តើអ៊ីរ៉ង់ អាចបង្កើតកំណត់ត្រាថ្មី ពេលប៉ះព័រទុយហ្គាល់ យប់នេះ បានដែរឬទេ?

2018-06-25 08:16:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជំនួបរវាងព័រទុយហ្គាល់ និងអ៊ីរ៉ង់ អាចថាជាការប្រកួតដែលគួរឲ្យចាប់អារម្មណ៍ជាងគេ ក្នុងចំណោម៤ គូ នៅ FIFA World Cup យប់នេះ។ គួរឲ្យចាប់អារម្មណ៍ ដោយសារតែក្រុមទាំង២ អាចមាន១ក្រុមត្រូវធ្លាក់ និង១ក្រុមទៀត ត្រូវជាប់ទៅវគ្គ ១៦ក្រុមចុងក្រោយ។ ការប្រកួត នឹងធ្វើឡើងនៅម៉ោង ១រំលងអាធ្រាត្រយប់នេះ ដំណាលគ្នានឹង១គូទៀតក្នុង B ដូចគ្នា គឺ អេស្ប៉ាញ vs ម៉ារ៉ុក។

អ៊ីរ៉ង់ មិនធ្លាប់ឆ្លងផុតវគ្គសន្សំពិន្ទុតាមពូលនោះទេ ក្នុងការបង្ហាញខ្លួននៅ World Cup ៤ដងកន្លងមក (១៩៧៨, ១៩៩៨, ២០០៦, ២០១៤) ប៉ុន្តែកំណត់ត្រានេះ នឹងត្រូវកែប្រែ ប្រសិនបើអ៊ីរ៉ង់ អាចយកឈ្នះព័រទុយហ្គាល់បាន។ សូមបញ្ជាក់ថា ២ប្រកួតក្នុងពូល B គឺ ព័រទុយហ្គាល់ និង អេស្ប៉ាញ មាន ៤ពិន្ទុ រីឯ អ៊ីរ៉ង់ មាន ៣ពិន្ទុ។ ក្រុមទាំង៣ នឹងមាន ២ក្រុមអាចឡើងទៅវគ្គ ១៦ក្រុមចុងក្រោយ។

តើប្រិយមិត្ត គិតថាអ៊ីរ៉ង់ អាចបង្កភាពភ្ញាក់ផ្អើលបានដែរឬទេ?

[ខ្លីៗ] សូមវិភាគត្រួសៗ ជូនប្រិយមិត្តដូចខាងក្រោម៖

ជើងកីឡាករ

ព័រទុយហ្គាល់៖ ខ្សែបម្រើ Joao Moutinho ទំនងជាមិនអាចចូលលេងបានទេ ដោយសារបញ្ហាសុខភាព។ កីឡាករមកពីក្លឹប Monaco វ័យ ៣១ឆ្នាំរូបនេះ បានខកខានមិនបានហ្វឹកហាត់នោះទេ ក្នុងរយៈពេលប៉ុន្មានថ្ងៃចុងក្រោយនេះ។

កីឡាករព័រទុយហ្គាល់ ហ្វឹកហាត់ត្រៀមប្រកួត យប់នេះ

**អ៊ីរ៉ង់៖** ខ្សែការពារ Ehsan Hajsafi ប្រហែលជាអវត្តមានក្នុងការប្រកួតនេះ ក្រោយរងរបួសសាច់ដុំភ្លៅ ពេលប្រកួតទល់នឹងក្រុមអេស្ប៉ាញ។ ប្រសិនបើអវត្តមានមែន កីឡាករដែលលេងឲ្យក្លឹប Olympiakos រូបនេះ ទំនងជាត្រូវជំនួសដោយកីឡាករ Milad Mohammadi ដែលលេងឲ្យក្លឹបរុស្ស៊ី Akhmat Grozny។

កីឡាករអ៊ីរ៉ង់ ហ្វឹកហាត់ត្រៀមប៉ះព័រទុយហ្គាល់ យប់នេះ

ប្រវត្តិជួបគ្នា

ព័រទុយហ្គាល់ និងអ៊ីរ៉ង់ ធ្លាប់ជួបគ្នាម្ដង កាលពី World Cup ឆ្នាំ២០០៦។ លទ្ធផលពេលនោះ គឺព័រទុយហ្គាល់ ឈ្នះ អ៊ីរ៉ង់ ២-០។ អ្វីដែលគួរឲ្យចាប់អារម្មណ៍ គឺ ១គ្រាប់ក្នុងចំណោម ២គ្រាប់នោះ ស៊ុតបញ្ចូលទីដោយ Cristiano Ronaldo ដែលជាគ្រាប់បាល់ទី១ សម្រាប់ Ronaldo នៅក្នុងព្រឹត្តិការណ៍ FIFA World Cup។

Ronaldo (លេខ១៧) អបអរជាមួយមិត្តរួមក្រុម ក្រោយស៊ុតបញ្ចូលទីគ្រាប់ដំបូងរបស់ខ្លួននៅ World Cup ពេលប៉ះអ៊ីរ៉ង់ នៅ World Cup 2006

លទ្ធផល៥ប្រកួតចុងក្រោយនៃក្រុមទាំង២

ព័រទុយហ្គាល់៖ ឈ្នះ២ ស្មើ៣។ ២ប្រកួតនៅ World Cup 2018 គឺស្មើអេស្ប៉ាញ ៣-៣ និងឈ្នះម៉ារ៉ុក ១-០។

អ៊ីរ៉ង់៖ ឈ្នះ៣ ចាញ់២។ ២ប្រកួតនៅ World Cup 2018 គឺចាញ់អេស្ប៉ាញ ១-០ និងឈ្នះម៉ារ៉ុក ១-០។

ជម្រើស១១នាក់ដំបូង ដែលអាចចូលលេង

ព័រទុយហ្គាល់៖ Rui Patricio; Pepe, Jose Fonte, Raphael Guerreiro; Cedric Soares, William Carvalho, Joao Moutinho, Bernardo Silva, Joao Mario; Goncalo Guedes, Cristiano Ronaldo

Ronaldo អបអរ ក្រោយស៊ុតបញ្ចូលទីអេស្ប៉ាញ កាលពីប្រកួតដំបូងពូល B

អ៊ីរ៉ង់៖ Ali Beiranvand; Ehsan Haji Safi, Morteza Pouraliganji, Ramin Rezaeian, Majid Hosseini; Saeid Ezatolahi, Vahid Amiri, Omid Ebrahimi, Karim Ansarifard, Mehdi Taremi; Sardar Azmoun

Karim Ansarifard និង Mehdi Taremi អបអរក្រោយអ៊ីរ៉ង់ យកឈ្នះម៉ារ៉ុកចុងម៉ោង កាលពីប្រកួតទី១ ពូល B

រឿងរ៉ាវគួរដឹង ទាក់ទងក្រុមទាំង២

អ៊ីរ៉ង់ មិនដែលឈ្នះក្រុមអឺរ៉ុប នៅ World Cup នោះទេ (ចាញ់៦ ស្មើ១)។
អ៊ីរ៉ង់ មិនធ្លាប់ឈ្នះការប្រកួតចុងក្រោយក្នុងពូល នៅ World Cup នោះទេ (ស្មើ១ ចាញ់៣)
អ៊ីរ៉ង់ មិនធ្លាប់ឈ្នះ ២ប្រកួតក្នុងពូល នៅ World Cup នោះទេ។
គ្រូបង្វឹកអ៊ីរ៉ង់បច្ចុប្បន្ន គឺលោក Carlos Queiroz ធ្លាប់ដឹកនាំព័រទុយហ្គាល់ កាលពីឆ្នាំ World Cup 2010។ នៅពេលនោះ លោកជួយឲ្យព័រទុយហ្គាល់ ឈ្នះកូរ៉េខាងជើង ៧-០ ដែលជាជ័យជម្នះធំបំផុតរបស់ព័រទុយហ្គាល់ ក្នុងប្រវត្តិ World Cup។
ព័រទុយហ្គាល់ ឈ្នះ ៣ប្រកួត ក្នុងចំណោម ៤ប្រកួត ពេលប៉ះក្រុមមកពីអាស៊ី (ធ្លាប់ចាញ់កូរ៉េខាងត្បូង កាលពី World Cup 2002)។

ទស្សនៈរបស់ [ខ្លីៗ]៖ ព័រទុយហ្គាល់ ៣-០ អ៊ីរ៉ង់

អត្ថបទ៖ សុខ សុវត្ថិ