ក្រសួងមហាផ្ទៃ បកស្រាយរឿងពាក្យចចាមអារ៉ាមបង្កើតខេត្តថ្មី ចំនួន ៧

2018-09-04 08:51:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប្រាក់ សំអឿន អគ្គនាយកដ្ឋានរដ្ឋបាល នៃក្រសួងមហាផ្ទៃ បានបដិសេធថា ក្រសួងពុំបានសិក្សាបង្កើតខេត្តថ្មី ដល់ទៅ ៧ បន្ថែមទៀត ដូចពាក្យចចាមអារ៉ាម និងព័ត៌មានដែលគេបានចែកចាយបន្តគ្នាតាមបណ្ដាញសង្គមនោះទេ។

លោកបានថ្លែងបញ្ជាក់ប្រាប់ [ខ្លីៗ] នារសៀលថ្ងៃទី៤ ខែកញ្ញានេះថា៖ "ព័ត៌មាននោះជាព័ត៌មានមិនពិត ជាព័ត៌មានបំប៉ោង ធ្វើឲ្យសាធារណជនទូទៅមានការយល់ច្រឡំមកលើរាជរដ្ឋាភិបាល។ ក្នុងនាមជាអ្នកបច្ចេកទេស ខ្ញុំសូមធ្វើការបដិសេធនូវរាល់ព័ត៌មានទាំងអស់នោះ។ វាជាព័ត៌មានដែលធ្វើឲ្យមានការច្របូកច្របល់ដល់សាធារណជន និងធ្វើឲ្យមានការវាយប្រហាររាជរដ្ឋាភិបាល"។

លោក ប្រាក់ សំអឿន ថ្លែងប្រាប់ [ខ្លីៗ] នារសៀលថ្ងៃទី៤ ខែកញ្ញានេះ

លោក ប្រាក់ សំអឿន បានសង្កត់ធ្ងន់ថា ក្រសួងមហាផ្ទៃ បានស្នើសុំគោលការអនុញ្ញាតពីសម្តេចនាយករដ្ឋមន្ត្រី ហ៊ុន សែន ក្នុងការសិក្សាលទ្ធភាពបង្កើតខេត្តចំនួនពីរប៉ុណ្ណោះ។

សូមបញ្ជាក់ថា កាលពីថ្ងៃទី២៨ ខែសីហា ឆ្នាំ២០១៨ សម្ដេចនាយករដ្ឋមន្រ្តី ហ៊ុន សែន បានចារយល់ព្រមតាមសំណើររបស់ក្រសួងមហាផ្ទៃ ដែលបានស្នើសិក្សាលទ្ធភាពបង្កើតខេត្តថ្មី ចំនួន២ ដើម្បីជួយលើកកម្ពស់ប្រសិទ្ធភាពនៃការគ្រប់គ្រងរដ្ឋបាល ការថែរក្សាសន្ដិសុខសណ្ដាប់ធ្នាប់សាធារណៈ ការជំរុញអភិវឌ្ឍនៅមូលដ្ឋាន និងការផ្ដល់សេវាសាធារណៈជូនប្រជាពលរដ្ឋ។ ខេត្តថ្មីទីមួយ គឺបំបែកចេញពីខេត្តកណ្ដាល ចំណែកខេត្តថ្មីទីពីរ គឺដោយពិនិត្យលើកត្ដាភូមិសាស្រ្ត និងប្រជាសាស្រ្ដរបស់ស្រុកកោះញែក នៃខេត្តមណ្ឌលគិរី និងស្រុកលំផាត់ នៃខេត្តរតនគិរី៕

ចុចអាន៖ ក្រសួងមហាផ្ទៃ ស្នើបង្កើតខេត្តថ្មីចំនួន២

អត្ថបទ៖ សោភា