បញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ត្រូវបានបង្កើតឡើងនៅថ្ងៃទី២៤ ខែមករា ឆ្នាំ១៩៩៩ តាមព្រះរាជក្រឹត្យលេខ នស/រកត/០១៩៩/២១ រួមជាមួយថ្ងៃបង្កើតអគ្គបញ្ជាការដ្ឋានកងយោធពលខេមរភូមិន្ទ ដោយ​មាន​លោក​នាយឧត្តមសេនីយ៍ មាស សុភា ជាមេបញ្ជាការ។

នា​ដើម​ខែ​កញ្ញា ឆ្នាំ២០១៨ លោក​ឧត្តមសេនីយ៍ឯក ត្រូវ​បាន​តែងតាំងជា​​មេបញ្ជាការ​កងទ័ព​ជើងគោក ​ខណៈ​លោក​លោក​នាយឧត្តមសេនីយ៍ មាស សុភា ត្រូវ​បាន​តែង​តាំង​ជា​ទេសរដ្ឋមន្ត្រី ​ទទួល​បន្ទុក​បេសកកម្ម​ពិសេស។

នៅ​ក្នុង​ពិធី​ខួបអនុស្សាវរីយ៍ ២០ឆ្នាំ ថ្ងៃបង្កើតបញ្ជាការដ្ឋានកងទ័ពជើងគោក ដែល​ធ្វើ​ឡើង​កាលពីថ្ងៃទី២៤ ខែមករា​ម្សិលមិញ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានថ្លែងថា កងទ័ពជើងគោកមានកំណើតរួមជាមួយនឹងថ្ងៃបង្កើតកងយោធពលខេមរភូមិន្ទ គឺថ្ងៃទី០៩ ខែវិច្ឆិកា ឆ្នាំ១៩៥៣ តែមិនធ្លាប់មានបញ្ជាការដ្ឋានសម្រាប់ដឹកនាំគ្រប់គ្រងបញ្ជានោះទេ។ រហូតមកដល់ថ្ងៃទី២៤ ខែមករា ឆ្នាំ១៩៩៩ ទើបមានការបង្កើតឡើងនូវបញ្ជាការដ្ឋានកងទ័ពជើងគោក។

លោកហ៊ុន ម៉ាណែត បានបញ្ជាក់ថា ការបង្កើតបញ្ជាការដ្ឋានកងទ័ពជើងគោកនាគ្រានោះ គឺជាពេលវេលាមួយដ៏លំបាកស្មុគស្មាញជាទីបំផុត ដោយសារតែពេលនោះ កម្ពុជាទើបបានបញ្ចប់សង្គ្រាមមស៊ីវិល បាន ២៦ថ្ងៃ ក្រោយការអនុវត្តដោយជោគជ័យនូវនយោបាយឈ្នះ-ឈ្នះ នាថ្ងៃទី២៩ ខែធ្នូ ឆ្នាំ១៩៩៨ ជាថ្ងៃដែលកម្លាំងជម្លោះគ្រប់ភាគីទាំងអស់ បានវិលមករួមរស់ជាមួយសង្គមជាតិវិញ។

លោក​បាន​បន្តថា កម្លាំងជម្លោះគ្រប់ភាគីត្រូវបានសមាហរណកម្មបញ្ចូលគ្នានៅពេលនោះ ធ្វើឲ្យបញ្ជាការដ្ឋានកងទ័ពជើងគោក មានរចនាសម្ព័ន្ធចាត់តាំង និងយោធិនជិត ១១ម៉ឺននាក់ និងមានប្រាំមួយយោធភូមិភាគ ១៨ក្បាលកងពលធំ ៥កងពលតូច ៤វរសេនាធំ ព្រមទាំងមាន២៤តំបន់សឹករងខេត្ត-ក្រុង និងអង្គភាពទ័ពជំនាញចំណុះជាច្រើនទៀត។

សូម​បញ្ជាកល់ថា កាលពីថ្ងៃ​ទី២៤ ខែមករា ម្សិលមិញនេះ រាជរដ្ឋាភិបាល បានធ្វើពពិធីខួបអនុស្សាវរីយ៍ ២០ឆ្នាំ ថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ (២៤ មករា ១៩៩៩-២៤ មករា ២០១៩) ក្រោមអធិបតីភាពសម្តេចនាយក​រដ្ឋមន្រ្ដី ហ៊ុន សែន៕