ទូតអាមេរិក៖ អគារសុខភាពថ្មីនៅខេត្តពោធិ៍សាត់ បង្ហាញភាពជាដៃគូដ៏រឹងមាំរវាងប្រទេសទាំង២
- 2018-08-15 02:00:33
- ចំនួនមតិ 0 | ចំនួនចែករំលែក 0
ទូតអាមេរិក៖ អគារសុខភាពថ្មីនៅខេត្តពោធិ៍សាត់ បង្ហាញភាពជាដៃគូដ៏រឹងមាំរវាងប្រទេសទាំង២
ចន្លោះមិនឃើញ
លោក William Heidt ឯកអគ្គរដ្ឋទូតអាមេរិកប្រចាំនៅកម្ពុជា បានថ្លែងថា អគារសម្ភពថ្មីនៃមន្ទីរពេទ្យបង្អែកស្រុកក្រគរ ខេត្តពោធិ៍សាត់ គឺជាភស្តុតាងជាក់ស្តែង បង្ហាញនូវភាពជាដៃគូ ដ៏រឹងមាំរវាងសហរដ្ឋអាមេរិក និងកម្ពុជា ក្នុងការធ្វើឱ្យកាន់តែប្រសើរឡើងនូវសេវាសុខាភិបាលនៅទូទាំងប្រទេសកម្ពុជា។ លោកថ្លែងដូច្នេះ ក្នុងពិធីសម្ពោធដាក់ឱ្យប្រើប្រាស់អគារសម្ភពថ្មីនេះ កាលពីថ្ងៃទី១៤ ខែសីហា ឆ្នាំ២០១៨។
លោកបាននិយាយថា អាគារមណ្ឌលសុខភាពដែលមាន១១បន្ទប់នេះ នឹងនាំមកជូនប្រជាពលរដ្ឋប្រមាណជា ៩ម៉ឺននាក់ក្នុងស្រុកក្រគរ និងស្រុកជិតខាងមួយចំនួនទៀត ដើម្បីលើកកម្ពស់សេវាសុខាភិបាល។
អាគារសម្ភពដែលមានតម្លៃជាង៤៣ម៉ឺនដុល្លារអាមេរិក ត្រូវបានសម្ពោធដាក់ឲ្យប្រើប្រាស់ នៅមុនពេលដែលលោក William Heidt ត្រៀមបញ្ចប់អាណត្តិជាឯកអគ្គរដ្ឋទូតសហរដ្ឋអាមេរិកប្រចាំកម្ពុជា ក្នុងពេលប៉ុន្មានខែខាងមុខ។
ចំណែក លោក ម៉ម ប៊ុនហេង រដ្ឋមន្រ្តីក្រសួងសុខាភិបាល ដែលបានចូលរួមពិធីសម្ពោធនេះ ថ្លែងថា អាគារជំនួយរបស់សហរដ្ឋអាមេរិក គឺជាការរួមចំណែកយ៉ាងសំខាន់ក្នុងការលើកកម្ពស់សុមាលភាពស្រ្តី និងកុមារនៅកម្ពុជា។ លោកបន្ថែមថា ក្រសួងស្វាគមន៍រាល់ជំនួយដែលផ្តល់ដល់កម្ពុជា ពិសេសជំនួយពាក់ព័ន្ធនឹងការពង្រឹងផ្នែកសេវាសុខាភិបាល៕