Klopp ថាចិត្តសាស្ត្រ Liverpool បច្ចុប្បន្ន ដូចចិត្តសាស្ត្ររបស់ Man Utd កាល២ទសវត្សរ៍មុន

2018-04-24 08:01:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Jurgen Klopp អ្នកចាត់ការក្លឹប Liverpool បានប្រៀបធៀបការលេងរបស់កូនក្រុម ទៅនឹងក្លឹប Manchester United ដែលដឹកនាំដោយលោក Sir Alex Ferguson កាលពីទសវត្សរ៍ ១៩៩០ និង ២០០០។ ការលើកឡើងរបស់ Klopp ចង់បង្ហាញថា ចិត្តសាស្ត្ររបស់ក្រុមហង្សក្រហមបច្ចុប្បន្ន និងចិត្តសាស្ត្ររបស់ក្រុមបិសាចក្រហមកាលគ្រានោះ គឺមិនខុសគ្នាឡើយ។

លោក Jurgen Klopp (រូបភាព៖ Skysports)

លោកនិយាយថា Man Utd ដែលដឹកនាំដោយ Sir Alex តែងតែអាចរកគ្រាប់បានជាបន្តបន្ទាប់ក្នុងរយៈពេលដ៏ខ្លីមួយ។ ជាក់ស្ដែងកាលពីឆ្នាំ១៩៩៩ Man Utd បានប្រើប្រាស់ពេលដ៏ខ្លីដើម្បីយកឈ្នះក្លឹប Bayern Munich នៅវគ្គផ្តាច់ព្រ័ត្រពានរង្វាន់ Champions League ។ ពេលនោះ Bayern បាននាំមុខ១គ្រាប់មុន ប៉ុន្តែ Man Utd បានវាយបកដែលស្ទើរមិនគួរឲ្យជឿ ក្នុងម៉ោងបន្ថែមវគ្គទីពីរចំនួន ២គ្រាប់។ ជាលទ្ធផល Man Utd បានក្លាយជាជើងឯកនៅឆ្នាំនោះ។

Manchester United ឈ្នះពានរង្វាន់ Champions League កាលឆ្នាំ១៩៩៩ ដោយបាល់ ២គ្រាប់ នៅក្នុងម៉ោងបន្ថែម វគ្គទីពីរ (រូបភាព៖ Skysports)

ជុំវិញរឿងនេះ លោក Klopp បានប្រៀបធៀបទៅនឹង Liverpool ដែលឆក់ឱកាសដើម្បីអាចរកគ្រាប់បាល់ ៣គ្រាប់ក្នុងត្រឹមតែ១៩នាទី នៃវគ្គទី១ នៅពេលជួបជាមួយ Manchester City កាលពីវគ្គ៨ក្រុមចុងក្រោយ។ អ្នកចាត់ការដដែល គ្រោងប្រើប្រាស់យុទ្ធសាស្ត្រដូចគ្នាពេលជួប Roma នៅជើងទី១ យប់នេះ។

«ក្រុម Man Utd របស់ Alex Ferguson មានអ្វីពិសេស? ហេតុអ្វីនៅពេលជាក់លាក់ណាមួយ ពួកគេតែងតែអាចរកបាន២គ្រាប់ផ្ទួន?... នេះជាឱកាសមួយ។ ពេលស៊ុតចូល១ហើយ យើងត្រូវធ្វើវាម្ដងទៀត។ ប្រើប្រាស់សន្ទុះក្នុងការប្រកួត។ ពួកយើងត្រូវចងចាំវា ហើយពួកយើងពិតជាចង់ប្រើប្រាស់វា ដើម្បីស្វែងរកគ្រាប់ស៊ុតបញ្ចូលទី»។ នេះជាសម្ដីរបស់ Klopp ។

សូមបញ្ជាក់ថា Liverpool នឹងស្វាគមន៍ Roma នៅកីឡដ្ឋាន Anfield នាវគ្គពាក់កណ្ដាលផ្តាច់ព្រ័ត្រ Champions League នៅយប់ឈានចូលថ្ងៃទី២៥ មេសា វេលាម៉ោង១:៤៥នាទី៕

ប្រភព៖ Sky Sports ប្រែសម្រួល៖ លាភ.