World Cup ពូល D៖ អាហ្សង់ទីន ធ្លាក់ ឬ ជាប់ ត្រូវកាត់សេចក្ដីយប់នេះ

2018-06-26 08:03:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ពូល D នឹងត្រូវប្រកួតបញ្ចប់នាម៉ោង ១យប់នេះ ដោយអាហ្សង់ទីន ត្រូវប៉ះ នីហ្សេរីយ៉ា ចំណែកក្រូអាត ជួប អ៊ីស្លង់។ ២ប្រកួតកន្លងមក ក្រូអាត បានកក់កៅអីវគ្គ១៦ក្រុមចុងក្រោយរួចជាស្រេចហើយ ដោយរកបាន ៦ពិន្ទុពេញ ខណៈក្រុម៣ទៀត គឺ នីហ្សេរីយ៉ា (៣ពិន្ទុ), អ៊ីស្លង់ (១ពិន្ទុ)និង អាហ្សង់ទីន (១ពិន្ទ) ត្រូវប្រជែងគ្នា យកកៅអី១ដែលនៅសល់។

អាហ្សង់ទីន ដែលមានតារាឆ្នើម Lionel Messi ត្រូវការឈ្នះនីហ្សេរីយ៉ាជាដាច់ខាត ដើ់ម្បីបន្តទៅវគ្គ ១៦ក្រុមចុងក្រោយ ប៉ុន្តែក្រុមនេះ ត្រូវការឈ្នះលើសពី១គ្រាប់ ក្នុងករណីអ៊ីស្លង់ ឈ្នះ ក្រូអាត ដែរនោះ ព្រោះអ៊ីស្លង់ កំពុងមានសំណល់គ្រាប់បាល់ (Goal Difference) ល្អជាងអាហ្សង់ទីន ១គ្រាប់។ ប៉ុន្តែបើបានត្រឹមស្មើ អាហ្សង់ទីន នឹងត្រូវធ្លាក់ ដោយមិនចាំបាច់អ៊ុតលទ្ធផលរវាងអ៊ីស្លង់ និងក្រូអាតនោះទេ ដោយសារនីហ្សេរីយ៉ា មាន ៣ពិន្ទុក្នុងដៃស្រាប់។

តើដំណើរលើវិថី FIFA World Cup 2018 របស់ក្រុមជើងឯករង FIFA World Cup 2014 នឹងត្រូវបញ្ចប់ត្រឹមយប់នេះ ឬយ៉ាងណា?

បើមើលលើជើងកីឡាករ នីហ្សេរីយ៉ា មិនមានកីឡាកររបួសនោះទេ ប៉ុន្តែគ្រូបង្វឹក Gernot Rohr ទំនងជាមិនប្រើទម្រង់ ៣-៥-២ ដូចពេលយកឈ្នះអ៊ីស្លង់នោះទេ។ យ៉ាងណាក្ដី លោកគ្រូ នឹងដាក់ជម្រើស ១១នាក់ដំបូងដដែល។

ចំណែកអាហ្សង់ទីន ក៏មិនមានបញ្ហាកីឡាកររបួស ឬជាប់បម្រាមនោះដែរ ប៉ុន្តែអ្នកចាំទី Willy Caballero ដែលបង្កកំហុសពេលចាញ់ក្រូអាត ទំនងជាត្រូវជំនួសដោយអ្នកចាំទី Franco Armani (River Plate)។

ងាកទៅមើលប្រវត្តិជួបគ្នាវិញ ក្រុមទាំង២ ធ្លាប់ជួបគ្នាជាច្រើនដងមកហើយ ទាំងក្នុងប្រកួតមិត្តភាព ទាំងក្នុងការប្រកួត World Cup។ ជួបគ្នាលើកចុងក្រោយ នីហ្សេរីយ៉ា ឈ្នះ អាហ្សង់ទីន ៤-២ ក្នុងជំនួបមិត្តភាព កាលពីខែវិច្ឆិកា ឆ្នាំ២០១៧។ កាលពី World Cup 2014 និង World Cup 2010 ក្រុមទាំង២ ក៏ជួបគ្នាដែរ ដោយអាហ្សង់ទីនឈ្នះទាំង២ ដង គឺឈ្នះ ៣-២ ឆ្នាំ២០១៤ និងឈ្នះ ១-០ ឆ្នាំ ២០១០។

ទស្សនៈរបស់ [ខ្លីៗ]៖ អាហ្សង់ទីន ១-០ នីហ្សេរីយ៉ា , ក្រូអាត ០-០ អ៊ីស្លង់

អត្ថបទ៖ សុខ សុវត្ថិ