អគ្គស្នងការរង បញ្ជាក់ពីករណីគ្រោះថ្នាក់ចរាចរណ៍លើសម្តេចក្រុមព្រះ និងអ្នកម្នាង

2018-06-21 03:11:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិបានបញ្ជាក់ថា ករណីគ្រោះថ្នាក់ចរាចរណ៍លើសម្តេចក្រុមព្រះ នរោត្តម រណឫទ្ធិ និងអ្នកម្នាង អ៊ុក ផល្លា កាលពីថ្ងៃទី១៧ ខែមិថុនា ឆ្នាំ២០១៨ គឺជាករណីគ្រោះថ្នាក់ចរាចរណ៍សុទ្ធសាធ ហើយលោកក៏បានច្រានចោលចំពោះព័ត៌មានមិនត្រឹមត្រូវនានាផងដែរ។ ការថ្លែងបញ្ជាក់នេះ ធ្វើឡើងក្នុងសន្និសីទសារព័ត៌មាន នាព្រឹកថ្ងៃទី២១ ខែមិថុនា ឆ្នាំ២០១៨នេះ នៅអគ្គស្នងការដ្ឋាននគរបាលជាតិ។

នាយឧត្តមសេនីយ៍ ហ៊ឹម យ៉ាន ថ្លែងក្នុងសន្និសីទសារព័ត៌មាន នាព្រឹកថ្ងៃទី២១ ខែមិថុនា ឆ្នាំ២០១៨ នៅអគ្គស្នងការដ្ឋាននគរបាលជាតិ

លោកបានឱ្យដឹងថា ផ្អែកតាមការស្រាវជ្រាវ ករណីគ្រោះថ្នាក់ចរាចរណ៍នេះគឺបង្កឡើងដោយឈ្មោះ ម៉ិល សារ៉េត ជាអ្នកបើកបររថយន្តតាក់ស៊ី។ ជនបង្កនេះ បានបើកបររថយន្តក្នុងល្បឿនលឿន វ៉ាជែង ទៅបុកព្រះទីនាំងសម្តេចក្រុមព្រះ។ អ្នកបើកបររូបនេះ បានសារភាពថា ខ្លួនពិតជាបានបើកបរក្នុងល្បឿនលើសកំណត់ វ៉ាជែង ក្នុងល្បឿន ១០០គីឡូម៉ែត្រ ក្នុង១ម៉ោង។

នាយឧត្តមសេនីយ៍ ហ៊ឹម យ៉ាន បញ្ជាក់ថា អ្នកបើករថយន្តតាក់ស៊ីដែលបុកព្រះទីនាំងសម្តេចក្រុមព្រះ គឺល្មើសច្បាប់ចរាចរណ៍ផ្លូវគោក មាត្រា៨៣ និងមាត្រា៨៥។ ចំណែករថយន្តនេះ ក៏បានផ្ទុកមនុស្សលើសកំណត់ផងដែរ។

សូមរំលឹកថា សម្តេចក្រុមព្រះ និងអ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍ លើផ្លូវជាតិលេខ៤ ចន្លោះគីឡូម៉ែត្រ ២០០-២០១ នៅស្រុកព្រៃនប់ ក្នុងពេលដែលក្បួនរថយន្តសម្តេចក្រុមព្រះ បានធ្វើដំណើរពីពីខេត្តកំពត ទៅខេត្តព្រះសីហនុ ដោយសម្តេចបានជិះនៅក្នុងរថយន្ត BMW ពណ៌ស។ ព្រះទីនាំងរបស់ព្រះអង្គ ត្រូវបានបុកដោយរថយន្ត១គ្រឿងម៉ាក ហាយឡេនឌ័រ ពណ៌ស ស្លាកលេខ 2-9667 ដែលធ្វើដំណើរពីខេត្តព្រះសីហនុ មកភ្នំពេញ៕