ទូក ង វែងជាងគេរបស់កម្ពុជា បំបែកឯតទគ្គកម្មពិភពលោកបានហើយ

2018-11-12 02:27:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ទូក ង វែងជាងគេប្រវែងជិត ១០០ម៉ែត្រ បានបំបែកឯតទគ្គកម្មពិភពលោក Guinness World Records នៅព្រឹកថ្ងៃទី១២ ខែវិច្ឆិកា ឆ្នាំ២០១៨នេះ។ លោក Pravin Patel ជាអ្នកវិនិច្ឆ័យ និងពិនិត្យវាយតម្លៃលក្ខណៈបច្ចេកទេសទូក ង វែងជាងគេ។

លោក Pravin Patel ជាអ្នកវិនិច្ឆ័យ និងពិនិត្យវាយតម្លៃលក្ខណៈបច្ចេកទេសទូក ង វែងជាងគេ បានផ្ដល់លិខិតបញ្ជាក់ទូក ង វែងជាងគេ ដល់កម្ពុជា តំណាងដោយលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា

ទូក ង មានប្រវែងសរុប ៨៧,៣០ ម៉ែត្រ ទទឹងធំបំផុតប្រវែង ១,៩៤ម៉ែត្រ និងជម្រៅទូក ០,៨០ ម៉ែត្រ។ ទូកនេះមានចំណុះទូកចំនួន ១៧៩ នាក់។

កម្មវិធីកំណត់ត្រាបំបែកឯតទគ្គកម្មពិភព លោក ទូក ង វែងជាងគេ បានប្រព្រឹត្តទៅនាព្រឹកថ្ងៃទី១២ ខែវិច្ឆិកា ឆ្នាំ២០១៨នេះ នៅតំបន់ទីប្រជុំជនអ្នកលឿងត្រើយខាងកើត ស្ថិតក្នុងឃុំព្រែកខ្សាយ ខ ស្រុកពាមរក៍ ខេត្តព្រៃវែង ដោយមានការចូលរួមពីតំណាង Guinness World Records ចុះមកពិនិត្យមើល វាយតម្លៃលក្ខណៈបច្ចេកទេស ខ្នាតរបស់ទូក និងការអុំបង្ហាញជាក់ស្តែង។

ទូក ង ដែលមានប្រវែង វែងជាងគេលើពិភពលោក ត្រូវបានប្រសិទ្ធនាមថា “កម្ពោជិកបុត្តាខេមរាតរី” ដែលមានន័យថា “ទូក ង របស់កូនខ្មែររស់នៅក្នុងដែនដីកម្ពុជា”។

ទូក ង នេះធ្វើពីឈើគគីរ ចំនួន ៦ដើម ហើយក្បាលទូក ឆ្លាក់ចេញជាក្បាលនាគ ឯកន្ទុយត្រូវបានឆ្លាក់ជាកន្ទុយហង្ស។ ការផលិត បានប្រើប្រាស់រយៈពេលចំនួន ១៩២ថ្ងៃ។

ការបង្ហាញ ទូក ង វែងជាងគេលើលោក នៅតំបន់ទីប្រជុំជនអ្នកលឿងត្រើយខាងកើត ស្ថិតក្នុងឃុំព្រែកខ្សាយ ខ ស្រុកពាមរក៍ ខេត្តព្រៃវែង នាព្រឹកថ្ងៃទី១២ ខែវិច្ឆិកា ឆ្នាំ២០១៨

លោក ស សុខា ប្រធានគណៈកម្មការផលិតទូក ង វែងជាងគេបានថ្លែងថា គោលបំណងសំខាន់ៗ នៃការផលិតទូក ង ដែលវែងជាងគេ គឺមាន ៣ចំណុចសំខាន់ៗ ដូចជា៖

១- រំឭកឡើងវិញនូវប្រវត្តិដ៏យូរលង់នៃការផលិត និងការប្រើប្រាស់ទូករបស់ខ្មែរតាំងពីសម័យបុរាណ ជាពិសេសរំឭកឡើងវិញនូវស្នាព្រះហស្តរបស់ព្រះមហាក្សត្រខ្មែរគ្រប់ជំនាន់ក្នុងការប្រើប្រាស់ទូក ជាមធ្យោបាយមួយក្នុងការការពារទឹកដី។

២- ជួយលើកតម្កើងកិត្យានុភាពជាតិ ដោយបង្ហាញពិភពលោកទាំងមូលឲ្យបានដឹងកាន់តែច្បាស់ថា កម្ពុជាអាចបង្កើតស្នាដៃដ៏អស្ចារ្យមួយ។

៣- ជំរុញស្មារតីស្នេហាជាតិ និងសាមគ្គីភាពនៃយុវជនជាកូនចៅជំនាន់ក្រោយ ក្នុងការថែរក្សា និងអភិរក្សកេរដំណែលពីដូនតា។

សូមជម្រាបថា សហភាពសហព័ន្ធយុវជនកម្ពុជាខេត្តព្រៃវែង បានធ្វើក្រុងពាលី កាលពីថ្ងៃទី៨ ខែមេសា ឆ្នាំ២០១៨ ដើម្បីចាប់ផ្តើមដំណើរការធ្វើទូក ង បំបែកឯតទគ្គកម្មពិភពលោក។

គួរបញ្ជាក់ថា ទូកដែលវែងជាងគេលើពិភពលោក គឺជាទូករបស់ប្រទេសចិន ដែលមានប្រវែង ៧៧,៨ម៉ែត្រ ដោយបានបំបែកឯតទគ្គកម្មកាលពីឆ្នាំ២០១៧៕

អត្ថបទ៖ សោភា