វិភាគ World Cup ពូល D៖ តើអាហ្សង់ទីន អាចស្ដារមុខមាត់បានទេ ប៉ះក្រូអាតយប់នេះ?

2018-06-21 09:42:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រោយបានត្រឹមស្មើក្នុងប្រកួតដំបូងទល់នឹងអ៊ីស្លង់ អាហ្សង់ទីនត្រូវការ ៣ពិន្ទុជាចាំបាច់ ក្នុងជំនួបលើកទី២ ពូល D ទល់នឹងក្រុមក្រូអាត នាម៉ោង ១រំលងអាធ្រាត្រយប់នេះ។ តើអាហ្សង់ទីន អាចរក ៣ពិន្ទុបានដែរឬទេ? ចុះក្រូអាត ដែលឈ្នះនីហ្សេរីយ៉ាក្នុងប្រកួតដំបូង អាចបន្តជ័យជម្នះបានទៀតដែរយ៉ាងណា?

មុនចូលរួមព្យាករលទ្ធផលជាមួយខ្លីៗ សូមមើលរឿងរ៉ាវគួរដឹងមួយចំនួន ដូចខាងក្រោមនេះ៖

ព័ត៌មានក្រុម៖

អាហ្សង់ទីន៖ គ្រូបង្វឹក Jorge Sampaoli ត្រូវបានគេរាយការណ៍ថានឹងអាចប្ដូររូបមន្តលេងពី ៤-២-៣-១ ដែលប្រើពេលប្រកួតទល់នឹងអ៊ីស្លង់ ទៅប្រើទម្រង់ ៣-៤-៣ វិញ។ អាហ្សង់ទីន មិនមានបញ្ហាកីឡាករបួស ឬជាប់ពិន័យនោះឡើយ សម្រាប់ការប្រកួតទល់នឹងក្រូអាតយប់នេះ។ ខ្សែបម្រើស្លាប Cristian Pavon របស់ក្លឹប Boca Juniors នឹងអាចជាប់ក្នុងជម្រើសដំបូងជាលើកទី១ ក្នុងការប្រកួតពានផ្លូវការ ខណៈខ្សែការពារ Gabriel Mercado (ក្លឹប Sevilla) និងខ្សែបម្រើស្លាប Marcos Acuna (ក្លឹប Sporting CP) ក៏នឹងអាចជាប់ក្នុងជម្រើស១១នាក់ផងដែរ។

Messi បង្ហាញអារម្មណ៍ខកចិត្ត ក្រោយប្រកួតស្មើអ៊ីស្លង់

- **ក្រូអាត៖** ក្រូអាត នឹងបានឡើងទៅជុំ ១៦ក្រុមចុងក្រោយជាស្វ័យប្រវត្តិ ប្រសិនបើអាចយកឈ្នះអាហ្សង់ទីន។ ក្រុមនេះ ក៏មិនមានបញ្ហាកីឡាកររបួស ឬជាប់ពិន័យដែរ ប៉ុន្តែខ្សែប្រយុទ្ធ Nikola Kalinic ត្រូវបានបញ្ជូនត្រឡប់ទៅស្រុកកំណើតវិញ ក្រោយបដិសេធមិនប្ដូរចូលលេង ពេលធ្វើជាកីឡាករបម្រុងកាលពីប្រកួតទល់នឹងនីហ្សេរីយ៉ា ដោយប្រាប់ហេតុផលថា ឈឺខ្នង។

កីឡាករក្រុមក្រូអាត អបអរក្រោយស៊ុតចូលនីហ្សេរីយ៉ា

ប្រវត្តិជួបគ្នានៃក្រុមទាំង២

ក្រុមទាំង២ ធ្លាប់ជួបគ្នា ៤ ដង។ លទ្ធផលគឺ អាហ្សង់ទីន ឈ្នះ២ដង ក្រូអាតឈ្នះម្ដង និងស្មើគ្នាម្ដង។ ក្នុងចំណោម៤ប្រកួតនោះ មានម្ដងជាការប្រកួតនៅ World Cup ដែលអាហ្សង់ទីន បានឈ្នះ ១-០ (World Cup 1998)។ ជួបគ្នាលើកចុងក្រោយ អាហ្សង់ទីន ឈ្នះ ក្រូអាត ២-១ ក្នុងជំនួបមិត្តភាពកាលពីឆ្នាំ ២០១៤។

៥ប្រកួតចុងក្រោយនៃក្រុមទាំង២

អាហ្សង់ទីន៖ ឈ្នះ២ ស្មើ១ ចាញ់២។ ប្រកួតចុងក្រោយ ស្មើ អ៊ីស្លង់ ១-១ ថ្ងៃទី១៦ មិថុនា ២០១៨ (World Cup 2018)
ក្រូអាត៖ ឈ្នះ៣ ចាញ់២។ ប្រកួតចុងក្រោយ ឈ្នះ នីហ្សេរីយ៉ា ២-០ ថ្ងៃទី១៦ មិថុនា ២០១៨ (World Cup 2018)

កីឡាករក្រុមអាហ្សង់ទីន ហ្វឹកហាត់ត្រៀមប៉ះក្រូអាត

ជម្រើស ១១នាក់ដំបូង ដែលអាចចូលលេង

អាហ្សង់ទីន៖ Caballero; Mercado, Otamendi, Tagliafico; Salvio, Mascherano, Meza, Acuna; Messi, Aguero, Pavon

ក្រូអាត៖ Subasic; Vrsaljko, Lovren, Vida, Strinic; Rakitic, Badelj; Brozovic, Modric, Perisic; Mandzukic

កីឡាករក្រូអាត ហ្វឹកហាត់ត្រៀមប៉ះអាហ្សង់ទីន

រឿងរ៉ាវគួរដឹង ទាក់ទងនឹងក្រុមទាំង២

អាហ្សង់ទីន៖ ការប្រកួតក្នុងពូលនៅ World Cup ១៦ដងចុងក្រោយ ក្រុមនេះចាញ់តែម្ដងគត់ គឺចាញ់អង់គ្លេស ១-០ កាលពីឆ្នាំ២០០២ (ឈ្នះ១២ ស្មើ៣)។ ការប្រកួត១០ដងចុងក្រោយរបស់អាហ្សង់ទីននៅក្នុងកម្មវិធីប្រកួតដណ្ដើមពានផ្លូវការ គឺមានតែ ២ប្រកួតប៉ុណ្ណោះ ដែលអាហ្សង់ទីន ស៊ុតចូលលើសពី ១គ្រាប់។
ក្រូអាត៖ ក្រូអាតមិនដែលចាញ់នោះទេ ក្នុងប្រកួតទី២ នៅ World Cup (ឈ្នះ៣ ស្មើ១) និងធ្លាយសំណាញ់ទីតែ១គ្រាប់ប៉ុណ្ណោះ (ពេលឈ្នះអ៊ីតាលី ២-១ នៅ World Cup 2002)។ ប៉ុន្តែក្រុមនេះ មិនដែលឈ្នះក្រុមមកពីអាមេរិកឡាទីន នៅ World Cup នោះទេ ពោលគឺជួប៤ដង ចាញ់ទាំង៤ ដង (ចាញ់ប្រេស៊ីល ៣ដង និងអាហ្សង់ទីន ម្ដង)។

ការព្យាករណ៍របស់ខ្លីៗ៖ អាហ្សង់ទីន ១-១ ក្រូអាត

អត្ថបទ៖ សុខ សុវត្ថិ