គួរធ្វើរឿងទាំងនេះ បើចង់មានផ្ទះនៅមុនអាយុ ៣០ឆ្នាំ
- 2017-12-05 07:13:00
- ចំនួនមតិ 0 | ចំនួនចែករំលែក 0
គួរធ្វើរឿងទាំងនេះ បើចង់មានផ្ទះនៅមុនអាយុ ៣០ឆ្នាំ
ចន្លោះមិនឃើញ
មនុស្សគ្រប់រូបត្រូវការផ្ទះជាជម្រកដ៏សំខាន់ ជាពិសេសនោះអ្នកទើបមានគ្រួសារថ្មីថ្មោង ប្រាកដណាស់ថានឹងចង់បានផ្ទះរស់នៅផ្ទាល់ខ្លួនមួយ។ តែសម្រាប់អ្នករៀបការមានវ័យក្រោម ៣០ឆ្នាំ ចង់បានលំនៅដ្ឋានទាំងដែលចំណូលពូកគេនៅមានកម្រិត ខណៈតម្លៃផ្ទះក្នុងពេលបច្ចុប្បន្នភាគច្រើនមិនក្រោម ៣ ម៉ឺនដុល្លារនោះទេ។
ថ្ងៃនេះ Kley Kley នឹងនាំយកអ្នកជំនាញខាងអចលនទ្រព្យ លោក គីម ហ៊ាង ចែករំលែកចំណេះដឹងដើម្បីទិញផ្ទះឲ្យបានមុនវ័យ ៣០ឆ្នាំ តើត្រូវធ្វើដូចម្ដេចខ្លះ?
១. ជៀសវាងធ្វើការងារណាស្រួលៗ
លោក គីម ហ៊ាង លើកឡើងថា មានមនុស្សមួយចំនួនតែងតែចូលចិត្តធ្វើអ្វីដែលស្រួលនឹងចង់បានផលហុចត្រឡប់មកវិញល្អដូចដែលខ្លួនរំពឹងទុក។ តែលទ្ធផលនៃការរំពឹងទុកនោះនឹងមិនអាចសមបំណងឡើយ ប្រសិនបើការខិតខំរបស់អ្នកបណ្តោយតាមកាលៈទេសៈ និងព្រេងវាសនា ។ បើសិនជាលោកអ្នកចង់បានផ្ទះស្នាក់នៅមុនអាយុ ៣០ឆ្នាំ លោកអ្នកត្រូវខំធ្វើការឲ្យអស់ពីលទ្ធភាព ពោលគឺកុំខំលំៗ និងកុំធ្វើការងារណាដែលស្រួលៗដើម្បីប្រាក់ខែ ប៉ុន្តែគួរធ្វើការដើម្បីចំណឹងដឹង និងអភិវឌ្ឍខ្លួនឯង។
២. ធ្វើការ កុំគិតថ្ងៃសៅរ៍ អាទិត្យ
មនុស្សគ្រប់រូបសុទ្ធតែមានពេលវេលា ២៤ ម៉ោងដូចគ្នា ដើម្បីបំពេញកាតព្វកិច្ច និងពេលវេលាសម្រាកសម្រាប់ខ្លូនឯង ហើយមានមនុស្សមួយចំនួនតែងត្អួញត្អែរថាពេលវេលាដើរលឿនណាស់ទាំងដែលខ្លួនមិនទាន់សម្រេចបានអ្វីជាដុំកំភួននោះនៅឡើយទេ។ បើចង់មានលទ្ធភាពទិញផ្ទះស្នាក់នៅឲ្យបានសមរម្យត្រូវតែខំធ្វើការ កុំគិតពីថ្ងៃឈប់សម្រាក ពោលគឺបើសិនជាធ្វើការចង់សម្រាកថ្ងៃសៅរ៍ ថ្ងៃអាទិត្យ ឬ ថ្ងៃបុណ្យទាននោះ ចំណូលរបស់អ្នកក៏សម្រាកតាមនោះដែរ។ អ្នកជំនាញខាងលើបានបញ្ជាក់យ៉ាងដូច្នេះថា អ្នកដែលជោគជ័យភាគច្រើនគឺសុទ្ធសឹងតែជាអ្នកដែលធ្វើការមិនគិតសៅរ៍អាទិត្យ និងថ្ងៃបុណ្យទាននោះឡើយ។
៣. ធ្វើការផង វិនិយោគផង
ប្រសិនបើអ្នកមានចំណូលមធ្យមចុះ ប្រាក់ខែតែមួយមុខមិនអាចធ្វើឲ្យអ្នកអាចមានលទ្ធផលគ្រប់គ្រាន់ដើម្បីទិញផ្ទះបានមុនអាយុ៣០ឆ្នាំនោះទេ ដូច្នេះ លោកអ្នកត្រូវចេះមានគំនិតវិនិយោគផងទើបជាការប្រសើរ ដើម្បីអាចរកបានប្រាក់ចំណូលបានបន្ថែមជាបន្ទាប់បន្សំ។ លោកគីម ហ៊ាងបានបញ្ជាក់ថា “មិនចាំបាច់ទាល់តែបើកក្រុមហ៊ុន ទើបហៅថាការវិនិយោគនោះទេ កំពុងធ្វើការក៏អាចរកស៊ីបានដែរ”។ លោកលើកឧទាហរណ៍ថា ប្រសិនបើគូស្រករ (ប្តីនិងប្រពន្ធ) អាចធ្វើការទទួលបានប្រាក់ខែ ១ពាន់ដុល្លារ ពួកគាត់អាចមានលទ្ធភាពបង់រំលោះ ៣ទៅ៤ រយដុល្លារក្នុងមួយខែ ទៅលើការវិនិយោគលើអចលនទ្រព្យ ឬក៏វិនិយោគរកស៊ីលើវិស័យអ្វីផ្សេងទៀត ដើម្បីផ្សែផ្សំប្រាក់ចំណូលបន្ថែម។
៤. ទិញបង់រំលស់ជាជម្រើសល្អ
ការបង់រំលស់ជាវិធីល្អ ហើយក៏អាចជាវិធីអាក្រក់ដែរ ប្រសិនបើលោកអ្នកត្រួតពិនិត្យខ្ទង់ចំណាយមិនបានត្រឹមត្រូវ។ យ៉ាងណាលោក គីម ហ៊ាង ពន្យល់ថា ការចំណាយដើម្បីបង់រំលស់គឺត្រូវទិញតាមរូបមន្ត មានន័យថា ប្រសិនបើចង់ទិញផ្ទះបង់រំលស់ក្នុងមួយខែ ១៧៥ ដុល្លារ អ្នកទិញ គឺតម្រូវឲ្យមានប្រាក់ខែចាប់ពី ៥០០ ដុល្លារឡើង ហើយបើសិនបង់រំលស់ក្នុងមួយខែ ៣០០ ដុល្លារ តម្រូវឲ្យអ្នកទិញមានប្រាក់ខែ ៩០០ ដុល្លារ និងការបង់រំលស់ចាប់ពី ៤០០ដុល្លារឡើង គឺមានត្រូវមានប្រាក់ខែចាប់ពី ១ ពាន់ដុល្លារឡើងទៅ។ សូមបញ្ជាក់ថា ជាទូទៅការបង់រំលស់ គឹត្រូវបង់៣៥% នៃប្រាក់ខែរបស់អ្នកដែលមាន៕