លោក គឹម សុខ ចាកចេញទៅក្រៅប្រទេស ក្រោយត្រូវបានដោះលែងចេញពីពន្ធនាគារ

2018-09-02 08:26:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក គឹម សុខ អ្នកវិភាគនយោបាយ និងសង្គម បានរត់គេចខ្លួនទៅក្រៅប្រទេសបាត់ហើយ កាលពីថ្ងៃទី៣០ ខែសីហា ឆ្នាំ២០១៨ គឺមួយថ្ងៃបន្ទាប់ពីសម្តេចនាយករដ្ឋមន្ត្រី ហ៊ុន សែន បានបញ្ជាឲ្យមេធាវីគណបក្សប្រជាជនកម្ពុជា តាមទារលុយសំណងជំងឺចិត្ត ៨០០លានរៀល។

បើតាមការចុះផ្សាយរបស់ VoA នៅថ្ងៃទី២កញ្ញានេះ ដោយដកស្រង់ចេញពីប្រភពដ៏គួរឱ្យទុកចិត្ត ក្នុងបណ្តាញសង្គមហ្វេសប៊ុក ឱ្យដឹងថា លោក គឹម សុខ និងកូនស្រីរបស់លោកម្នាក់ទៀត អាយុ ៦ឆ្នាំ បានភៀសខ្លួនដល់ទីមានសុវត្ថិភាពហើយ។ ប៉ុន្តែទោះជាយ៉ាងណា មិនទាន់មានការបញ្ជាក់ពីលោក គឹម សុខ ផ្ទាល់នៅឡើយ។

លោក គឹម សុខ (កណ្តាល) ក្រោយពេលត្រូវបានដោះលែងចេញពីពន្ធនាគារ កាលពីថ្ងៃទី១៧សីហា ២០១៨

សូមរំលឹកថា កាលពីថ្ងៃទី១៧ ខែសីហា លោក គឹម សុខ បានរួចទោស និងត្រូវបានដោះលែងចេញពីពន្ធនាគារ បន្ទាប់ពីលោកអនុវត្តទោសរយៈពេល ១ឆ្នាំកន្លះ ដោយសារសម្តេច ហ៊ុន សែន ប្តឹងរូបលោកថា បានចោទគណបក្សប្រជាជនកម្ពុជាជាអ្នកនៅពីក្រោយឃាតកម្មបាញ់សម្លាប់លោកបណ្ឌិត កែម ឡី។ ។

ប៉ុន្តែលោក គឹម សុខ នៅជាប់ក្នុងសំណុំរឿងមួយទៀតពីការចោទថា រដ្ឋាភិបាលសម្តេច ហ៊ុន សែន បង្កើតប្រព័ន្ធសម្លាប់មនុស្ស តែរកឃាតកមិនឃើញ។ សម្តេចនាយករដ្ឋមន្រ្តី ហ៊ុន សែន កាលពីថ្ងៃទី២៩ខែសីហា អះអាងថា លោក គឹម សុខ នៅមិនទាន់បង់ប្រាក់សំណងចំនួន៨០០លានរៀល ឬស្មើនឹងប្រមាណ២០ម៉ឺនដុល្លារ ឲ្យគណបក្សប្រជាជនកម្ពុជានៅឡើយទេ ក្រោយពេលចេញពីពន្ធនាគារក្នុងសំណុំរឿងទីមួយនោះ។

ជាការឆ្លើយតបលោក គឹម សុខ បានសរសេរនៅលើគណនីហ្វេសប៊ុករបស់លោកថា លោកគ្មានលុយសងសម្តេច ហ៊ុន សែន នោះទេ គឺមានតែបេះដូងស្នេហាជាតិមួយប៉ុណ្ណោះ៕

អត្ថបទទាក់ទង៖ សម្ដេច ហ៊ុន សែន បកស្រាយរឿងការរួចទោស និងបញ្ជាឲ្យមេធាវីតាមទារលុយ ៨០០លានរៀល

អត្ថបទ៖ សំភី