អ្នកវិនិយោគកូរ៉េ និងជប៉ុន កំពុងសម្រុកទិញដីនៅជិតតំបន់បឹងកប់ស្រូវ

2018-05-21 13:46:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វិនិយោគិនកូរ៉េ និងជប៉ុន បាននឹងកំពុងសម្លឹងមើលឱកាសវិនិយោគលើវិស័យដីធ្លីក្នុងតំបន់ជិតបឹងទំនប់កប់ស្រូវ (ឬហៅថា បឹងតាមោក) ដោយការទិញដីនៅតំបន់នោះទុកសម្រាប់ការវិនិយោគនាពេលអនាគត។ នេះបើតាមការលើកឡើងរបស់ លោក ពីង សេរី នាយកប្រតិបត្តិក្រុមហ៊ុន Cambodia Angkor Real Estate។

លោក សេរី បានថ្លែងឱ្យដឹងថា ការអភិវឌ្ឍហេដ្ឋារចនាសម្ព័ន្ធនៅតំបន់នោះ នៅមិនទាន់ល្អគ្រប់គ្រាន់ទេ ពោលគឺនៅមានកង្វះខាតនូវប្រព័ន្ធទឹក។ ទោះយ៉ាងណា វិនិយោគិនអចលនទ្រព្យរូបនេះ មើលឃើញថាវិសាលភាពនៃការវិនិយោគនៅក្បែរតំបន់អភិរក្សបឹងតាមោក មានទំហំធំធេងជាងតំបន់ផ្លូវ ៦០ម៉ែត្រ (មហាវិថីសម្តេច ហ៊ុន សែន)។

ការបង្ហោះផ្សព្វផ្សាយលក់ដី នៅដីឡូតិ៍គម្រោងមាត់បឹងតាមោក នៅលើទំព័រហ្វេសប៊ុករបស់ក្រុមហ៊ុនអចលនទ្រព្យ១ កាលពីពេលកន្លងទៅ។

គួរជម្រាបថា ខណ្ឌព្រែកព្នៅ មានចំនួនប្រាំសង្កាត់ដូចជា សង្កាត់ព្រែកព្នៅ សង្កាត់គោករការ សង្កាត់សំរោង សង្កាត់ពន្សាំង និងសង្កាត់ពញាពន់ ដែលជាសង្កាត់របស់បឹងតាមោក។

បើតាមលោក សេរី សកម្មភាពពុះដីឡូតិ៍លក់ក្បែរតំបន់បឹងដ៏ធំមួយនេះ មានសន្ទុះគួរឲ្យកត់សម្គាល់ ហើយទីផ្សារតម្លៃដីក្នុងតំបន់ទំនប់កប់ស្រូវ មានចាប់ពី ២០០ដុល្លារអាមេរិកឡើងទៅក្នុងមួយម៉ែត្រការ៉េ។ ស្រដៀងគ្នានេះដែរ បើតាមរបាយការណ៍វាយតម្លៃដីធ្លីរបស់ក្រុមហ៊ុន Key Real Estate គិតត្រឹមដំណាច់ឆ្នាំ២០១៧ បានបង្ហាញថា តម្លៃដីក្នុងខណ្ឌព្រែកព្នៅសម្រាប់ការប្រើប្រាស់លើលំនៅឋានមានតម្លៃចាប់ពី ៩០ដុល្លារអាមេរិកឡើងទៅ ខណៈតម្លៃដីសម្រាប់ការធ្វើពាណិជ្ជកម្មមានតម្លៃចាប់ពី ៣៣០ដុល្លារអាមេរិកឡើងទៅ។

សូមរំលឹកថា កាលពីខែកុម្ភៈ ឆ្នំាំ២០១៦ រដ្ឋាភិបាលកម្ពុជាបានចេញអនុក្រឹត្យមួយស្តីពីការកំណត់ផ្ទៃបឹងតាមោក ដែលមានទំហំ ៣២៣៩,៧ហិកតា ដើម្បីទុកជាសម្បត្តិរបស់រដ្ឋ ក្នុងគោលដៅទប់ស្កាត់ការចាក់ដីរំលោភបំពាន។

អាជ្ញាធររាជធានី កំពុងស្ថាបនាផ្លូវកប់ស្រូវ កាលពីខែមេសា ឆ្នាំ២០១៨កន្លងទៅ។ រូបថត៖ FB មន្ទីរសាធារណការរាជធានីភ្នំពេញ

លោក សុខ សម្បត្តិ អភិបាលខណ្ឌព្រែកព្នៅបានថ្លែងឱ្យដឹងថា មិនមានការអនុញ្ញាតឱ្យមានសកម្មភាពទិញ លក់ដីធ្លីក្នុងផ្ទៃបឹងតាមោក ដែលរដ្ឋាភិបាលបានបង្កកទុកជាសម្បត្តិរបស់រដ្ឋនោះឡើយ វៀរលែងតែតំបន់ជុំវិញ ដែលផុតពីគំនូសក្រហមកំណត់ដោយអនុក្រឹត្យរបស់រដ្ឋាភិបាល។

សូមបញ្ជាក់ថា បឹងតាមោក ជាបឹងធម្មជាតិ ហើយក៏ជាអាងស្តុកទឹកធំបំផុតនៅភាគខាងលិចឆៀងខាងជើង នៃរាជធានីភ្នំពេញ ខណៈដែលបច្ចុប្បន្នបឹងមួយចំនួនត្រូវបានអភិវឌ្ឍទៅជាទីក្រុងរណប។ តួយ៉ាង ដូចជា បឹងកក់ កំពុងត្រូវបានអភិវឌ្ឍដោយក្រុមហ៊ុន ស៊ូកាកូអ៊ីន (Shukaku Inc) បឹងពោងពាយ កំពុងត្រូវបានអភិវឌ្ឍដោយក្រុមហ៊ុន លី យ៉ុងផាត់ គ្រុប (L.Y.P Group) ជាដើម៕

អត្ថបទ៖ ឈុត សិរីឧត្តម