គ្រូវៀតណាម បង្ហាញការសោកស្តាយមួយ ក្រោយចាញ់ជប៉ុន នៅ AFC Asian Cup

2019-01-25 08:07:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងសន្និសីទសារព័ត៌មានក្រោយចាញ់ក្រុមជប៉ុន នៅវគ្គ៨ក្រុមចុងក្រោយនៃពានរង្វាន់ AFC Asian Cup 2019 កាលពីយប់មិញ គ្រូបង្វឹកក្រុមជម្រើសជាតិវៀតណាម លោក Park Hang-seo បានបង្ហាញការសោកស្តោយចំពោះការបរាជ័យនេះ។ ការសោកស្តាយនេះ ត្រូវបានលោកបញ្ជាក់ថា ដោយសារការប្រកួតពានរង្វាន់នេះ ធ្វើឡើងភ្លាមៗពេក បន្ទាប់ពី AFF Suzuki Cup 2018 ដែលធ្វើឱ្យក្រុមរបស់លោក មិនមានពេលគ្រប់គ្រាន់ក្នុងការរៀបចំឱ្យបានល្អបំផុត។ នេះបើតាមការចុះផ្សាយរបស់សារព័ត៌មានវៀតណាម VoV។

លោក Park Hang-seo ក្នុងអំឡុងការប្រកួតមួយរបស់វៀតណាម AFC Asian Cup 2019 (រូបភាពផ្ដល់សិទ្ធិដោយ Reuters)

លោកបន្តថា ជប៉ុន ជាក្រុមមួយដែលពោរពេញដោយសមត្ថភាពសាកសមនឹងឈ្នះពានរង្វាន់នេះ ហើយលោកថា បើវៀតណាម ចង់ឈានដល់កម្រិតដូចជប៉ុន គឺត្រូវចំណាយពេលជាច្រើនទៀត ក្នុងការអភិវឌ្ឍ។

ទោះជាយ៉ាងណា គ្រូសញ្ជាតិកូរ៉េខាងត្បូងរូបនេះ បានបង្ហាញមោទនភាព និងកោតសរសើរចំពោះកូនក្រុមខ្លួន ដែលបានឈានដល់វគ្គនេះ ពោលគឺបានលេងអស់ពីសមត្ថភាព បើទោះបីជាចាញ់ក្រុមសាមួរ៉ៃក៏ដោយ។ «ខ្ញុំគិតថា ពួកគេនឹងមានអនាគតភ្លឺស្វាង»។

កីឡាករវៀតណាម (ក្រហម) ខកចិត្ត ខណៈកីឡាករជប៉ុន អបអរក្រោយជ័យជម្នះ (រូបភាពផ្ដល់សិទ្ធិដោយ Reuters)

លោក Park Hang-seo បន្ថែមថា វៀតណាមមិនអាចប្រៀបធៀបនឹងក្រុមខ្លាំងៗដូចជា អ៊ីរ៉ង់ ជប៉ុន និងអ៊ីរ៉ាក់បាននោះទេ ប៉ុន្តែការជួបប្រកួតជាមួយក្រុមទាំងនេះ នឹងជួយឱ្យកីឡាករវៀតណាម កាន់តែមានសមត្ថភាពបន្ថែមទៀត។

បន្ទាប់ពីធ្លាក់ចេញពី AFC Asian Cup លោក Park បញ្ជាក់ថា លោកនឹងផ្តោតការយកចិត្តទុកដាក់លើការត្រៀមចូលរួមប្រកួតក្នុងពានរង្វាន់នានាបន្តបន្ទាប់ទៀត ក្នុងនោះរួមមានទាំងវគ្គជម្រុះ AFC U23 Championship 2020 និងវគ្គជម្រុះ FIFA World Cup 2022 ផងដែរ៕

អត្ថបទទាក់ទង៖