លោក យូ ហុកគ្រី ថាការធ្វើត្រាថ្មី មិនមែនដើម្បីធ្វើបក្សប្រហារបណ្តេញសម្តេចក្រុមព្រះទេ

2018-08-23 03:23:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក យូ ហុកគ្រី អតីតអនុប្រធានគណបក្សហ៊្វុនស៊ិនប៉ិច បានបដិសេធថា ការធ្វើត្រាគណបក្សថ្មី មិនមែនដើម្បីធ្វើបក្សប្រហារបណ្តេញសម្តេចក្រុមព្រះ នរោត្តម រណឫទ្ធិ ចេញពីបក្សនោះទេ។ ការបញ្ជាក់នេះ នៅក្នុងសន្និសីទកាសែតនាព្រឹកថ្ងៃទី២៣ ខែសីហានេះ នៅសណ្ឋាគារសាន់វ៉េ។

លោក យូ ហុកគ្រី អះអាងថា ការធ្វើត្រាថ្មីនេះ គឺដើម្បីប្រើសម្រាប់កិច្ចការគណបក្សមួយចំនួនដូចជា៖ ការផ្ទេរសិទ្ធិឱ្យមេធាវីការពារសំណុំរឿងក្តីគ្រោះចរាចរណ៍របស់សម្តេចក្រុមព្រះ និងអ្នកម្នាង នៅខេត្តព្រះសីហនុ និងការធ្វើលិខិតស្នើទៅក្រសួងមហាផ្ទៃ ឱ្យស៊ើបអង្កេតករណីគ្រោះថ្នាក់ចរាចរណ៍ និងការចេញលិខិតថ្លែងអំណរគុណដល់សមាជិក សមាជិកាគណបក្សដែលបានបោះឆ្នោតគាំទ្រគណបក្សជាដើម។

សូមរំលឹកថា កាលពីដើមខែសីហានេះ លោក យូ ហុកគ្រី ដែលពេលនោះកំពុងស្ថិតក្នុងតំណែងជាអនុប្រធានគណបក្សហ៊្វុនស៊ិនប៉ិច បានជូនដំណឹងទៅក្រសួងមហាផ្ទៃ អំពីការប្រើប្រាស់ត្រាមូលថ្មីរបស់គណបក្ស។

ក្នុងលិខិតជូនដំណឹងនោះ បានបញ្ជាក់ថា កន្លងមក គណបក្សហ៊្វុនស៊ិនប៉ិច មានត្រាមូលរបស់ប្រធានគណបក្ស ដើម្បីប្រើប្រាស់ជាផ្លូវការលើលិខិតរដ្ឋបាល។ ប៉ុន្តែបន្ទាប់ពីសម្តេចក្រុមព្រះ ដែលជាប្រធានគណបក្ស យាងទៅព្យាបាលព្រះសុខភាពនៅក្រៅប្រទេសដោយសារគ្រោះថ្នាក់ចរាចរណ៍ ត្រាមូលនោះ ត្រូវបានបាត់បង់រកមិនឃើញឡើយ។ ដូច្នេះគណបក្សហ៊្វុនស៊ិនប៉ិច បានសម្រេចធ្វើត្រាមូលថ្មីមួយទៀតសម្រាប់ប្រើប្រាស់ជាផ្លូវការ ដោយចាត់ទុកត្រាចាស់ដែលបានបាត់បង់នោះ ជាមោឃៈ។

សូមបញ្ជាក់ដែរថា ការធ្វើសន្និសីទកាសែតនេះ ធ្វើឡើងដោយលោក យូ ហុកគ្រី លោក ប៉ោ ប៊ុនស្រ៊ឺ លោក វណ្ណ សុផាន់ណា និងលោក ញ៉េប ប៊ុនជិន បន្ទាប់ពីអ្នកទាំង៤នេះ ត្រូវបានដកតំណែង និងបញ្ចប់សមាជិកភាពពីគណបក្សហ៊្វុនស៊ិនប៉ិច៕

ចុចអានបន្ថែម៖

អត្ថបទ៖ សំភី