មេធាវី ស្នើសុំ​ឱ្យ​ដោះស្រាយ​តាម​ផ្លូវ​នយោបាយ ដើម្បី​ដោះលែង​លោក កឹម សុខា

  • 2018-10-31 01:33:12
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ក្រុម​មេធាវី​លោក កឹម សុខា កំពុង​ពិនិត្យ​មើល​សំណុំរឿង​លោក កឹម សុខា និង​ភស្ដុតាង​ផ្សេងៗ នឹង​ដាក់​ទៅ​តុលាការ ដើម្បី​ដោះ​បន្ទុក​កូន​ក្ដី​របស់​ខ្លួន។ ទោះ​ជា​យ៉ាង​នេះ​ក្ដី ក្រុម​មេធាវី​បញ្ជាក់​ថា មាន​តែ​ការ​ដោះ​ស្រាយ​តាម​ផ្លូវ​នយោបាយ​ទេ ទើប​អាច​ឲ្យ​លោក កឹម សុខា មាន​សេរីភាព​ឡើង​វិញ​បាន​ឆាប់។ នេះបើ​តាមការ​ចុះផ្សាយ​របស់​វិទ្យុ​អាស៊ីសេរី កាលពី​ថ្ងៃទី៣០ ខែ​តុលា ឆ្នាំ​២០១៨។

លោក​មេធាវី ផែង ហេង មាន​ប្រសាសន៍​ថា សំណុំ​រឿង​លោក កឹម សុខា គឺ​ទាក់ទង​នឹង​រឿង​នយោបាយ ដែល​រឿង​នេះ​លោក​ទទួច​ឲ្យ​អ្នក​នយោបាយ​នៃ​គណបក្ស​ទាំង​ពីរ​ដោះ​ស្រាយ​តាម​ផ្លូវ​នយោបាយ​ដូច​ដែល​អ្នក​នយោបាយ​ខ្មែរ​ធ្លាប់​បាន​ធ្វើ ឬ​ដោះ​ស្រាយ​កន្លង​មក។

លោក កឹម សុខា ក្នុងពេលជួបម្តាយ និងក្រុមគ្រួសារ នៅផ្ទះរបស់លោក កាលពីថ្ងៃទី១៦កញ្ញា ២០១៨។ រូបថត៖ FB លោក យ៉ែម ប៉ុញ្ញារិទ្ធ

លោក​បញ្ជាក់​ថា ករណី​នយោបាយ​នេះ យក​មក​ដោះ​ស្រាយ​តាម​បែប​បច្ចេកទេស ដែល​ជា​ការ​លំបាក​ក្នុង​ការ​តតំាង​គ្នា​តាម​ផ្លូវ​ច្បាប់៖ «អ្វី​ដែល​យើង​តវ៉ា​នៅ​ក្នុង​តុលាការ​នោះ គឺ​សុទ្ធ​តែ​សំណុំ​រឿង​ក្រៅ​អង្គ​សេចក្ដី ហើយ​សំណុំ​រឿង​អង្គ​សេចក្ដី​នេះ យើង​មើល​ឃើញ​ថា រឿង​របស់​គាត់​មិន​អាច​បញ្ជួន​ទៅ​ជំនុំជម្រះ និង​ចោទ​ប្រកាន់​លោក កឹម សុខា បាន​ទេ ព្រោះ​ថា រឿង​គាត់​ក៏​ជា​អ្នក​នយោបាយ ហើយ​វោហាសាស្រ្ត​របស់​លោក​ក៏​ជា​វោហាសាស្រ្ត​នយោបាយ ហើយ​អ្នក​នយោបាយ​ខ្មែរ​តែង​តែ​មាន​ជម្លោះ គិត​ចាប់​ពី​ទសវត្ស​ឆ្នាំ១៩៧០ មក ពិសេស​ឆ្នាំ១៩៩៧ ជម្លោះ​របស់​សម្ដេច​ក្រុមព្រះ​រហូត​ដល់​មាន​ផ្ទុះ​អាវុធ​ដាក់​គ្នា​ទី​បញ្ចប់​នៅ​តែ​មាន​ដំណោះ​ស្រាយ ហើយ​ករណី​លោក កឹម សុខា នេះ គឺ​ជា​រឿង​តូចតាច​បំផុត»។

យ៉ាងណា​ក៏ដោយ វិទ្យុ​អាស៊ីសេរី មិនអាច​ទាក់ទង​អ្នកនាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន ដើម្បី​សួរ​អំពី​ការ​ដោះ​ស្រាយ​ករណី​លោក កឹម សុខា តាម​ផ្លូវ​នយោបាយ​នេះ​បាន​ទេ កាល​ពី​ថ្ងៃ​ទី២៩ តុលា។ ប៉ុន្តែ​លោក សុខ ឥសាន ធ្លាប់​ឲ្យ​ដឹង​កន្លង​មក​ថា សំណុំ​រឿង​លោក កឹម សុខា គឺ​ជា​ឆន្ទានុសិទ្ធិ​របស់​តុលាការ និង​មិន​ពាក់ព័ន្ធ​នឹង​រឿង​នយោបាយ​ឡើយ។

សូម​រំលឹក​ថា កាលពី​ព្រឹក​ទាបភ្លឺ​ថ្ងៃ១០​កញ្ញា លោក កឹម សុខា អតីត​ប្រធាន​នៃអតីត​គណបក្ស​សង្គ្រោះ​ជាតិ ត្រូវបាន​សាលា​ដំបូង​រាជធានី​ភ្នំពេញ សម្រេច​ដោះលែង​ចេញពី​ពន្ធនាគារ​ត្រពាំងផ្លុង ខេត្ត​ត្បូងឃ្មុំ។ លោក​​ត្រូវបាន​ដឹកមក​ដល់​គេហដ្ឋាន​របស់​លោក​វិញ​នៅ​ក្នុង​ខណ្ឌ​ទួលគោក រាជធានី​ភ្នំពេញ។ ការ​សម្រេច​​ដោះលែង​នេះ ដោយ​ផ្អែក​លើ​ហេតុផល​ខាង​សុខភាព និង​មាន​ការ​ធានា​ខាង​ផ្នែក​នីតិវិធី​ច្បាស់លាស់​ថា ជន​ត្រូវ​ចោទ​ឈ្មោះ កឹម សុខា នឹង​មិន​អាច​រត់​គេច​ខ្លួន​ពី​នីតិវិធី​តុលាការ​ឡើយ។

យ៉ាងណាមិញ សម្តេច​នាយក​រដ្ឋមន្រ្តី ហ៊ុន សែន បាន​បញ្ជាក់​កាលពី​ថ្ងៃទី​១៩ ខែ​កញ្ញា​ថា លោក កឹម សុខា មិន​ទាន់បាន​រួចទោស​ទាំងអស់​ទេ គ្រាន់តែ​ដូរ​ទីតាំង​ឃុំឃាំង​តែ​ប៉ុណ្ណោះ ដោយ​បារម្ភ​ខ្លាច​លោក​មាន​គ្រោះថ្នាក់​សុខភាព​ក្នុង​ពន្ធនាគារ ពោល​គឺ​ធ្វើឡើង​​​ក្នុងគោលដៅ​​មនុស្ស​ធម៌៕

អត្ថបទទាក់ទង

ប្រភព៖ Radio Free Asia ប្រែ​សម្រួល៖ សំភី

;