កីឡដ្ឋានក្លឹបបាល់ទាត់វិសាខា ដំណើរការសាងសង់ដល់ណាហើយ?

2018-03-30 02:48:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡដ្ឋានរបស់ក្លឹបបាល់ទាត់ចំណូលថ្មី វិសាខា ដែលមានទីតាំងនៅតំបន់ហ្រ្គែនភ្នំពេញ បានសាងសង់រួចរាល់ ៧០% ហើយ ដែលទំនងជាងអាចដាក់ឱ្យដំណើរការប្រកួតបាន នៅក្រោយពិធីបុណ្យចូលឆ្នាំខ្មែរខាងមុខនេះ ឬចុងខែមេសា ឆ្នាំ២០១៨។ នេះបើតាមការបញ្ជាក់របស់លោក ហុក សុចិត្រា អ្នកចាត់ការទូទៅរបស់ក្លឹបវិសាខា។

លោក ហុក សុចិត្រា អ្នកចាត់ការទូទៅក្លឹបបាល់ទាត់វិសាខា

ក្នុងវីដេអូរបស់គណៈកម្មការប្រកួតបាល់ទាត់ជាតិកម្ពុជា (CNCC) លោក ហុក សុចិត្រា បានបន្ថែមថា នៅពេលសាងសង់រួចរាល់ ក្លឹបមិនចាំបាច់ខ្ចីកីឡដ្ឋានរបស់ក្លឹបវេស្ទើនទៀតទេ។ កីឡដ្ឋានថ្មី នឹងបើកដំណើរការតែម្ដង នៅពេលស្មៅដុះលូតលាស់ពេញទីលាន ខណៈដែលហេដ្ឋារចនាសម្ព័ន្ធផ្សេងទៀត នឹងបន្ដធ្វើជាបន្តបន្ទាប់ ដូចជាការសាងសង់កន្លែងអង្គុយ ដែលអាចដាក់មនុស្សបានពី ៥ពាន់ ទៅ៧ពាន់នាក់ជាដើម។

វីរបុរសបាល់ទាត់ខ្មែរដដែល ក៏បានបង្ហាញអារម្មណ៍សប្បាយរីករាយ នៅពេលបានឃើញសន្ទុះនៃការគាំទ្រខ្លាំង ជាក់ស្ដែងដូចកាលប្រកួតទល់នឹងភ្នំពេញក្រោន ដែលមានអ្នកទស្សនាពេញ រហូតដល់គ្មានកន្លែងអង្គុយ នៅកីឡដ្ឋានវេស្ទើន។

កម្មករកំពុងស្រោចទឹក ថែទាំស្មៅនៅទីលាននៃកីឡដ្ឋានវិសាខា

សូមបញ្ជាក់ថា ក្លឹបវិសាខា ត្រូវបានបង្កើតឡើងកាលពីថ្ងៃទី៥ ខែកុម្ភៈ ឆ្នាំ២០១៧ ប៉ុន្តែបានទទួលជោគជ័យគួរឲ្យកត់សម្គាល់។ ក្រោមការដឹកនាំរបស់គ្រូបង្វឹក ហុក សុជីវ័ន ក្លឹបនេះបានឈ្នះជើងឯកលីកលំដាប់ទី២ កាលពីរដូវកាលមុន និងកំពុងធ្វើព្យុះធ្វើភ្លៀងនៅលីគកំពូលកម្ពុជារដូវកាលនេះ ដោយមិនទាន់ស្គាល់ពាក្យថាចាញ់នៅឡើយទេ ក្នុង៣ប្រកួតដើមរដូវកាល (ឈ្នះ២ ស្មើ១)៕