អាជ្ញាធរបើកកិច្ចប្រជុំ ដើម្បីជំរុញការបើកការដ្ឋានស្ពានអាកាសនៅច្រមុះជ្រូកក្បាលថ្នល់

2018-09-05 06:44:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធររាជធានីភ្នំពេញ បានបើកកិច្ចប្រជុំពិភាក្សាមួយ ជាមួយអាជ្ញាធរខណ្ឌ មន្ទីរជំនាញនិងមន្ត្រីជំនាញ និងតំណាងក្រុមហ៊ុនទទួលការសាងសង់ ដើម្បីជំរុញការបើកការដ្ឋានសាងសង់ស្ពានអាកាសថ្មីមួយកន្លែងទៀតនៅច្រមុះជ្រូកក្បាលថ្នល់។ កិច្ចប្រជុំនេះ ដឹកនាំដោយលោក មាន ចាន់យ៉ាដា អភិបាលរងរាជធានីភ្នំពេញ កាលពីរសៀលថ្ងៃទី៤កញ្ញា ២០១៨ នៅសាលារាជធានីភ្នំពេញ។

លោក មាន ចាន់យ៉ាដា បានធ្វើការណែនាំឱ្យអាជ្ញាធរដែនដី មន្ទីរជំនាញយកចិត្តទុកដាក់ដោះស្រាយផលប៉ះពាល់ ឱ្យបានលឿនទៅតាមអ្វីដែលអាចធ្វើបាន ដើម្បីធ្វើយ៉ាងណាឱ្យគម្រោងនេះឈានដល់ការបើកការដ្ឋានឆាប់ៗ ដោយហេតុថា តំបន់ខាងលើនេះ បាននឹងកំពុងប្រឈមនឹងការកកស្ទះចរាចរណ៍ជារៀងរាល់ថ្ងៃ។

កិច្ចប្រជុំស្តីពីការជំរុញដោះស្រាយផលប៉ះពាល់ ដើម្បីឈានដល់ការបើកការដ្ឋានសាងសង់ស្ពានអាកាស នៅច្រមុះជ្រូកក្បាលថ្នល់។ រូបថត៖ រស្មីកម្ពុជា

បើតាមមន្ត្រីរដ្ឋបាលរាជធានីភ្នំពេញ បញ្ជាក់ថា គម្រោងនេះត្រូវបានសិក្សារួចហើយ ពោលគឺនៅតែរឿងដោះស្រាយផលប៉ះពាល់ជាមួយប្រជាពលរដ្ឋតែប៉ុណ្ណោះ។ បើការដោះស្រាយត្រូវរ៉ូវគ្នាហើយនោះ រដ្ឋបាលរាជធានីភ្នំពេញនឹងចាប់ផ្តើមបើកការដ្ឋានតែម្តង។

គម្រោងសាងសង់ស្ពានអាកាសនេះ គឺស្ថិតនៅចំណុចប្រសព្វផ្លូវ៦០ម៉ែត្រ ផ្លូវព្រះមុនីវង្ស និងផ្លូវ២៧១ ជាប់ព្រំប្រទល់រវាងខណ្ឌមានជ័យ និងខណ្ឌចំការមន។

បច្ចុប្បន្ននេះ នៅក្នុងរាជធានីភ្នំពេញមានស្ពានអាកាសចំនួន៥ កន្លែងហើយរួមមាន៖ ១. ស្ពានអាកាសក្បាលថ្នល់នៅអតីតរង្វង់មូលក្បាលថ្នល់ ២. ស្ពានអាកាសស្ទឹងមានជ័យ ៣. ស្ពានអាកាស៧មករា ស្ថិតនៅស្តុបពេទ្យលោកសង្ឃ ៤. ស្ពានអាកាស៥មករា ស្ថិតនៅស្ដុបតិចណូ និង៥. ស្ពានអាកាស ស្តុបផ្សារដីហុយ។ ថ្មីៗនេះ រាជរដ្ឋាភិបាល ក៏ទើបតែបើកការដ្ឋានសាងសង់ស្ពានអាកាសនៅរង្វង់មូលចោមចៅផងដែរ៕

អត្ថបទទាក់ទង៖

ប្រភព៖ រស្មីកម្ពុជា ប្រែសម្រួល៖ សំភី