អតីតបុគ្គលិកស្ថានទូតអាមេរិក ៣២នាក់ ធ្វើបាតុកម្មតវ៉ា ទាមទារ ៧ចំណុច នៅព្រឹកនេះ
- 2018-06-19 01:39:58
- ចំនួនមតិ 0 | ចំនួនចែករំលែក 0
អតីតបុគ្គលិកស្ថានទូតអាមេរិក ៣២នាក់ ធ្វើបាតុកម្មតវ៉ា ទាមទារ ៧ចំណុច នៅព្រឹកនេះ
ចន្លោះមិនឃើញ
អតីតបុគ្គលិកស្ថានទូតអាមេរិកប្រចាំកម្ពុជា ចំនួន ៣២នាក់ បានជួបជុំធ្វើបាតុកម្មតវ៉ា នៅខាងមុខស្ថានទូតអាមេរិក នៅជិតវត្តភ្នំ នាម៉ោង ៨ព្រឹកថ្ងៃទី១៩ ខែមិថុនា ឆ្នាំ២០១៨នេះ ដោយទាមទារ ៧ចំណុច។
ការទាមទារទាំង ៧ចំណុចនោះ មានដូចជា៖
១. ទាមទាររកយុត្តិធម៌ពីការបញ្ឈប់ពួកគាត់ពីការងារដោយបង្ខំ និងមិនបង្ហាញភស្តុតាង។
២. ទាមទារកែពាក្យពីបណ្តេញចេញមកជាការកាត់បន្ថយបុគ្គលិកវិញ។
៣. សូមប្តឹងពីបទល្មើសរំលោភសិទ្ធិបុគ្គលដោយដកហូតយកទូរស័ព្ទទៅឆែករកមើលរូបភាព និងឯកសារផ្សេងៗ ព្រមទាំងរឹបអូសយកទូរសព្ទមួយចំនួនទៅរក្សាទុកមួយរយៈទៀតផង។
៤. ទាមទារសំណង ៦ខែទៅតាមច្បាប់កាត់បន្ថយបុគ្គលិក។
៥. សូមទូទាត់លុយមូលនិធិឧបត្ថម្ភ (ប្រាក់១២%) ក្នុងខែនេះតែម្តង ព្រោះរយៈពពេលបីខែមកហើយ មិនទាន់ទូទាត់ឲ្យទេ។
៦. សូមប្តឹងទាមទារសំណងលើការបង្ខូចកេរ្តិ៍ឈ្មោះ និងកិត្តិយស ដោយសារតែការចោទប្រកាន់គ្មានភស្តុតាង។
៧. សូមអោយសហគមន៍បុគ្គលិកខ្មែរមានសិទ្ធិចូលរួមរាល់បញ្ហាការបញ្ឈប់បុគ្គលិកខ្មែរ ដែលមានភាពអយុត្តិធម៌ និងមិនត្រឹមត្រូវតាមច្បាប់នៃសៀវភៅការងារ។
ក្រុមអតីតបុគ្គលិកស្ថានទូតអាមេរិកទាំងនោះ តវ៉ាជំទាស់នឹងស្ថានទូតអាមេរិក ដែលបានបណ្តេញពួកគេ ចេញពីការងារដោយអយុត្តិធម៌។
គួររម្លឹកថា ស្ថានទូតអាមេរិកបានបណ្ដេញអ្នកទាំង ៣២នាក់ ចេញពីការងារកាលពីថ្ងៃទី២៨ ខែមីនា ឆ្នាំ២០១៨ ដោយលើកហេតុផលថា ពួកគេបានប្រើប្រាស់សារ Messenger ក្នុង Facebook Group Chat ចែកចាយ និងរក្សាទុករូបភាព-វីដេអូអាសអាភាស ដែលក្នុងនោះ មានទាំងរូបកុមារអាយុក្រោម ១៨ឆ្នាំផងដែរ៕