លោកស្រី ស៊ូជី នឹងមិនទៅចូលរួមកិច្ចប្រជុំកំពូលអាស៊ាន នៅសិង្ហបុរីទេ

2018-04-24 02:23:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មេដឹកនាំមីយ៉ាន់ម៉ា លោកស្រី អង់សាន ស៊ូជី នឹងមិនទៅចូលរួមកិច្ចប្រជុំកំពូលអាស៊ាននៅប្រទេសសិង្ហបុរី ដែលប្រព្រឹត្តិឡើងចាប់ពីថ្ងៃទី២៧ ដល់ ២៨ ខែមេសា ឆ្នាំ ២០១៨ នោះទេ។ នេះបើតាមការបញ្ជាក់ថារបស់អ្នកនាំពាក្យរដ្ឋាភិបាលមីយ៉ាន់ម៉ា លោក Zaw Htay កាលពីថ្ងៃទី២៣ ខែមេសា ២០១៨ ម្សិលមិញ។

លោកស្រីអង់សាន ស៊ូជី(កណ្តាល) ធ្វើការវិកាយ ខណៈនិយាយជាមួយលោក នាយករដ្ឋមន្ត្រីថៃ លោកប្រយុទ្ធ ចាន់អ៊ូចា(ស្តាំ) និងនាយករដ្ឋមន្ត្រីម៉ាឡេស៊ីលោក ណាជីប រ៉ាស៊ាក់(ឆ្វេង) អំឡុងកិច្ចប្រជុំកំពូលអាស៊ាន-ចិនលើកទី២០ នាទីក្រុងម៉ានីល ប្រទេសហ្វីលីពីន កាលពីថ្ងៃទី ១០ វិច្ឆិកា ឆ្នាំ ២០១៧ / រូបថតផ្តល់ឲ្យ៖ Reuters

លោក Zaw Htay បានថ្លែងបន្តទៀតថា ប្រធានាធិបតីថ្មីដែលទើបតែចូលកាន់តំណែងកាលពីខែមុន លោក Win Myint នឹងត្រូវធ្វើជាតំណាងឲ្យប្រទេសមីយ៉ាន់ម៉ានៅឯកិច្ចប្រជុំកំពូលអាស៊ាន ជំនួសឲ្យលោកស្រី ស៊ូជី។

ជុំវិញរឿងនេះ លោក Zaw មិនបានបញ្ជាក់ពីមូលហេតុច្បាស់លាស់ទេថា ហេតុអ្វីបានជាលោកស្រីស៊ូជី នឹងអវត្តមាននៅកិច្ចប្រជុំកំពូលអាស៊ានខាងមុខនេះទៀត។ ប៉ុន្តែកាលពីសប្ដាហ៍មុន រដ្ឋមន្ត្រីទទួលបន្ទុកការិយាល័យរដ្ឋាភិបាលមីយ៉ាន់ម៉ា លោក Thaung Tun បានថ្លែងថា លោកស្រីស៊ូជី មានកិច្ចការជាច្រើនសម្រាប់ចាត់ចែងនៅក្នុងប្រទេស ហើយលោកស្រីមិនអាចឃ្លាតឆ្ងាយពីប្រទេសមីយ៉ាន់ម៉ាបានទេ។

យ៉ាងណាមិញ អវត្តមានរបស់ទីប្រឹក្សារដ្ឋមីយ៉ាន់ម៉ារូបនេះ អាចបណ្តាលមកពី មានការទិតៀនជាច្រើនលើរដ្ឋាភិបាលរបស់លោកស្រីពាក់ព័ន្ធនឹងចំណាត់ការលើវិបត្តិជនភៀសខ្លួនរ៉ូហ៊ីងយ៉ា នាពេលកន្លងមក។

លោកស្រីទីប្រឹក្សារដ្ឋមីយ៉ាន់ម៉ា ចូលរួមកិច្ចប្រជុំរដ្ឋមន្ត្រីការបរទេស អាស៊ាន-អឺរ៉ុបលើកទី១៣ នាទីក្រុងNaypyitaw ប្រទេសមីយ៉ានម៉ា កាលពីថ្ងៃទី២០ វិច្ឆិកាឆ្នាំ ២០១៧/រូបថតផ្ដល់ឲ្យ៖ Reuters

គួររម្លឹកថា លោកស្រី ស៊ូជី បានរងសម្ពាធយ៉ាងខ្លាំងជុំវិញបញ្ហាវិបត្តិជនភៀសខ្លួនរ៉ូហ៊ីងយ៉ា នៅពេលដែលលោកស្រីបានទៅចូលរួមកិច្ចប្រជុំកំពូលអាស៊ាន-អូស្ត្រាលី រយៈពេល ៣ថ្ងៃ ក្នុងទីក្រុង Sydney ប្រទេសអូស្ត្រាលី កាលពីខែមុន។

អត្ថបទទាក់ទង៖

លោក Duterte នឹងជិះយន្តហោះធូរថ្លៃ ទៅចូលរួមកិច្ចប្រជុំកំពូលអាស៊ាន នៅសិង្ហបុរី

ប្រភព៖ Bangkokpost ប្រែសម្រួល៖ អឹុម ម៉េងស៊ាង