World Cup៖ ជោគវាសនាក្រុមទាំង ៤ ក្នុងពូល F នឹងត្រូវសម្រេចនៅយប់នេះ!

2018-06-27 08:16:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជោគវាសនាក្រុមទាំង ៤ ក្នុងពូល F នឹងត្រូវដឹង នៅក្រោយការប្រកួតកាត់សេចក្ដី នាម៉ោង ៩យប់នេះ។ ក្រុមឈរលើគេក្នុងពូល ម៉ិកស៊ីកូ ត្រូវជួបស៊ុយអែត ខណៈក្រុមការពារតំណែងជើងឯកអាល្លឺម៉ង់ ប៉ះជើងខ្លាំងអាស៊ីដែលកំពុងឈរបាតពូល កូរ៉េខាងត្បូង។

៤ក្រុមក្នុងពូលនេះ នៅមិនទាន់មានក្រុមណាមួយបានជាប់ស្វ័យប្រវត្តិ ឬធ្លាក់ស្វ័យប្រវត្តិនោះទេ។ ឆ្លងកាត់២ប្រកួតកន្លងមក ម៉ិកស៊ីកូ រកបាន ៦ពិន្ទុ ប៉ុន្តែមិនទាន់គ្រប់គ្រាន់ក្នុងការកក់កៅអីវគ្គ ១៦ក្រុមចុងក្រោយនោះឡើយ ខណៈកូរ៉េខាងត្បូង ដែលមិនទាន់មានពិន្ទុរាប់នឹងគេនោះ ក៏មិនទាន់អស់ឱកាសដែរ។ ហេតុអ្វី? ចម្លើយមានដូចខាងក្រោម៖

- ម៉ិកស៊ីកូ (ឈ្នះទាំង ២ប្រកួត មាន ៦ពិន្ទុ) មិនទាន់ជាប់ ដោយសារ៖

ម៉ិកស៊ីកូ ត្រូវការត្រឹមស្មើក៏ជាប់ ឬចាញ់ក៏ជាប់ដែរ ក្នុងករណីអាល្លឺម៉ង់ មិនអាចយកឈ្នះកូរ៉េខាងត្បូង។ ប៉ុន្តែក្រុមនេះ នៅតែអាចធ្លាក់ ក្នុងករណី ម៉ិកស៊ីកូខ្លួនឯង ប្រកួតចាញ់ស៊ុយអែតយប់នេះ ហើយ អាល្លឺម៉ង់ ឈ្នះ កូរ៉េខាងត្បូង (ក្នុងករណីនេះ ម៉ិកស៊ីកូ នឹងមាន ៦ពិន្ទុដដែល ខណៈស៊ុយអែត និងអាល្លឺម៉ង់ ឡើងដល់ ៦ពិន្ទុដែរ)។ បើករណីនេះកើតឡើងមែន ក្រុមទាំង៣ នឹងត្រូវកាត់សេចក្ដី ដោយមើលលើគ្រាប់បាល់ចំណេញ (២ប្រកួតកន្លងមក ម៉ិកស៊ីកូ (+២), អាល្លឺម៉ង់ (០) និង ស៊ុយអែត (០)។ ក្រុម១ ដែលមានគ្រាប់បាល់ចំណេញតិចជាងគេ នឹងត្រូវធ្លាក់។

- កូរ៉េខាងត្បូង (ចាញ់ទាំង២ ប្រកួត មាន ០ពិន្ទុ) មិនទាន់ធ្លាក់ ដោយសារ៖

ទោះមិនទាន់មានពិន្ទុសោះ ប៉ុន្តែកូរ៉េខាងត្បូង មិនទាន់ធ្លាក់ដោយស្វ័យប្រវត្តិនោះទេ។ ក្រុមនេះ នឹងអាចមានឱកាស ឡើងទៅវគ្គ ១៦ ក្រុមចុងក្រោយ ក្នុងករណី កូរ៉េខាងត្បូងខ្លួនឯង ប្រកួតឈ្នះអាល្លឺម៉ង់ ហើយម៉ិកស៊ីកូ ឈ្នះស៊ុយអែត (ក្នុងករណីនេះ កូរ៉េខាងត្បូង នឹងឡើងដល់ ៣ពិន្ទុ ខណៈអាល្លឺម៉ង់ និងស៊ុយអែត នៅតែ ៣ពិន្ទុដដែល)។ បើករណីនេះកើតឡើងមែន ក្រុមទាំង៣ នឹងត្រូវកាត់សេចក្ដី ដោយមើលលើគ្រាប់បាល់ចំណេញ (២ប្រកួតកន្លងមក អាល្លឺម៉ង់ (០) ស៊ុយអែត (០) កូរ៉េខាងត្បូង (-២)។ ក្រុម២ ដែលមានគ្រាប់បាល់ចំណេញតិចជាងគេ នឹងធ្លាក់ ឯក្រុមមួយទៀត នឹងឡើងក្នុងនាមជាក្រុមលេខ២ ក្នុងពូល។

តើប្រិយមិត្ត គិតថាក្រុម២ណា នឹងឡើង ហើយក្រុម២ណា នឹងធ្លាក់? ខ្លីៗ សូមវិភាគត្រួសៗ ជូនប្រិយមិត្តដូចខាងក្រោម៖

កូរ៉េខាងត្បូង vs អាល្លឺម៉ង់

កូរ៉េខាងត្បូង នឹងអវត្តមានប្រធានក្រុម Ki Sung-yoeng ដែលសារបញ្ហារបួសសាច់ដុំកំភួនជើង។ ចំណែកអាល្លឺម៉ង់ នឹងអវត្តមានខ្សែការពារ Jerome Boateng ដោយសារជាប់បម្រាម ក្រោយទទួលកាតក្រហម ពេលអាល្លឺម៉ង់ ឈ្នះស៊ុយអែត ២-១។ ក្រៅពី Boateng អាល្លឺម៉ង់ នឹងអវត្តមានខ្សែបម្រើមួយរូបទៀត គឺ Sebastian Ruby ដែលរបួសបាក់ឆ្អឹងច្រមុះ ពេលប៉ះស៊ុយអែត។

ប្រវត្តិជួបគ្នា៖ ក្រុមទាំង២ ធ្លាប់ប៉ះគ្នា ៣ដង ដែលជាលទ្ធផលគឺអាល្លឺម៉ង់ ឈ្នះ២ដង កូរ៉េខាងត្បូង ឈ្នះម្ដង។ ប្រកួតចុងក្រោយបំផុត កាលពីឆ្នាំ២០០៤ កូរ៉េខាងត្បូង ឈ្នះ អាល្លឺម៉ង់ ៣-១ ក្នុងជំនួបមិត្តភាព។ ជំនួប២ដងទៀត កើតឡើងនៅ World Cup 2002 (អាល្លឺម៉ង់ ឈ្នះ ១-០) និង World Cup 1994 (អាល្លឺម៉ង់ ឈ្នះ ៣-២)។

ម៉ីកស៊ីកូ vs ស៊ុយអែត

ដោយសារមានភាគរយជាប់ខ្ពស់ជាងគេ គ្រូបង្វឹករបស់ម៉ិកស៊ីកូ លោក Juan Carlos Osorio ទំនងជាផ្លាស់ប្ដូរកីឡាករសំខាន់មួយចំនួន ដើម្បីបានសម្រាក។ ក្រុមនេះ មិនមានកីឡាកររបួស ឬ ជាប់បម្រាមនោះទេ។ ចំណែកស៊ុយអែត ក៏មិនមានបញ្ហាអវត្តមានកីឡាករដែរ។

ប្រវត្តិជួបគ្នា៖ ក្រុមទាំង២ ធ្លាប់ជួបគ្នា ៤ដង ដែលជាលទ្ធផល គឺ ម៉ិកស៊ីកូ ឈ្នះម្ដង ស៊ុយអែត ឈ្នះ២ដង និងស្មើម្ដង។ ប្រកួតចុងក្រោយ កាលពីឆ្នាំ ២០០៩ គឺស៊ុយអែត ឈ្នះ ម៉ិកស៊ីកូ ១-០ (ប្រកួតមិត្តភាព)។ បើគិតតែ World Cup ក្រុមទាំង២ ធ្លាប់ជួបគ្នាម្ដង កាលពី World Cup 1958 (ស៊ុយអែត ឈ្នះ ម៉ិកស៊ីកូ ៣-០)។

ការទស្សន៍ទាយរបស់ [ខ្លីៗ]៖ កូរ៉េខាងត្បូង ០-២ អាល្លឺម៉ង់ , ម៉ិកស៊ីកូ ១-១ ស៊ុយអែត

អត្ថបទ៖ សុខ សុវត្ថិ