មហាសេដ្ឋីចិន Jack Ma សហស្ថាបនិក និងនាយកប្រតិបត្តិក្រុមហ៊ុន Alibaba នឹងចូលនិវត្តន៍។ នេះបើតាមការចុះផ្សាយរបស់សារព័ត៌មាន New York Times កាលពីថ្ងៃសុក្រ ទី៧ ខែកញ្ញា ឆ្នាំ​២០១៨។

New York Times បានចុះផ្សាយថា លោក Jack Ma នឹងលាលែងពីតំណែង នៅថ្ងៃទី១០ ខែកញ្ញា ឆ្នាំ​២០១៨ ដើម្បីបន្តការងារសប្បុរសធម៌ ក្នុងវិស័យអប់រំ។

យ៉ាងណាក៏ដោយ ក្រុមហ៊ុន Alibaba មិនទាន់ឆ្លើយតប ជុំវិញការចុះផ្សាយរបស់ New York Times នេះនៅឡើយទេ។

លោក Ma បានប្រាប់​ប្រភពខាងលើថា នេះមិនមែន​ជាការបញ្ចប់សករាជនោះទេ តែនេះជាសករាជថ្មីមួយទៀត។

ប្រភពដដែលបន្តថា ទោះបីជាលាឈប់ពីតំណែង​ជានាយកប្រតិបត្តិក៏ដោយ ក៏​លោក Ma នឹងបន្តក្នុងនាមជា​អ្នកប្រឹក្សាយោបល់ ណែនាំ នៅ Alibaba ដដែល៕