ដំណាំស្វាយចន្ទី ផ្តល់ទិន្នផលល្អប្រសើរ តែធ្លាក់ថ្លៃជាងឆ្នាំមុន

2019-02-26 03:06:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដំណាំស្វាយចន្ទីដែលប្រជាកសិករខេត្តកំពង់ចាម បានដាំដុះ នៅលើផ្ទៃដីប្រមាណជាង ២ម៉ឺនហិកតានោះ បានចាប់ប្រមូលផលជាគ្រាប់បណ្តើរៗ គឺបង្ហាញទិន្នផលប្រសើរជាងឆ្នាំ២០១៨។ ប៉ុន្តែតម្លៃលក់ចេញមួយគីឡូក្រាម ទាបជាងកាលពីឆ្នាំមុនរាប់ពាន់រៀល បើប្រៀបធៀបរយ:ពេលនៃការផ្តល់ផលលើកដំបូងដូចគ្នានេះ។

លោក ស៊ឹម វីរៈ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាមបានប្រាប់ឲ្យដឹងកាលពីថ្ងៃទី២៥ ខែកុម្ភៈ នេះថា ពេលនេះកសិករដែលប្រកបរបរដាំដំណាំស្វាយចន្ទី បានប្រមូលផលជាទូទៅពី ២សប្តាហ៍ ទៅមួយខែហើយ។ ទិន្នផលលើកដំបូងនេះ ហាក់ប្រសើរជាងឆ្នាំមុន២០១៨ គឺដោយកត្តាអាកាសគ្មានទឹកភ្លៀងធ្លាក់ចំពេលដំណាំឧស្សាហកម្មមួយនេះ ចេញផ្កា និងចេញក្ដឹបនោះ។

ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម បន្តថា តែប៉ះចំអាកាសធាតុក្ដៅជ្រុលជាងសព្វថ្ងៃ ដំណាំនេះក៏ធ្លាក់ចុះទិន្នផលដែរ។ បញ្ហាតម្លៃគ្រាប់ស្វាយចន្ទីដល់លើកដំបូងនេះ បានធ្លាក់ចុះតម្លៃច្រើន បើបៀបទៅឆ្នាំមុនគឺសម្រាប់តម្លៃនៅថ្ងៃទី២៥កុម្ភៈ មួយគីឡូក្រាមគ្រាប់ស្វាយចន្ទីទើបហើយថ្មីៗ តម្លៃ ៥៨០០រៀល ហើយគ្រាប់ដែលហាលកម្តៅថ្ងៃស្ងួតតម្លៃ ៦៨០០ រៀល។ តម្លៃនេះបើប្រៀបធៀបទៅកាលពីឆ្នាំមុនប្រមូលលើកដំបូងដែរ គឺខុសគ្នាពី ៣០០០ ទៅជិត ៤០០០ រៀល។

លោក វីរ: បានបន្តថា សម្រាប់តួលេខចម្ការស្វាយចន្ទីក្នុងខេត្តកំពង់ចាមឆ្នាំ២០១៨ ទាំងកំពុងប្រមូលផល និងទើបបានដាំដុះហើយ សរុបចំនួន ២៤៣៦៤ហិកតា។ ក្នុងនោះស្រុកដែលមានដំណាំស្វាយចន្ទីច្រើនជាងគេមានស្រុកស្ទឹងត្រង់ ស្រុកចម្ការលើ ស្រុកជើងព្រៃ ស្រុកកំពង់សៀម ស្រុកបាធាយ គឺលើកលែងតែក្រុងកំពង់ចាមមួយប៉ុណ្ណោះគ្មានចម្ការស្វាយចន្ទី។

លោក នួន វាសនា ម្ចាស់ចម្ការស្វាយចន្ទីមួយកន្លែងនៅឃុំហាន់ជ័យ ស្រុកកំពង់សៀម បានបញ្ជាក់ថា ចម្ការស្វាយចន្ទីរបស់គ្រួសារលោកមានទំហំជិត ២ហិកតា មានអាយុ៦ឆ្នាំ គឺចំនួន ២ថ្ងៃបេះប្រមូលផលម្តង បានពី ៦០០ទៅ ៧០០គីឡូក្រាម។ ការប្រមូលផល បានជាងមួយខែនេះ គឺបានបង្ហាញពីទិន្នផលស្វាយចន្ទីឆ្នាំនេះ មានផ្លែច្រើនជាងឆ្នាំ២០១៨ គឺអាចច្រើនជាងពី ១ ទៅ ២តោនបើសិនជាអាកាសធាតុនៅតែបន្តអំណោយផលដូចពេលកន្លងទៅនេះ។

ម្ចាស់ចម្ការបានឲ្យដឹងទៀតថា ប៉ុន្តែអ្វីដែលគួរឲ្យកត់សម្គាល់គឺតម្លៃលក់ចេញសព្វថ្ងៃដែលឈ្មួញមកទិញដល់ចម្ការមួយគីឡូក្រាមពី ៥១០០ ទៅ ៥៥០០ រៀល។ តម្លៃនេះធ្លាក់ចុះជាងកាលពីដល់លើកដំបូងពី ១០០០ ទៅ ២០០០ រៀលក្នុងមួយគីឡូក្រាម ហើយតម្លៃនេះ រឹតតែទាបជាងកាលពីឆ្នាំ២០១៨ ពីជាង ៣០០០ ទៅជាង ៤០០០ រៀល៕

រូបថត៖ រស្មីកម្ពុជា

ប្រភព៖ រស្មីកម្ពុជា ប្រែសម្រួល៖ លាភ.