ពងទាកូនស្រែរនោង លក់បាន១០ម៉ឺនគ្រាប់ ក្នុង១ថ្ងៃ រកចំណូលបានជាង១ម៉ឺនដុល្លារ

2017-07-26 11:53:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក សូត សុផល ហៅ ម៉ុញ ប្រធានសមាគមអាជីវកម្មពងទាកូនស្រែរនោង បានឲ្យដឹងថា ពងទាកូនស្រែរនោង ភូមិសាមគ្គី ឃុំស្រែរនោង ស្រុកត្រាំកក់ ខេត្តតាកែវ មានរសជាតិឈ្ងុយឆ្ងាញ់ ដែលជាផលិតផលមួយកំពុងល្បីល្បាញ ហើយត្រូវបានភ្ញាស់ចេញពីស្នាដៃកសិករពិតៗ នៅក្នុងភូមិសាមគ្គី។

លោកបន្តថា សមាគមពងទាកូនស្រែរនោង បានបង្កើតឡើង នៅថ្ងៃទី២៩ ខែសីហា ឆ្នាំ២០១៦ ក្រោមការសិក្សាស្រាវជ្រាវ និងរៀបចំបង្កើតដោយក្រសួងពាណិជ្ជកម្ម ហើយចាប់ពីពេលបង្កើតមក សមាគម បានផ្តល់អត្ថប្រយោជន៍ជាច្រើនដល់សមាជិក ជាមួយនឹងការភ្ញាស់ពងទាកូនកាន់តែច្រើន ការជួយរកទីផ្សារ ការរក្សានូវតម្លៃកើនឡើង។ សមាគមរក្សាបាននូវសាមគ្គីភាព និងទទួលខុសត្រូវកាន់តែខ្ពស់នូវការរក្សាគុណភាព ជាពងទាកូនស្រែពិតៗ មិនមានការក្លែងបន្លំនៅលើទីផ្សារឡើយ។

លោក សូត សុផល បានបញ្ជាក់ទៀតថា នៅភូមិសាមគ្គី មានឡ សម្រាប់ភ្ញាស់ ចំនួន ១៩ ឡ ក្នុងមួយឡៗ អាចផ្ទុកបានចំនួន ១០ម៉ឺនកូន។ បច្ចុប្បន្ននេះ ពងទាកូនស្រែរនោង លក់ពាសពេញប្រទេស លើកលែងតែខេត្ត ៤ គឺព្រៃវែង ស្វាយរៀង រតនគិរី និងមណ្ឌលគិរី ហើយលក់បាន ១០ ម៉ឺនពងទា ក្នុង ១ថ្ងៃ ដោយចែកជាពងទាសាបចំនួន ៤ ម៉ឺន ពងទាកូនចំនួន ៦ ម៉ឺន និងលក់កូនទាពី ៣ ពាន់ ទៅ ៥ ពាន់ក្បាល។

លោកប្រធានសមាគមបន្តថា គុណភាពពងទាកូនស្រែរនោង ខុសប្លែកពីកន្លែងដទៃ ដោយសារតែរសជាតិឆ្ងាញ់ ព្រោះទាចិញ្ចឹមជាលក្ខណៈធម្មជាតិសុទ្ធសាធ (ស៊ីស្រូវ និងមានទឹកលេង) មិនឆ្អាបខ្នើយ (ផ្នែកសក្នុងពងទា) មិនរឹង គ្រប់ថ្ងៃ ១៩ ថ្ងៃ។

លោក សូត សុផល បានបញ្ជាក់ថា ពងទាកូន១ លក់ក្នុងតម្លៃ ៤៥០ រៀល ទៅ ៥៥០ រៀល។ ដូច្នេះបើ ១ថ្ងៃ សមាគមពងទាកូនស្រែរនោង លក់បាន ១០ម៉ឺនគ្រាប់ គឺទទួលបានចំណូលចន្លោះពី ៤៥ លានរៀល ទៅ ៥៥ លានរៀល ដែលស្មើនឹងជាង ១ម៉ឺនដុល្លារ ក្នុង ១ថ្ងៃ៕