ខ្សែបម្រើ Paul Pogba នឹងក្លាយជា​កីឡាករ​ទី២ ក្នុង​ប្រវត្តិសាស្រ្ដ​ក្លឹប Manchester United ដែល​អាច​ស៊ុត​ចូល​ ២គ្រាប់ ក្នុង ៣ប្រកួត​ជាប់​គ្នា ប្រសិន​បើ​អាច​ស៊ុត​ចូល Newcastle ២គ្រាប់ នាការប្រកួត​សប្ដាហ៍​ទី២០ នៃ English Premier League វេលា​ម៉ោង ៣ទៀបភ្លឺ យប់នេះ​បាន។

កំណត់ត្រា​នេះ ធ្វើ​បាន​ដោយ​វីរបុរស​របស់​ក្លឹប គឺ Cristiano Ronaldo កាលពីឆ្នាំ២០០៧។ កាលពី​ពេល​នោះ Ronaldo បានស៊ុត​បញ្ចូលទី២គ្រាប់ ចំនួន៣ប្រកួត​ជាប់​គ្នា ពេល​ប៉ះ Man Utd ប៉ះ Aston Villa, Wigan និង Reading។

ចំណែក Pogba បាន​ស៊ុត​បញ្ចូលទី២គ្រាប់ ចំនួន ២ប្រកួត​ជាប់​គ្នាហើយ ក្នុង​ការប្រកួត​ទល់នឹង Huddersfield និង Bournemouth។ ដូច្នេះ​ខ្សែបម្រើ​ វ័យ ២៥ឆ្នាំ​រូបនេះ នឹង​អាច​តាមស្មើ​កំណត់ត្រា​របស់ Ronaldo ប្រសិន​បើ​អាច​ស៊ុត​បញ្ចូលទីក្រុម​សារិកា​ព្រៃ Newcastle យ៉ាងតិច ២គ្រាប់ នៅ​កីឡដ្ឋាន St James' Park នារាត្រី​នេះបាន។

គួររំលឹកថា ទម្រង់​លេង​របស់​ Pogba បានកើន​ឡើង​គួរ​ឲ្យ​កត់សម្គាល់ ចាប់តាំង​ពីលោក Ole Gunnar Solskjaer ចូល​ធ្វើ​ជា​អ្នកចាត់ការ​បណ្ដោះអាសន្ន ជំនួស​លោក Jose Mourinho មក។ ៣ប្រកួត​ក្រោម​ការ​ដឹកនាំ​របស់​អ្នកចាត់ការ​សញ្ជាតិ​ន័រវែស កីឡាករ​បារាំង​រូបនេះ ស៊ុត​ចូល ៤គ្រាប់ ស្មើ​ចំនួន​គ្រាប់​បាល់​ដែល​ខ្លួន​ស៊ុត​បញ្ចូលទី​ក្នុង ២០ប្រកួត ក្រោមការដឹកនាំ​របស់លោក Mourinho៕