ក្រុមការពារតំណែងជើងឯកទាំង ៥ ដែលធ្លាក់ត្រឹមវគ្គចែកពូល ក្នុងប្រវត្តិសាស្រ្ដ World Cup

2018-06-28 04:43:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាល្លឺម៉ង់ ដែលជាក្រុមឈ្នះជើងឯក FIFA World Cup 2014 បានធ្វើឲ្យពិភពបាល់ទាត់ភ្ញាក់ផ្អើល ក្រោយធ្លាក់ត្រឹមវគ្គចែកពូល FIFA World Cup 2018 កាលពីយប់មិញ (២៧ មិថុនា ២០១៨)។ ប៉ុន្តែ ក្រុមនេះមិនមែនជាក្រុមទី១ នោះទេ ដែលធ្លាក់ក្នុងពូល ក្នុងនាមជាក្រុមការពារតំណែងជើងឯក។

ក្រុមការពារតំណែងជើងឯក FIFA World Cup ចំនួន ៥ ដែលធ្លាក់ក្នុងពូល៖

១. ប្រេស៊ីល (ឈ្នះជើងឯក ឆ្នាំ១៩៦២ ធ្លាក់ក្នុងពូល ឆ្នាំ ១៩៦៦)

ប្រេស៊ីល បានឈ្នះជើងឯកបាល់ទាត់ពិភពលោក ជាលើកទី២ កាលពីឆ្នាំ១៩៦២ នៅទឹកដីឈីលី ក្រោយបំបាក់ក្រុមឆេកូស្លូវ៉ាគី ៣-១ ក្នុងវគ្គផ្ដាច់ព្រ័ត្រ។ ប៉ុន្តែ ៤ឆ្នាំបន្ទាប់ ក្នុងនាមជាក្រុមការពារតំណែងជើងឯក ប្រេស៊ីល បានធ្លាក់ត្រឹមវគ្គចែកពូល ក្រោយរកបានតែ២ពិន្ទុ ក្នុង៣ប្រកួត ពោលគឺឈ្នះ១ ចាញ់២ (ជំនាន់នោះ ឈ្នះបាន ២ពិន្ទុ មិនមែន ៣ពិន្ទុនោះទេ)។ ក្នុងពូលនោះ ព័រទុយហ្គាល់ និងហុងគ្រី បានឡើងវគ្គបន្ត ខណៈប្រេស៊ីល និងប៊ុលហ្គារី ធ្លាក់។

២. បារាំង (ឈ្នះជើងឯក ឆ្នាំ១៩៩៨ ធ្លាក់ក្នុងពូល ឆ្នាំ ២០០២)

បារាំង បានឈ្នះជើងឯកបាល់ទាត់ពិភពលោក ជាលើកដំបូងក្នុងប្រវត្តិសាស្រ្ដរបស់ខ្លួន កាលពីឆ្នាំ១៩៩៨ លើទឹកដីខ្លួនឯង ក្រោយបំបាក់ប្រេស៊ីល ៣-០។ យ៉ាងណាក្ដី នៅឆ្នាំ២០០២ បារាំង បានធ្លាក់ត្រឹមវគ្គចែកពូល នៅលើទឹកដី ជប៉ុន/កូរ៉េខាងត្បូង ក្រោយរកបាន តែ១ពិន្ទុក្នុង៣ប្រកួត ឈរបាតតារាងពូល A។ ក្នុងពូលនោះ បារាំង បានចាញ់សេណេហ្គាល់ ចាញ់ដាណឺម៉ាក និងស្មើអ៊ុយរុយហ្គាយ។

៣. អ៊ីតាលី (ឈ្នះជើងឯក ឆ្នាំ ២០០៦ ធ្លាក់ក្នុងពូល ឆ្នាំ ២០១០)

អ៊ីតាលី បានឈ្នះពាន FIFA World Cup ជាលើកទី៤ នៅឆ្នាំ២០០៦ នៅទឹកដីអាល្លឺម៉ង់ ក្រោយយកឈ្នះបារាំង ដោយបាល់ប៉េណាល់ទីកាត់សេចក្ដី ក្នុងវគ្គផ្ដាច់ព្រ័ត្រ។ ប៉ុន្តែ ៤ឆ្នាំក្រោយមក អ៊ីតាលី បានធ្លាក់ចេញពីវគ្គសន្សំពិន្ទុតាមពូល ក្នុងនាមជាក្រុមការពារតំណែងជើងឯក។ នៅ World Cup 2010 លើទឹកដីអាហ្រ្វិកខាងត្បូង ក្រុមអ៊ីតាលី បានស្ថិតក្នុងពូល F ជាមួយប៉ារ៉ាហ្គាយ ស្លូវ៉ាគី និងនូវែលហ្សេឡង់ ហើយជាលទ្ធផលគឺអ៊ីតាលី ស្មើ២ (ស្មើប៉ារ៉ាហ្គាយ និងស្មើនូវែលហ្សេឡង់) និងចាញ់១ (ចាញ់ស្លូវ៉ាគី) មានតែ ២ពិន្ទុ ស្ថិតនៅបាតតារាងក្នុងពូល។

៤. អេស្ប៉ាញ (ឈ្នះជើងឯក ឆ្នាំ២០១០ ធ្លាក់ក្នុងពូល ឆ្នាំ ២០១៤

អេស្ប៉ាញ បានឈ្នះជើងឯក FIFA World Cup ជាលើកដំបូង នៅទឹកដីអាហ្រ្វិកខាងត្បូង ឆ្នាំ២០១០។ ៤ឆ្នាំបន្ទាប់ អេស្ប៉ាញ បានធ្លាក់ក្នុងពូលនៅ World Cup 2014 លើដីប្រេស៊ីល ក្រោយរកបានតែ ៣ពិន្ទុ ក្នុង៣ប្រកួតក្នុងពូល។ លទ្ធផលពេលនោះ គឺអេស្ប៉ាញ ចាញ់ហូឡង់ ចាញ់ឈីលី និងឈ្នះអូស្រ្ដាលី បានត្រឹមលេខ៣ក្នុងពូល។

៥. អាល្លឺម៉ង់ (ឈ្នះពានឆ្នាំ ២០១៤ ធ្លាក់ក្នុងពូលឆ្នាំ ២០១៨)

អាល្លឺម៉ង់ បានឈ្នះជើងឯកបាល់ទាត់ពិភពលោក ជាលើកទី៤ នៅឆ្នាំ២០១៤ លើទឹកដីប្រេស៊ីល ក្រោយយកឈ្នះអាហ្សង់ទីន ក្នុងម៉ោងបន្ថែម ១-០។ ប៉ុន្តែ ៤ឆ្នាំក្រោយមក ពោលគឺនៅ FIFA World Cup 2018 លើដីរុស្ស៊ី ក្រុមអាល្លឺម៉ង់ បានធ្លាក់ត្រឹមវគ្គចែកពូល ក្រោយរកបានតែ ៣ពិន្ទុ ក្នុងពូល F។ ៣ប្រកួតក្នុងពូល គឺអាល្លឺម៉ង់ ឈ្នះ១ ចាញ់២ (ឈ្នះស៊ុយអែត តែចាញ់ម៉ិកស៊ីកូ និងកូរ៉េខាងត្បូង) ស្ថិតនៅបាតតារាងក្នុងពូល៕

ចុចអាន៖ អាល្លឺម៉ង់ ដើរលើគន្លងអេស្ប៉ាញកាលពី៤ឆ្នាំមុន ដោយធ្លាក់ត្រឹមវគ្គចែកពូល

អត្ថបទ៖ សុខ សុវត្ថិ