២កញ្ញា ១៩៤៥៖ ជប៉ុន ចុះហត្ថលេខាចុះចាញ់សង្គ្រាមលោកលើកទី២ ជាផ្លូវការ

2018-09-02 04:36:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពី ៧៣ឆ្នាំមុន ពោលគឺ នៅថ្ងៃទី២កញ្ញា ១៩៤៥ ជប៉ុន បានចុះហត្ថលេខាចុះចាញ់សង្គ្រាមលោកលើកទី២ ជាផ្លូវការ ក្រោយពេលអធិរាជជប៉ុន Hirohito បានប្រកាសចុះចាញ់សង្គ្រាមនៅថ្ងៃទី១៥សីហា ១៩៤៥។

លោក Maroru Shigemitsu រដ្ឋមន្រ្តីការបរទេសជប៉ុន និងលោកឧត្តមសេនីយ៍ Yoshijiro Umezu អគ្គមេបញ្ជាការកងទ័ពជប៉ុន គឺជាអ្នកចុះហត្ថលេខាចុះចាញ់សង្គ្រាមនៅលើនាវាអាមេរិក USS Missouri ដែលធ្វើឱ្យពិភពលោកទាំងមូល បានបញ្ចប់សង្គ្រាមលោកលើកទី២ទាំងស្រុង ចាប់ពីពេលនោះមក។

លោក Maroru Shigemitsu ចុះហត្ថលេខាចុះចាញ់សង្គ្រាម នៅថ្ងៃទី២កញ្ញា ១៩៤៥ លើនាវាអាមេរិក USS Missouri

ការប្រកាសចុះចាញ់សង្រ្គាមនេះ គឺក្រោយអាមេរិកបានទម្លាក់គ្រាប់បែកបរិមាណូចំនួន ២គ្រាប់ផ្ទួនៗគ្នា នៅក្រុងចំនួន២ របស់ជប៉ុន កាលពីថ្ងៃទី៦ និង ៩ ខែសីហា ឆ្នាំ១៩៤៥។

គ្រាប់បែកទី១ ឈ្មោះ Little Boy ត្រូវបានយន្តហោះ B-29 របស់អាមេរិក ទម្លាក់ទៅលើក្រុងហ៊ីរ៉ូស៊ីម៉ា បណ្តាលឱ្យមនុស្សប្រមាណ ១៤ម៉ឺននាក់ បានបាត់បង់ជីវិត។ ឯគ្រាប់បែកបរិមាណូទី២ ឈ្មោះ Fat Man ត្រូវបានយន្តហោះអាមេរិក ទម្លាក់ទៅលើក្រុងណាហ្គាសាគី បណ្តាលឱ្យមនុស្សពីជិត ៤ម៉ឺន ទៅ ៨ម៉ឺននាក់ បានបាត់បង់ជីវិតផងដែរ។

គួរកត់សម្គាល់ថា តាមសេចក្តីប្រកាសផតស្តាម (Potsdam Declaration) ចុះថ្ងៃទី២៦កក្កដា ១៩៤៥ អង់គ្លេស ចិន និងអាមេរិក បានទាមទារឱ្យកងទ័ពជប៉ុន ចុះចាញ់ដោយគ្មានលក្ខខណ្ឌ ពោលគឺឱ្យកងទ័ពជប៉ុន បោះបង់អាវុធទាំងស្រុង រួចអនុញ្ញាតឱ្យត្រឡប់ទៅផ្ទះរបស់ពួកគេវិញ រស់នៅដោយភាពសុខសាន្ត។ ប៉ុន្តែជប៉ុន មិនយល់ព្រមឡើយ ជាហេតុធ្វើឱ្យអាមេរិក ត្រូវបង្ខំចិត្តប្រើធម៌ក្តៅ ដោយមានការទម្លាក់គ្រាប់បែកបរិមាណូ ដល់ទៅ២ដងបែបនេះ ហើយក៏នឹងអាចមានការទម្លាក់គ្រាប់បែកបន្ថែមទៀតផងដែរ ប្រសិនបើជប៉ុន នៅតែចចែសមិនព្រមចុះចាញ់សង្គ្រាមទេនោះ៕

អត្ថបទទាក់ទង៖

ប្រភព៖ History ប្រែសម្រួល៖ សំភី