តើតាស៊ីក្លូទទួលបានអ្វីខ្លះហើយមកដល់ពេលនេះ?

2018-01-26 10:11:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើគិតចាប់ពីថ្ងៃដែលប្រមុខរាជរដ្ឋាភិបាល សម្ដេច ហ៊ុន សែន ប្រកាសបង្កើតមូលនិធិទ្រទ្រង់ និងអភិរក្សស៊ីក្លូ ថ្ងៃទី៣ ខែមករា រហូតមកដល់ថ្ងៃនេះ តើអ្នកធាក់ស៊ីក្លូទទួលបានអ្វីខ្លះពីមូលនិធិនេះ?

ប្រធានសមាគមអភិរក្សស៊ីក្លូ និងមុខរបរក្រៅប្រព័ន្ធ លោក អ៊ឹម សម្បត្តិ បានលើកឡើងថា រហូតមកដល់ថ្ងៃនេះ អ្នកធាក់ស៊ីក្លូចំនួន ៣០៨នាក់បានទទួលប័ណ្ណ និងប្រាក់ឧបត្ថម្ភពីមូលនិធិទ្រទ្រង់ និងអភិរក្សស៊ីក្លូដែលបង្កើតឲ្យរាជរដ្ឋាភិបាលរួចហើយ។ ចំនួននេះនឹងកើនបន្ថែមទៀតនៅពេលខាងមុខ។

ប្រាក់ឧបត្ថម្ភសម្រាប់អ្នកធាក់ស៊ីក្លូនេះ បើក៣ដងក្នុងមួយខែដោយកំណត់ថ្ងៃទី១០ ទី២០ និងថ្ងៃទី៣០ គ្រប់ខែទាំងអស់។ ប្រាក់ដែលអ្នកធាក់ស៊ីក្លូទទួលបានមួយថ្ងៃគឺ៧ពាន់រៀល ដោយគិតលុយថ្ងៃបាយ៥ពាន់រៀល និង២ពាន់រៀលថ្លៃជួលស៊ីក្លូ។ ប្រាក់ ឧបត្ថម្ភពីមូលនិធិគឺត្រូវបានដាក់បញ្ចូលក្នុងគណនីវីងទាំងអស់។ លោក អ៊ឹម សម្បត្តិ បន្ថែមថា រហូតមកដល់ពេលនេះចំនួនអ្នកធាក់ស៊ីក្លូមានការកើនឡើងច្រើនជាងមុន ចំនួននេះអាចនឹងកើនពី ៣០ ទៅ ៤០នាក់បន្ថែមលើចំនួនចាស់ ហើយអ្នកទាំងនោះគឺជាអតីតអ្នកធាក់ពីមុនសឹងទាំងអស់។

ប្រធានសមាគមរូបនេះបន្តថា បច្ចុប្បន្នអ្នកដែលវិលត្រឡប់ទាំងនោះ កំពុងចុះឈ្មោះបំពេញឯកសារ ដើម្បីទទួលបានកាតសមាជិក និងទទួលប្រាក់ឧបត្ថម្ភ ពីមូលនិធិដូចអ្នកទាំង៣០៨នាក់ដែរ។ ក្រៅពីទទួលបានប្រាប់ឧបត្ថម្ភពីមូលនិធិ សមាគមកំពុងដែលរៀបចំឯកសាររបស់ពួកគាត់ទាំងអស់ទៅក្រសួងការងារធ្វើកាត ប.ស.ស ដើម្បីទទួលបានអត្ថប្រយោជន៍ផ្សេងទៀតផងដែរ៕

អត្ថបទដោយ ៖ លន ហ្សាឌីណា