៀនគ្រប់ប្រភេទសរុប ១០៣,៨៣ គីឡូក្រាម ដើមកញ្ឆា ២៦២០៣ ដើម កញ្ឆាក្រៀម ២២៣,១៧ គីឡូក្រាម ប្រេងម្រះព្រៅ ៩៥ គីឡូក្រាម អាវុធវែង ២ ដើម អាវុធខ្លី ៨ ដើម រថយន្ត ១៨ គ្រឿង ម៉ូតូ ៥៤៦ គ្រឿង ជញ្ជីងថ្លឹង ១០០ គ្រឿង និងឧបករណ៍វេចខ្ចប់មួយចំនួនទៀត។ វត្ថុតាង និងជនល្មើស ត្រូវបានបញ្ជូនទៅតុលាការសាលាដំបូងរាជធានី-ខេត្ត ដើម្បីផ្ដន្ទាទោសតាមច្បាប់។

របាយការណ៍ក៏បានកត់សម្គាល់ថា ករណីចរាចរជួញដូរគ្រឿងញៀនធំៗ ដែលត្រូវបានបង្ក្រាបក្នុងឆមាសទី១ ឃាត់ខ្លួន ៣១ នាក់ (ស្រី ៧នាក់) ចាប់យកសារធាតុញៀនសរុប ៩៨ គីឡូក្រាម ៤៤៧ ក្រាម។

របាយការណ៍នេះបានលើកបង្ហាញថា ការលួចដឹកជញ្ជូនសារធាតុញៀន ចូលមកកម្ពុជា នៅតែមានសកម្មភាពទាំងផ្លូវគោក និងផ្លូវអាកាស ពិសេសពីតំបន់ត្រីកោណមាស ឆ្លងកាត់ប្រទេសឡាវ ចូលមកកម្ពុជា តាមច្រករបៀងព្រំដែននៃខេត្តព្រះវិហារ និងស្ទឹងត្រែង ដើម្បីចរាចរ ជួញដូរក្នុងប្រទេស និងវេចខ្ចប់ ដឹកជញ្ជូនបន្តទៅបណ្ដាប្រទេសជិតខាង និងក្នុងតំបន់៕

អត្ថបទ៖ លាភ.