នាយករដ្ឋមន្រ្តី ផ្តល់អនុសាសន៍៣ចំណុច ដើម្បីរៀបចំទីក្រុងឆ្លាតវៃអាស៊ាន

2018-04-29 03:45:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្លែងក្នុងកិច្ចប្រជុំកំពូលអាស៊ានលើកទី៣២ នៅប្រទេសសិង្ហបុរី កាលពីថ្ងៃទី២៨ ខែមេសា ឆ្នាំ២០១៨ សម្តេចនាយករដ្ឋមន្រ្តី ហ៊ុន សែន បានផ្តល់អនុសាសន៍ចំនួន៣ចំណុច ក្នុងការអនុវត្តជាក់ស្តែងការរៀបចំទីក្រុងឆ្លាតវៃអាស៊ាន។

សម្តេច ហ៊ុន សែន និងមេដឹកនាំអាស៊ាន៩ប្រទេសទៀត នៅក្នុងកិច្ចប្រជុំកំពូលអាស៊ានលើកទី៣២ នៅសិង្ហបុរី កាលពីថ្ងៃទី២៨ ខែមេសា ឆ្នាំ២០១៨។ រូបថត៖ FB សម្តេច ហ៊ុន សែន

៣ចំណុចនោះរួមមាន៖

១. បង្កើតយន្តការគ្រប់គ្រងប្រតិបត្តិការដោយខ្លួនឯង។

២. បង្កើតយន្តការហិរញ្ញវត្ថុដែលអនុគ្រោះ អាចអនុវត្តជាក់ស្តែងដើម្បីជួយអភិវឌ្ឍទីក្រុងឆ្លាតវៃសម្រាប់ប្រទេសសមាជិកអាស៊ាននីមួយៗ។

និង៣. បង្កើតស្តង់ដារួម និងយន្តការដើម្បីទ្រទ្រង់ការអភិវឌ្ឍទីក្រុងអាស៊ានទាំងមូល។

សម្តេច ហ៊ុន សែន បានជឿជាក់ថា តាមរយៈគំនិតផ្តួចផ្តើមក្នុងការបង្កើតបណ្តាញទីក្រុងឆ្លាតវៃអាស៊ាន នឹងអាចស្វែងរកវិធីសាស្រ្តថ្មីៗដើម្បីទាញយកអត្ថប្រយោជន៍នៃបច្ចេកវិទ្យាដើម្បីជំរុញកំណើនសេដ្ឋកិច្ច និងលើកកម្ពស់ជីវភាពរស់នៅរបស់ប្រជាជន។

គួរបញ្ជាក់ថា អំឡុងកិច្ចប្រជុំកំពូលអាស៊ានលើកទី៣២នេះ មេដឹកនាំនៃបណ្ដាប្រទេសអាស៊ានទាំង១០ បានធ្វើការស្នើជ្រើសរើសទីក្រុងចំនួន ២៦ នៅក្នុងប្រទេសអាស៊ានទាំង១០ ធ្វើជាទីក្រុងសាកល្បងនៃគម្រោងបណ្ដាញក្រុងឆ្លាតវៃអាស៊ាន (ASCN)។ ក្នុងនោះ មានទីក្រុងកម្ពុជា ចំនួន៣ផងដែរ គឺ រាជធានីភ្នំពេញ ក្រុងបាត់ដំបង និងក្រុងសៀមរាប៕