មនុស្សជាង៤លាននាក់ នៅហ្វីលីពីន កំពុងប្រឈមនឹងព្យុះ "មង្ឃុត"

2018-09-14 03:14:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មនុស្សប្រមាណជាង ៤លាននាក់ នៅក្នុងប្រទេសហ្វីលីពីន កំពុងប្រឈមមុខនឹងព្យុះ "មង្ឃុត" ពោលគឺពួកគេ ស្ថិតក្នុងតំបន់ដែលព្យុះទីហ្វុងនេះឆ្លងកាត់។ កាលពីថ្ងៃទី១៣កញ្ញាម្សិលមិញ អាជ្ញាធរបានជម្លៀសមនុស្សរាប់ម៉ឺននាក់ចេញពីផ្លូវរបស់ព្យុះនេះរួចមកហើយ។

បើតាមការចុះផ្សាយរបស់ CNN ឱ្យដឹងថា ព្យុះ "មង្ឃុត" បានក្លាយជាព្យុះដ៏ខ្លាំងបំផុតក្នុងឆ្នាំ២០១៨នេះ ដែលមានល្បឿនខ្យល់ដល់ ២៨៥គីឡូម៉ែត្រក្នុង១ម៉ោង គិតត្រឹមថ្ងៃទី១២កញ្ញា។

ហ្វីលីពីន ដែលទទួលរងគ្រោះពីខ្យល់ព្យុះនាពេលកន្លងមក (វិបសាយ៖ Actionaid)

មន្រ្តីឧតុនិយមហ្វីលីពីនបានព្យាករថា ព្យុះនេះនឹងវាយប្រហារខេត្តភាគឦសាន Cagayan នៅថ្ងៃទី១៥កញ្ញាស្អែកនេះ។ វានឹងនាំមកនូវភ្លៀងធ្លាក់ខ្លាំង ដែលអាចបង្កជាការបាក់ដី និងកើតមានគ្រោះទឹកជំនន់ផងដែរ។

ក្រៅពីនេះ ខេត្តចំនួន២៥ នៃកោះ Luzon ប្រទេសហ្វីលីពីន ក៏រងការព្រមានពីខ្យល់ព្យុះនេះដែរ។ ចំណែកការធ្វើដំណើរតាមផ្លូវអាកាស និងសមុទ្រ ត្រូវបានរឹតបន្តឹង។

ប្រទេសជាច្រើននៅអាស៊ីខាងកើត និងអាគ្នេយ៍ ដោយរួមទាំងកម្ពុជាផង បានចេញសេចក្តីជូនដំណឹងដល់ប្រជាជនរបស់ខ្លួន ដោយព្រមានអំពីឥទ្ធិពលនៃព្យុះ "មង្ឃុត" និងព្យុះមួយទៀតឈ្មោះ "បារីចាត"៕

អត្ថបទទាក់ទង៖ ព្យុះ "មង្ឃុត" និងព្យុះ "បារីចាត" នឹងធ្វើឲ្យកម្ពុជាមានភ្លៀងធ្លាក់ទូទាំងប្រទេស

ប្រភព៖ Bangkokpost ប្រែសម្រួល៖ សំភី