Neymar ចេញវីដេអូសូមទោសចំពោះការធ្វើពុតរបស់ខ្លួន ដោយសារលុយ?

2018-08-02 07:06:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តារាបាល់ទាត់ប្រេស៊ីល Neymar ត្រូវបានរាយការណ៍ថា ទទួលបានប្រាក់ចំនួន ២៦៦០០០ ដុល្លារអាមេរិក ពីក្រុមហ៊ុន Gillette សម្រាប់ការបង្ហាញខ្លួនក្នុងវីដេអូមួយ ដោយធ្វើការសារភាពចំពោះការធ្វើពុតរបស់ខ្លួន កាលពី FIFA World Cup នៅប្រទេសរុស្ស៊ី កន្លងទៅ។

Neymar ស្រែកឈឺចាប់ ពេលដួលនៅលើទីលាន អំឡុង FIFA World Cup នៅរុស្ស៊ី (រូបថត៖ Reuters)

វីដេអូដែលត្រូវបានបង្ហោះលើគណនី Twitter ផ្លូវការរបស់ Neymar កាលពីថ្ងៃអាទិត្យកន្លងទៅ បានបង្ហាញពីការឆ្លើយតបនឹងការរិះគន់ពីអ្នកស្នេហាកីឡាបាល់ទាត់នៅជុំវិញពិភពលោក។

ជាមួយនឹងវីដេអូដែលមានរយៈពេល ៩០វិនាទីនោះ Neymar បានសរសេរថា៖ «អ្នកប្រហែលជាគិតថា ខ្ញុំធ្វើពុតពេកហើយ។ ពេលខ្លះខ្ញុំធ្វើពុតពិតមែន តែតាមការពិត គឺខ្ញុំឈឺចាប់ខ្លាំងណាស់នៅលើទីលាន។ អ្នកប្រហែលជាគិតថា ខ្ញុំដួលច្រើនពេកហើយ តែតាមការពិតខ្ញុំមិនមែនដួលទេ គឺខ្ញុំដូចត្រូវគេហែកជាចម្រៀកៗ។ វាត្រូវការពេលយូរណាស់ដើម្បីទទួលយកការរិះគន់របស់អ្នក។ ខ្ញុំបានប្រើពេលយ៉ាងយូរដើម្បីឆ្លុះកញ្ចក់ ហើយប្រែក្លាយខ្លួនជាមនុស្សថ្មីម្នាក់ទៀត»។

យោងតាមសារព័ត៌មាន The Sun ដកស្រង់ពីសារព័ត៌មាន O Globo នៅប្រេស៊ីល បានឲ្យដឹងថា Neymar និងក្រុមរបស់គេ បានយល់ស្របយ៉ាងឆាប់រហ័សចំពោះគំនិតបង្កើតវីដេអូខាងលើ។

ការបង្ហោះរបស់ Neymar នៅលើ Twitter

គួរដឹងដែរថា Neymar បានចំណាយពេលអស់ ១៤នាទី ដេកដួលនៅលើទីលាន អំឡុងព្រឹត្តិការណ៍ World Cup ដែលបានបញ្ចប់កាលពីពាក់កណ្ដាលខែកក្កដាកន្លងទៅ។ សកម្មភាពនេះ ត្រូវបានគេចោទថា ភាគច្រើនជាការធ្វើពុតរបស់ Neymar តែប៉ុណ្ណោះ។ យ៉ាងណាក៏ដោយ នេះជាការដួលយូរបំផុតមួយ នៅ World Cup ៕

ទស្សនាវីដេអូសារភាពរបស់ Neymar