ខេត្តព្រះសីហនុ នឹងមានសណ្ឋាគារថ្មីៗប្រណិតជាច្រើនពាន់បន្ទប់បន្ថែមទៀត

2018-05-16 09:28:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដើម្បីទទួលស្វាគមន៍កំណើនភ្ញៀវទេសចរជាតិ និងអន្តរជាតិដែលមានការកើនឡើងពីមួយឆ្នាំទៅមួយឆ្នាំ មន្រ្តីទេសចរណ៍ខេត្តព្រះសីហនុ បានអះអាងថា នឹងមានសណ្ឋាគារថ្មីៗប្រណិតប្រមាណពី ២ពាន់ ទៅ២៥០០បន្ទប់បន្ថែមទៀត នារយៈពេល២ឆ្នាំខាងមុខនេះ។

សណ្ឋាគារ Gobo East (រូបភាព៖ sihanoukville-cambodia)

លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានថ្លែងនៅក្នុងកិច្ចប្រជុំមួយ ជាមួយក្រសួងទេសចរណ៍កាលពីថ្មីៗកន្លងទៅនេះថា បច្ចុប្បន្នក្នុងខេត្តព្រះសីហនុមានសណ្ឋាគារ ៦៩កន្លែង ស្មើនឹង ៣ ៥២១បន្ទប់ ផ្ទះសំណាក់មាន ៣១៩កន្លែង និងភោជនីយដ្ឋាន-អាហារដ្ឋានមាន ២៥១កន្លែង។

ភ្ញៀវទេសចរដែលមកទស្សនាខេត្តព្រះសីហនុ មានប្រមាណជាង ៩៥ម៉ឺននាក់ កើនឡើងជាង ១៨%។ ក្នុងនោះមានភ្ញៀវទេសចរចិន ប្រមាណ៥ម៉ឺននាក់ កើនឡើង ៣៧%។ ដោយឡែក ភ្ញៀវទេសចរដែលទៅទស្សនាតាមបណ្ដាកោះ ក្នុងខេត្តព្រះសីហនុ ពិសេសកោះរ៉ុង កោះរ៉ុងសន្លឹមជាដើម មានជាង ១១ម៉ឺននាក់ កើនឡើងជាង ១០% ផងដែរ ក្នុងត្រីមាសទី១ ឆ្នាំ២០១៨នេះ។

ខេត្តព្រះសីហនុដែលធា្លប់តែមានការផ្គត់ផ្គង់កន្លែងស្នាក់នៅដល់ភ្ញៀវទេសចរដូចជា ផ្ទះសំណាក់ដែលមានតម្លៃទាប និងសណ្ឋាគារត្រឹមលំដាប់ផ្កាយបីជាដើម។ ក៏ប៉ុន្តែ ដោយសារតែហេដ្ឋាសម្ព័ន្ធ ចេញចូលទៅក្នុងខេត្តនេះ មានភាពងាយស្រួលជាងមុន ហើយថែមទាំងមានជើងហោះហើរត្រង់ ធ្វើឱ្យខេត្តមានឆ្នេរសមុទ្រស្អាតជាងគេក្នុងតំបន់មួយនេះ ទទួលបានការចាប់អារម្មណ៍លើការវិនិយោគលើសណ្ឋារគារលំដាប់អន្តរជាតិ។

តូយ៉ាង កាលពីចុងខែមេសាកន្លងទៅនេះ សណ្ឋាគារលំដាប់ផ្កាយ៥ “The Royal Sands Koh Rong” មាន ១៤៨បន្ទប់ ដែលជាការវិនិយោគរបស់ក្រុមហ៊ុន The Royal Group ត្រូវបានដាក់ឲ្យដំណើការ ។ សណ្ឋាគារនេះ ត្រូវបានសាងសង់ជាលក្ខណៈវីឡា ដោយចំណាយ ៤០លានដុល្លារនៃដំណាក់កាលទី១។

សណ្ឋាគារលំដាប់ផ្កាយ៥ របស់ក្រុមហ៊ុន The Royal Group នៅលើកោះរ៉ុង (រូបថត៖ AKP)

ក្រៅពីនេះ ក៏មានគម្រោងសាងសង់សណ្ឋាគារលំដាប់ពិភពលោករបស់ក្រុមហ៊ុន Marriott International ដែលមានមូលដ្ឋាននៅអាមេរិក ចាប់ដៃគូជាមួយក្រុមហ៊ុនក្នុងស្រុក Grand Lion Group ផងដែរ។ គម្រោងនេះ នឹងត្រូវចាប់ផ្តើមសាងសង់នៅដើមឆ្នាំ២០១៩ខាងមុខ៕

អត្ថបទពាក់ព័ន្ធ៖

អត្ថបទ៖ ឈុត សិរីឧត្តម