គម្រោងផ្លូវល្បឿនលឿន នឹងប៉ះពាល់ដល់កៅស៊ូ ១០ម៉ឺនដើមរបស់លោកឧកញ៉ា ម៉ុង ឫទ្ធី

2018-05-20 08:00:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដើមកៅស៊ូប្រមាណ ១០ម៉ឺនដើមដែលស្ថិតក្នុងតំបន់អភិវឌ្ឍន៍ឃុំកែវផុស របស់លោកឧកញ៉ា ម៉ុង ឫទ្ធី នឹងត្រូវកាប់ចោល ដោយសារតែតំបន់នេះ ស្ថិតក្នុងទីតាំងឆ្លងកាត់នៃគម្រោងសាងសង់ផ្លូវល្បឿនលឿនភ្នំពេញ-ព្រះសីហនុ។ នេះបើតាមការបញ្ជាក់របស់លោកឧកញ៉ា ម៉ុង ឫទ្ធី កាលពីថ្ងៃទី១៨ ខែឧសភា ឆ្នាំ២០១៨។

លោក ឧកញ៉ា ម៉ុង ឫទ្ធី កំពុងត្រួតពិនិត្យមើលនៅក្នុងចម្ការកៅស៊ូរបស់លោក

លោកបានឱ្យដឹងថា កាលពីរសៀលថ្ងៃទី១៨ ខែឧសភា ក្រុមវិស្វករមកពីប្រទេសចិន បាននឹងកំពុងតែចុះពិនិត្យមើលទីតាំងភូមិសាស្ត្រដែលគ្រោងសាងសង់ផ្លូវល្បឿនលឿន។ ផ្លូវនេះ នឹងត្រូវឆ្លងកាត់ចម្ការកៅស៊ូរបស់លោក ក្នុងតំបន់អភិវឌ្ឍន៍ឃុំកែវផុស អស់ប្រមាណជាជាង១៧០ហិកតា ព្រមទាំងមានផលប៉ះពាល់ហេដ្ឋារចនាសម្ព័ន្ធមួយចំនួនផងដែរ។ ប៉ុន្តែទោះជាយ៉ាងណា លោកឧកញ៉ា នៅតែបង្ហាញការគាំទ្រគម្រោងនេះដដែល។

សូមជម្រាបថា គម្រោងផ្លូវល្បឿនលឿននេះ គឺឆ្លងកាត់ ៤រាជធានីខេត្ត រួមមាន រាជធានីភ្នំពេញ ខេត្តកណ្តាល ខេត្តកំពង់ស្ពី ខេត្តព្រះសីហនុ ក្នុងនោះគឺឆ្លងកាត់ ៦ស្រុក ១ខណ្ឌ ២ក្រុង ៣១ឃុំ/សង្កាត់ និង១១០ភូមិ។ ផ្លូវល្បៀនលឿនដែលគ្រោងនឹងចំណាយសាងសង់ ១៩០០លានដុល្លារនេះ ក្រាលបេតុងកៅស៊ូ AC មានប្រវែងសរុបជាង ១៩០គីឡូម៉ែត្រ (គិតរួមទាំងស្ពាន និងលូទាំងអស់) ហើយមានទទឹងសរុប ២៤,៥ម៉ែត្រ។

ផែនទីនៃគម្រោងផ្លូវល្បឿនលឿនភ្នំពេញ-ព្រះសីហនុ (រូបថត៖ FB រដ្ឋបាលខេត្តព្រះសីហនុ)

ការសិក្សាគម្រោងផ្លូវល្បឿនលឿននេះ នឹងត្រូវបញ្ចប់នៅចុងឆ្នាំ២០១៨ ហើយចាប់ផ្តើមសាងសង់នៅដើមឆ្នាំ២០១៩។ ការសាងសង់នេះ គ្រោងនឹងបញ្ចប់ជាស្ថាពរនៅឆ្នាំ២០២៣ ពោលគឺប្រើរយៈពេល ៤ឆ្នាំ៕

អត្ថបទពាក់ព័ន្ធ៖ ក្រសួងសាធារណការ ត្រៀមទិញដីសម្រាប់សាងសង់ផ្លូវល្បឿនលឿន ភ្នំពេញ-ព្រះសីហនុ

អត្ថបទ៖ សំភី