រកឃើញសំបុកត្រដក់តូច ជាលើកដំបូងនៅដែនជម្រកសត្វព្រៃកែវសីមា

2018-09-17 13:03:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អង្គការសមាគមអភិរក្សសត្វព្រៃ (WCS) បានប្រកាសនៅថ្ងៃទី១៧កញ្ញានេះថា ក្រុមស្រាវជ្រាវ និងត្រួតពិនិត្យតាមដានសត្វព្រៃប្រចាំដែនជម្រកសត្វព្រៃកែវសីមារបស់ខ្លួន បានរកឃើញជាលើកដំបូងនូវសំបុកសត្វត្រដក់តូចចំនួន ៦សំបុក ដែលបាននឹងកំពុងបង្កកំណើតនៅភាគខាងជើងក្នុងតំបន់នេះ កាលពីថ្ងៃទី១០ ខែសីហា ២០១៨។

សំបុកត្រដក់តូច ត្រូវបានរកឃើញនៅលើដើមឈើមួយ ក្នុងដែនជម្រកសត្វព្រៃកែវសីមា (រូបថត៖ អង្គការ WCS)

អង្គការ WCS ឱ្យដឹងបន្ថែមថា ត្រដក់តូចគឺជាសត្វស្លាបមាឌធំ មានកម្ពស់រហូតដល់ ១៣០សង់ទីម៉ែត្រ ហើយស្លាបរបស់វាទាំងសងខាងមានប្រវែង ជាង២ម៉ែត្រ។ ទោះបីជាចំនួនសត្វត្រដក់តូច នៅលើសាកលលោក មានប្រមាណជាង១ម៉ឺនក្បាលក៏ដោយ ក៏ចំនួននេះកំពុងតែមានការធ្លាក់ចុះយ៉ាងខ្លាំងនៅតំបន់អាស៊ី និងភាគខាងកើតនៃឧបទ្វីបឥណ្ឌា។ ដូច្នេះហើយ វាត្រូវបានគេចាត់ជាប្រភេទងាយរងគ្រោះជាសាកលនៅលើបញ្ជីក្រហមរបស់អង្គការ IUCN។

សត្វត្រដក់តូច ចូលចិត្តធ្វើសំបុកពងកូនជាបណ្ដុំជិតៗគ្នានៅលើដើមឈើខ្ពស់ៗ ដែលជាប្រភេទព្រៃល្បោះ និងព្រៃស្រោង។ តំបន់ខ្ពង់រាបភាគខាងជើងប្រទេសកម្ពុជា ក្នុងខេត្តព្រះវិហារគឺជាទីជម្រកពងកូនដ៏សំខាន់បំផុតរបស់ហ្វូងសត្វនេះ។

សត្វត្រដក់តូច ដែលជាប្រភេទសត្វងាយរងគ្រោះ (រូបថត៖ អង្គការ WCS)

លោក សូត្រ វ៉ាន់ឌឿន អ្នកសម្របសម្រួលផ្នែកស្រាវជ្រាវ និងត្រួតពិនិត្យតាមដានសត្វព្រៃរបស់អង្គការ WCS បាននិយាយថា ដែនជម្រកសត្វព្រៃកែវសីមា ក៏ជាទីជម្រកដ៏មានសារៈសំខាន់មួយបន្ថែមទៀតសម្រាប់សត្វត្រដក់តូច ក្នុងការរស់នៅ និងបង្កកំណើតផងដែរ ពីព្រោះនេះជាតំបន់សម្បូរទៅដោយប្រភេទព្រៃល្បោះ ព្រៃស្រោង វាលស្មៅ ត្រពាំង អូរ និងចំណីអាហារដែលវាចូលចិត្តដូចជា ត្រី កង្កែប ពពួកល្មូន ក្តាម ខ្យង និងពពួកសត្វល្អិត។

បច្ចុប្បន្ននេះ សកម្មភាពកាប់ទន្រ្ទានព្រៃឈើ បានបង្កជាការគំរាមកំហែង និងប៉ះពាល់យ៉ាងខ្លាំងដល់ជម្រក សំបុកពងកូនរបស់ត្រដក់តូចជាពិសេសនៅរដូវពងកូន។ ការការពារទីជម្រកពងកូន របស់ពួកវា ពិតជាចាំបាច់ខ្លាំងណាស់ដើម្បីធានាដល់ការរស់រាននៃប្រភេទសត្វកម្រមួយនេះ។ លោក សូត្រ វ៉ាន់ឌឿន លើកឡើងបន្ថែម។

ក្រុមស្រាវជ្រាវរបស់អង្គការនេះ នឹងបន្តស្វែងរកសំបុកត្រដក់តូច និងកំពុង ធ្វើការរួមគ្នាជាមួយសមាជិកសហគមន៍ ជាពិសេសមន្ទីរបរិស្ថានខេត្ត និងភាគីពាក់ព័ន្ធដទៃទៀត ដើម្បីការពារសំបុក និងទីតាំងពងកូនរបស់ពួកវា៕

អត្ថបទ៖ សំភី